AnnaH-ur_psa_text

زُبور شہر اَور ہَیکل کی بربادی پر نوحہ

[ مزمُور۔ از آسفؔ] ¹ ۔اے خدا۔ غیر قومیں تیری میراث میں داخل ہو گئی ہیں۔ اُنہوں نے تیری مُقدّس ہَیکل کو ناپاک کر دِیا ہَے۔ اُنہوں نے یرُو شلِیؔم کوکھنڈر بنا دِیا ہَے۔ ² ۔اُنہوں نے تیرے بندوں کی نعشوں کو آسمان کے پرندوں کی۔ اَور تیرے مُقدّسوں کے گوشت کو زمین کے درِندوں کی خُوراک بنا دِیا ہَے۔ ³ ۔اُنہوں نے اُن کا خُون یرُوشلیِؔم کے گرِد گو یا پانی بہا دِیا ہَے۔ اَور کوئی نہیں پایا گیا جو اُنہیں دفن کرے۔ ⁴ ۔ہم اپنے ہمسایوں کے نزدِیک ضربُ المِثل۔ اَور اپنے آس پاس کی دُنیا کے نزدِیک باعِثِ مذاق و تمسخُر بن گئے ہَیں۔ ⁵ ۔کب تک اَے خُداوند۔ کیا تُو ہمیشہ کے لئے ناراض رہے گا؟ کیا تیری غیرت آگ کی طرح بھڑکتی رہے گی؟ ⁶ ۔اپنا غضب اُن قوموں پر اُنڈیل دے جو تُجھے نہیں پہچانتیں۔ اَور اُن ممُالِک پر بھی جو تیرا نام نہیں لیتے۔ ⁷ ۔کیونکہ اُنہوں نے یَعقُوؔب کوکھا لِیا ہَے۔ اَور اُس کے مَسکِن کو اُجاڑ دِیا ہَے۔ ⁸ ۔ ہمارے باپ دادا کے گُناہ ہمارے خلاف یاد نہ کر۔ تیری رحمت جلد ہم تک پُہنچے۔ کیونکہ ہم تو بُہت ہی ذلِیل ہو گئے ہَیں۔ ⁹ ۔ اَے ہماری نجات کے خُدا۔ اپنے نام کے جلال کی خاطِر ہماری مددکر۔ اَور اپنے نام کی خاطِر ۔ ہمیں چُھڑا اَور ہمارے گُناہوں کو بخش دے۔ ¹⁰ ۔غیر قومیں کِس واسطے کہیں۔ کہ اُن کا خُدا کہاں ہَے؟ تیرے بندوں کے بہائے ہوئے خُون کا اِنتقام۔ ہماری آنکھوں کے سامنے غیر قوموں پر واضح ہو جائے۔ ¹¹ ۔اسیروں کا کراہنا تیرے حضُور تک پُہنچے۔ اپنے بازُو کی قُوّت سے مرنے والوں کو بچا لے۔ ¹² ۔اور ہمارے ہمسائے جو طعنہ زنی تُجھ پر کرتے رہے ہَیں۔ اَے خُداوند اُسے سات گُنا اُنہی کے دامن میں ڈال دے۔ ¹³ ۔پر ہم جو تیری اُمّت اَور تیری چراگاہ کی بھیڑیں ہَیں۔ ابد تک تیرا شُکر کرتے رہیں گے۔ ہم نسل در نسل تیری سِتائش بیان کرتے رہیں گے۔