[ترانہ ء حمد۔ از داؔؤد] ¹ ۔ الف۔ اَے میرے خُدا بادشاہ ۔ مَیں تیری تعریف کرُوں گا۔ مَیں اَبدُالآباد تک تیرے نام کو مُبارَک کہتا رہُوں گا۔ ² ۔ب۔مَیں ہر روز تُجھے مُبارَک کہُوں گا۔ اَور اَبدالآباد تک تیرے نام کی حمد کرتا رہُوں گا۔ ³ ۔ج۔خُداوند عظیم اَور نہایت قابِل حمد ہَے۔ اَور اُس کی عظمت ناقابِل دریافت ہَے۔ ⁴ ۔د۔ پُشت در پُشت تیرے کاموں کی تعریف کرتی ہَے۔ اَور تیری قُدرت کا بیان کرتی ہَے۔ ⁵ ۔ہ۔ وہ تیری حشمت کے عظیم جلال کا ذِکر کرتے ہَیں۔ اَور تیرے عجائبات کو مشُہور کرتے ہَیں۔ ⁶ ۔و۔ اَور تیرے مُہیب کاموں کی قُدرت کی باتیں کرتے ہَیں۔ اَور تیری عظمت بیان کرتے ہَیں۔ ⁷ ۔ز۔ وہ تیرے عظیم اِحسان کی تعریف۔ اَور تیرے عدل کی بابت خُوش اِلحانی کرتے ہَیں۔ ⁸ ۔ح۔ خُداوند رحیم اَور مہربان ہَے۔ وہ قہر کرنے میں دھیما اَور شفقت میں غَنّی ہَے۔ ⁹ ۔ط۔خُداوند سب پر کریم ہَے۔ اَور اپنی تمام مصنُوعات پر مہربان ہَے۔ ¹⁰ ۔ی۔ اَے خُداوند تیری تمام مصنُوعات تیرا شُکر کریں۔ اَور تیرے مُقدّسِین تُجھے مُبارَک کہیں۔ ¹¹ ۔ک۔ وہ تیری سَلطنَت کی شوکت کی بات کریں۔ اَور تیری قُدرت کا ذِکر کریں۔ ¹² ۔ل۔ تاکہ تیری قُدرت اور تیری عظیم سَلطنَت کی حشمت ۔ بنی آدم پر ظاہر کریں۔ ¹³ ۔م۔ تیری سَلطنَت کُل زمانوں کی سَلطنَت ہَے۔ اَور تیری حُکومت کُل پُشتوں میں قائم رہتی ہَے۔ ن۔ خُداوند اپنے تمام اَقوال کا سچّا ہَے۔ اَوراپنے تمام اَعمال میں نیک ہَے۔ ¹⁴ ۔س۔ خُداوند سب گِرنے والوں کو تھامتا ہَے۔ اَور سب جُھکے ہُوؤں کو سیدھا کرتا ہَے۔ ¹⁵ ۔ع۔ سب کی آنکھیں تیری مُنتظِر ہَیں۔ اَور تُو اُنہیں وقت پر غذا دیتا ہَے۔ ¹⁶ ۔ف۔ تُو اپنے ہاتھ کھولتا ہَے۔ اَور ہر جاندار کی خواہش پُوری کرتا ہَے۔ ¹⁷ ۔ص۔ خُداوند اپنی سب راہوں میں صادِق ہَے۔ اَور اپنے سب کاموں میں نیک ہَے۔ ¹⁸ ۔ق۔ خُداوند اُن سب کے نزدِیک ہے جو اُسے پُکارتے ہَیں۔ یعنی جو اُسے سچّے دِل سے پُکارتے ہَیں۔ ¹⁹ ۔ر۔ وہ اپنے ڈرنے والوں کی خواہش پُوری کرے گا۔ اَور اُن کی فریاد سُن کر اُنہیں بچائے گا۔ ²⁰ ۔ش۔ خُداوند اُن سب کی حفِاظت کرتا ہَے جو اُس سے مُحبّت رکھتے ہَیں۔ مگر سب بے دِینوں کو فنا کرے گا۔ ²¹ ۔ت۔ میرا مُنہ خُداوند کی حمد کی باتیں کرے۔ اَور ہر بشر اَبدُالآباد تک اُس کے پاک نام کو مُبارَک کہے۔