[گیت۔ مزمُور۔ از داؔؤد] ¹ ۔میرا دِل مُستِقل ہَے اَے خُدامیرا دِل مُستِقل ہَے۔ مَیں گاؤُں گا اَور حمد سرائی کُروں گا۔ جاگ اَے میری جان۔ ² ۔جاگو اَے بربط اَور سِتار۔ مَیں نُور کے تڑکے کو جگاؤُں گا۔ ³ ۔اَے خُداوند مَیں قوموں میں تیری تعریف کرُوں گا۔ اَور اُمّتوں میں تیری حمد سرائی کرُوں گا۔ ⁴ ۔کیونکہ تیری شفقت فلک تک۔ اَور تیری صداقت بادلوں تک عظیم ہَے۔ ⁵ ۔اَے خُدا تُو افلاک پر سرفراز ہو۔ کُل جہان پر تیرا جلال ہو۔ ⁶ ۔تاکہ تیرے محبُوب رِہائی حاصِل کریں۔ تُو اپنے دستِ راست سے حمایت کر۔ اَور ہماری سُن۔ ⁷ ۔خُدا نے اپنے مَقِدس میں قول کِیا ہَے۔ مَیں شادمانی کرتے ہوئے سکم کو تقسیم کرُوں گا۔ اَور سکات کی وادی کی پیمائش کرُوں گا۔ ⁸ ۔مُلک ِ جلعاؔد میرا ہَے۔ مُلکِ منّسؔی بھی میرا ہَے۔ اَور اِفرؔائیم میرے سر کا خوُد ہَے۔ یہُوؔداہ میرا عصا ہَے۔ ⁹ ۔موآبؔ میرے دھونے کی چِلچی ہَے۔ اِدوؔم پر مَیں اپنا جُوتا رکھُّوں گا۔ فِلسؔطین پر مَیں فتح کا نعرہ ماروں گا۔ ¹⁰ ۔مُجھے ٖفصیلدار شہر میں کون پُہنچائے گا؟ مُجھے اِدوؔم تک کون لے جائے گا؟ ¹¹ ۔کیا تُو ہی نہیں اَے خُدا اگرچہ تُو نے ہمیں رَدّ کر دِیا ہَے۔ کیا تُو ہی نہیں اَور اَے خُدا تُو ہمارے لشکروں کے ساتھ نہیں جاتا۔ ¹² ۔دُشمن کے مُقابلے میں ہماری کُمک کر۔ کیونکہ آدمیوں کی مدد باطِل ہَے۔ ¹³ ۔خُدا کی بدولت ہم بَہادُری دکھائیں گے۔ اَور وہی ہمارے دُشمنوں کو پامال کرے گا۔