[گیت۔ مزمُور۔ از بنی قورّح۔ میر مُغّنی کے لئے] بطرز"محَلَت" گانے کے لئے۔ مَشکِیل۔ از ہمیاؔن ازراحی۔ ¹ ۔اَے خُداوند میرے خُدا مَیں دِن کو پُکارتا ہُوں۔ اَور رات کے وقت تیرے آگے چِلّاتا ہُوں۔ ² ۔میری دُعا کو اپنے حضُور پُہنچنے دے۔ میرے چِلّانے پر اپنا کان لگا۔ ³ ۔کیونکہ میری جان مصائب سے سیر ہو گئی ہَے۔ اَور میری زِندگی پاتال کے قریب پُہنچ گئی ہَے۔ ⁴ ۔مَیں غار میں جانے والوں میں شُمار کِیا جاتا ہُوں۔ مَیں ناتواں آدمی کی طرح ہو گیا ہُوں۔ ⁵ ۔میرا پلنگ مُردوں کے درمیان ہَے۔ اُن مقتُولوں کی مانند جو قبر میں پڑے ہوں۔ اَور جِنہیں تُو پھِر یاد نہیں کرتا۔ اَور جو تیری پرورِش سے کَٹ گئے ہَیں۔ ⁶ ۔تُو نے مُجھے گڑھےکی تہہ میں۔ یعنی تارِیک گہراؤ میں ڈال دِیا ہَے۔ ⁷ ۔تیرا غضب مُجھ پر بھاری ہَے۔ اَور تُو مُجھے اپنی تمام موجوں سے تنگ کرتا ہے۔(سِلاہ) ⁸ ۔میرے جان پہچانوں کو تُو نے مُجھ سے دُور کر دِیا۔ تُو نے مُجھے اُن کے نزدِیک مکرُوہ ٹھہرایا ہَے۔ مَیں قید میں ہُوں۔ اَور نِکل نہیں سکتا۔ ⁹ ۔میری آنکھیں دُکھ کے سبب سے دُھندلا جاتی ہَیں۔ اَے خُداوند مَیں ہر روز تیرے پاس چِلّاتا ہُوں۔ اَور تیری طرف اپنے ہاتھ پھیلاتا ہُوں۔ ¹⁰ ۔کیا تُو مُردوں کے لئےمُعجزے کرے گا؟ کیا رُوحیں اُٹھ کر تیری تعریف کریں گی؟(سِلاہ) ¹¹ ۔کیا قبر میں تیر ی مہربانی ۔ اَور سڑاہٹ میں تیری وفاداری بیان کی جائے گی۔ ¹² ۔کیا تارِیکی میں تیرےمُعجزے ظاہر ہوں گے۔ اَور فراموشی کے وطن میں تیر ا عدل ظاہر ہوگا؟ ¹³ ۔لیکن اَے خُداوند مَیں تیری ہی دُہائی دیتا ہُوں۔ اَور صُبح کے وقت میری دُعا تیرے حضُور پُہنچتی ہے۔ ¹⁴ ۔اَے خُداوند تُو میری جان کو کِس سبب سے رَدّ کرتا ہَے؟ تُو اپنا چہرہ مُجھ سے کیوں چُھپائے رکھتا ہَے؟ ¹⁵ ۔مَیں لڑکپن ہی سے مُصِیبت زدہ اَور قریب المَوت ہُوں۔ اَور مَیں تیرے خوف کے مارے حواس باختہ ہو گیا ہُوں۔ ¹⁶ ۔تیرا غضب مُجھ پر آپڑا ہَے۔ اَور تیری دہشتوں نے مُجھے ہلاک کر دِیا ہَے۔ ¹⁷ ۔وہ دِن بھر پانی کی طرح میرے گِرد ہَیں۔ وہ ہر طرف سے مُجھے گھیرے ہوئے ہَیں۔ ¹⁸ ۔تُو نے رفیق اَور ہم نشین مُجھ سے دُور کر دیئے ہَیں۔ تارِیکی ہی میرا مُحِبّ ہَے۔