[ ہلّلُویاہ] ¹ ۔ خُداوند کی حمد کرو کیونکہ وہ نیک ہے۔ خُداوند کی مَدح سرائی کرو کیونکہ وہ شیریں ہَے۔ اُس کی حمد کرنا انسبہَے ۔ ² ۔خُداوند یرُوشلیِؔم کو تعمیر کرتا ہَے۔ وہ اِسرؔائیل کے جلاوطنوں کو جمع کرتا ہَے۔ ³ ۔وہ شِکستہ دِلوں کو شِفا دیتا ہَے۔ اَور اُن کے زخموں کو باندھ دیتا ہَے۔ ⁴ ۔وہ سِتاروں کی تعداد کو مُقرّر کرتا ہَے۔ اَور ایک ایک کو نام لے کر بُلاتا ہَے۔ ⁵ ۔ہمارا خُداوند عظیم اَور قادِر قُوّت ہَے۔ اُس کی حکمت نا قابل مساحت ہے۔ ⁶ ۔خُداوند حلیموں کو اُٹھا لیتا ہَے۔ اَور بے دِینوں کو خاک میں مِلا دیتا ہَے۔ ⁷ ۔شُکر گُزاری کے ساتھ خُداوند کے لئے گاؤ۔ بربط کے ساتھ ہمارے خُدا کی مَدح سرائی کرو۔ ⁸ ۔جو آسمان کو بادِلوں سے ڈھانپ دیتا ہَے۔ جو زمین کے لئے بارِش مُہیّا کرتا ہَے۔ جو پہاڑوں پر گھاس اُگاتا ہَے۔ اَور اِنسان کی خدمت کے لئے نباتات۔ ⁹ ۔جو چوپائیوں کو اُن کی خُوراک دیتا ہَے۔ ہاں کَوّؤں کے اُن بچّوں کو بھی جو اُسے پُکارتے ہَیں۔ ¹⁰ ۔وہ گھوڑے کی طاقت سے خُوش نہیں ہوتا۔ اَور مرد کی پنڈلیاں اُسے پسند نہیں آتیں۔ ¹¹ ۔خُداوند اپنے ڈرنے والوں سے خُوش ہوتا ہَے۔ یعنی اُن سے جو اُس کے کرم کے مُنتظِر رہتے ہَیں۔ ¹² ۔اَے یرُوشلیِؔم خُداوند کی حمد کر۔ اَے صیون اپنے خُدا کی حمد کر۔ ¹³ ۔کیونکہ اُس نے تیرے دروازوں کی سلاخوں کو مُستحکم کِیا ہَے۔ اَور تیرے اندر تیرے بیٹوں کو برکت دی ہَے۔ ¹⁴ ۔اُس نے تیری حُدُود میں اَمن بخشا ہَے۔ اَور تُجھے گیہُوں کے میدے سے آسوُدہ کرتا ہَے۔ ¹⁵ ۔وہ اپنے سُخن کو زمین پر بھیجتا ہَے۔ اُس کا کلام نہایت تیزرَو ہے۔ ¹⁶ ۔وہ برف کو اُون کی مانند گِراتا ہَے۔ وہ پالے کو راکھ کی مانند بکھیرتا ہَے۔ ¹⁷ ۔وہ اپنے اَولوں کو روٹی کے رِیزوں کی مانند برساتا ہَے۔ اُس کی سردی کے سامنے ندیاں جم جاتی ہَیں۔ ¹⁸ ۔وہ اپنا کلام بھیجتا اَور اُنہیں پِگھلا دیتا ہَے۔ وہ اپنی ہوا کو چلنے کا حُکم دیتا ہَے اَور ندیاں بہنے لگ جاتی ہَیں۔ ¹⁹ ۔اُس نے یَعقُوبؔ پر اپنا کلام ظاہر کیا ہَے۔ اَور اِسرؔائیل پر اپنے قَوانین اَور آئین۔ ²⁰ ۔اُس نے کِسی اَور قوم سے یُوں نہیں کِیا۔ اُس نے اپنے آئین اُن پر آشکارا نہیں کئے۔ ہلّلُویاہ