[میر مغّنی کے لئے بطرز "گتیت" از آسفؔ] ¹ ۔ہمارے مددگارّ خُدا کے لئے خُوشی سے گاؤ۔ یَعقُوبؔ کے خُدا کے لئے للکارو۔ ² ۔ستار کے ساتھ گاؤ۔ اَور خنجریاں ٹنکاؤ خُوش آواز بربط اَور سارنگی بجاؤ۔ ³ ۔نئے چاند کے وقت نرسنگا پھُونکو۔ اُور پُورے چاند یعنی ہماری عید کے وقت بھی۔ ⁴ ۔کیونکہ یہ اِسرؔائیل کی رسم۔ اَور یَعقُوبؔ کے خُدا کی رضاہَے۔ ⁵ ۔اُس نے اُسے یُوسؔف میں شہادت مُقرّر کِیا۔ جب وہ مُلکِ مِصؔر سے باہر نِکلا۔ مَیں نے ایک ایسی زُبان سُنی جس سے مَیں واقِف نہ تھا۔ ⁶ ۔"مَیں نے اُس کے کندھے سے بوجھ ہٹا دِیا۔ اُس کے ہاتھ ٹوکری سے چھُوٹ گئے۔ ⁷ ۔مُصِیبت کے وقت تُو نے پُکارا تو مَیں نے خلاصی دی۔ مَیں نے گرجتے بادل میں سے تُجھے جَواب دِیا۔ مَیں نے تُجھے مرؔیبہ کے چشمے پر آزمایا ۔ (سِلاہ) ⁸ ۔اَے میری اُمّت سُن مَیں تُجھے نصِیحت کُروں گا۔ اَے اِسرؔائیل کاش! تُو میری سُنے۔ ⁹ ۔تیرے ہاں دُوسرا مَعبُود نہ ہوگا۔ تُو کِسی اجنبی مَعبوُد کی پرستِش نہ کرے گا۔ ¹⁰ ۔مَیں ہی خُداوند تیرا خُدا ہُوں۔ جو تُجھے مُلکِ مِصؔر سے نِکال لایا۔ اپنا مُنہ خُوب کھول تو مَیں اُسے بھر دُوں گا۔ ¹¹ ۔لیکن میری اُمّت نے میری نہ سُنی۔ اَور اِسرؔائیل نے میری اطاعت نہ کی۔ ¹² ۔اِس لئے مَیں نے اُنہیں اُن کی سخت دِلی کے حوالے کِیا۔ وہ اپنی ہی مشورتوں پر چلیں۔ ¹³ ۔کاش! میری اُمّت میری سُنتی۔ اَور اِسرؔائیل میری راہوں پر چلتا۔ ¹⁴ ۔تو مَیں فوراً اُن کے دُشمنوں کو مغلُوب کرتا۔ اَور اُن کے مُخالفِوں پر اپنا ہاتھ چلاتا۔ ¹⁵ ۔خُداوند سے نفرت کرنے والے اُس کی خُوشامد کرتے۔ لیکن اُن کا حصہ ہمیشہ کے لئے قائم ہوتا۔ ¹⁶ ۔اَور مَیں اُسے گیہُوں کا میدہ کِھلاتا۔ اَور چٹان کے شہد سے اُسے سیر کرتا"