[میر مغّنی کےلئے۔ یدُوتؔون کے طور پر۔ ازآسفؔ۔ مزمُور] ¹ ۔میری آواز خُدا کے حضُور رہَے اور مَیں فریاد کرتا ہُوں۔ میری آواز خُدا ہی کے حضُور ہَے تاکہ وہ میری سُنے۔ ² ۔مَیں اپنی مُصِیبت ہی کے دِن خُداوند کو ڈُھونڈتا ہُوں۔ رات کو میرا ہاتھ پھیلا رہتا ہَے اَور سُن نہیں ہوتا۔ ³ ۔میری جان کو تسکِین نامنظُور ہَے۔ جب مَیں خُدا کو یاد کرتا ہُوں تو آہ بھرتا ہُوں۔ جب مَیں غور کر تا ہُوں تو میری جان نڈھال ہے۔ (سلِاہ)۔ ⁴ ۔تُومیری آنکھوں کی پلکوں کو روک رکھتا ہَے۔ مَیں بے تاب ہُوں اَور بول نہیں سکتا۔ ⁵ ۔میں گُزشتہ ایّام پر غور کرتا ہُوں۔ میں پہلے زمانے کے برسوں کو یاد کرتا ہُوں۔ ⁶ ۔میں رات کو اپنے دِل ہی میں سوچتا ہُوں۔ مَیں فِکر کرتا ہُوں اَور میری رُوح جانچتی ہَے۔ ⁷ ۔کہ"کیا خُداوند ہمیشہ کے لئے ترک کردے گا؟ اور پھر کبھی مہربان نہ ہوگا؟" ⁸ ۔کیا اُس کی شفقت ہمیشہ کے لئے چلی گئی ہَے؟ اَور اُس کا وعدہ ہر پُشت کے لئے باطِل ہو گیا ہَے۔ ⁹ ۔کِیا خُدا رحم کرنا بھُول ہی گیا ہَے؟ کیا وہ غضب ناک ہو کراپنی رحمت کو روک رکھتا ہَے؟"(سلِاہ) ¹⁰ ۔اَور مَیں کہتا ہُوں کہ " یہ میری ہی کمزُوری کا باعِث ہَے۔ کہ حَق تعالیٰ کا دستِ راست بدل گیا ہَے۔" ¹¹ ۔مَیں خُداوند کے کاموں کو یاد کرتا ہُوں۔ ہاں مَیں تیرے قدیم مُعجزات کو یاد کرتا ہُوں۔ ¹² ۔مَیں تیرے کُل اَعمال پر غور کرتا ہُوں۔ میں تیرے کُل اَفعال پر سوچتا ہُوں۔ ¹³ ۔اَے خُدا تیری راہ مُقدّس ہَے۔ کون سا مُعبُود ہمارے خُد ا کی طرح عظیم ہَے۔ ¹⁴ ۔تُو ہی وہ خُدا ہَے جو عجیب کام کرتا ہَے۔ تُو نے اقوام میں اپنی قُدرت ظاہر کی ہَے۔ ¹⁵ ۔تُو نے ہی اپنے بازُو سے اپنی قوم کو۔ یعنی یَعقُوبؔ اَور یُوسؔف کی اولاد کو چھُڑایا ہے۔ (سلِاہ) ¹⁶ ۔اَے خُدا۔ سمُندروں نے تُجھے دیکھا۔ سُمندروں نے تُجھے دیکھا۔ وہ بے قرار ہوئے۔ گہراؤ بھی کانپ اُٹھے۔ ¹⁷ ۔بدلیوں نے پانی برسایا۔ بادِلوں سے آواز آئی۔ اَور تیرے تیِر ہر طرف چلے۔ ¹⁸ ۔تیری گرج کی آواز بگُولے میں تھی۔ برق نے جہان کو روشن کِیا۔ زمین لرزی اَور مُتزلزل ہوئی۔ ¹⁹ ۔تیری راہ سمُندر کے بیچ میں سے۔ اَور تیرا راستہ بڑے سمُندر میں سے جاتا ہَے۔ لیکن تیرے نقشِ قدم نا معلُوم ہُوئے۔ ²⁰ ۔تُو نے مُوسؔیٰ اَور ہاروؔن کے وسیلے سے۔ گلّے کی مانند اپنی قوم کی رہنُمائی کی۔