¹ ۔خُداوند کا شکُر کرو اِس لئے کہ وہ نیک ہَے۔ اِس لئے کہ اُس کی رحمت اَبد تک ہَے۔ ² ۔خُداوند کے وہ چھُڑائے ہُوئے یُوں کہیں۔ جِنہیں اُس نے مُخالِف کے ہاتھ سے چھُڑا لِیا ہَے۔ ³ ۔اَور اُنہیں مُلک مُلک سے فراہم کِیا۔ مشرق و مغرب سے۔ شِمال و جنُوب سے۔ ⁴ ۔وہ بِیابان میں اَور صحرا میں بھٹکتے پھِرے۔ اُنہیں بسنے کے لئے کِسی شہر کی راہ نہ مِلی۔ ⁵ ۔وہ بھُوکے اَور پیاسے تھے۔ اَور اُن کی جان اُن میں غش کھاتی تھی۔ ⁶ ۔اَور اپنی تنگی میں اُنہوں نے خُداوند کو پُکارا۔ تو اُس نے اُنہیں اُن کی تکالیف سے رِہائی دی۔ ⁷ ۔اَور سیدھی راہ سے اُنہیں لے گیا۔ تاکہ بسنے کے لئے کِسی شہر میں جا پُہنچیں ⁸ ۔چاہیئے کہ وہ خُداوند کی رحمت کے لئے۔ اَور اُس کے اُن عجائبات کے لئے جو اُس نے بنی آدم کی خاطر کِئے۔ اُس کی شُکر گُزاری ادا کریں۔ ⁹ ۔کیونکہ اُس نے ترستی جان کو سیر کر دِیا۔ اَور بھُوکی جان کو اچھیّ چیزوں سے بھر دِیا۔ ¹⁰ ۔وہ مُصِیبت اَور لوہے کے اسیر ہو کر۔ تارِیکی اَور مَوت کے سائے میں بیٹھے تھے۔ ¹¹ ۔کیونکہ اُنہوں نے خُدا کے اَحکام سے سرکشی کی۔ اَور حَق تعالیٰ کی مشورت کو حقِیر جانا۔ ¹² ۔تو اُس نے اُن کے دِل کو مُشقّت سے عاجِز کِیا۔ اُنہوں نے جُنبش کھائی اَور کوئی نہ تھا جو مدد کرے۔ ¹³ ۔اَور اپنی تنگی میں اُنہوں نے خُداوند کو پُکارا۔ تو اُس نے اُنہیں اُن کی تکالیف سے خلاصی دی۔ ¹⁴ ۔اَور اُنہیں تارِیکی اَور مَوت کے سائے سے نِکال لایا۔ اَور اُن کے بندھنوں کو توڑ ڈالا۔ ¹⁵ ۔چاہیئے کہ وہ خُداوند کی رحمت کے لئے۔ اَور اُس کے اُن عجائبات کے لئے جو اُس نے بنی آدم کی خاطر کِئے۔ اُس کی شکُر گُزاری ادا کریں۔ ¹⁶ ۔کیونکہ اُس نے پیِتل کے دروازے توڑ ڈالے۔ اَور لوہے کی سلاخیں چُور چُور کر دیں۔ ¹⁷ ۔وہ اپنے گُناہ کے سبب سے بیمار ہونے لگے۔ اَور اپنی بَدیوں کے سبب سےمُصِیبت میں پڑے۔ ¹⁸ ۔وہ ہر طرح کی خُوراک سے مُتنِفر ہو گئے۔ اَور مَوت کے دروازوں کے نزدِیک آگئے۔ ¹⁹ ۔اَور اپنی تنگی میں اُنہوں نے خُداوند کو پُکارا۔ تو اُس نے اُنہیں اُن کی تکالیف سے خلاصی دی۔ ²⁰ ۔اُس نے اپنا کلام بھیجا تاکہ اُنہیں شِفا دے۔ اَور اُنہیں ہلاکت سے رِہائی دے۔ ²¹ ۔چاہیئے کہ وہ خُداوند کی رحمت کے لئے۔ اَور اُس کے اُن عجائبات کے لئے جو اُس نے بنی آدم کی خاطِر کِئے۔ اُس کی شکُر گُزاری ادا کریں۔ ²² ۔اَور وہ حمد کے ذَبیحے گُزرانیں۔ اَور خُوشی سے للکارتے ہُوئے اُس کے کاموں کا بیان کریں۔ ²³ ۔جو سمُندر میں جہازوں پر جاتے تھے۔ تاکہ پانی کی وُسعت پر تجارت کریں۔ ²⁴ ۔اُنہوں نے خُداوند کے کام۔ اَور سمُندر میں اُس کے عجائبات دیکھے۔ ²⁵ ۔اُس کے کہنے پر ایسی طُوفانی ہَوا اُٹھی۔ جس نے اُس کی موجوں کو اُوپر اُٹھایا۔ ²⁶ ۔وہ اَفلاک تک چڑھتے اَور گہرائیوں تک اُترتے تھے۔ اَور وہ مُصِیبت کے سبب سے پِگھل گئے۔ ²⁷ ۔ وہ متوالے کی طرح ڈگمگانے اَور لڑکھڑانے لگے۔ اَور اُن کی ساری مہارت جاتی رہی۔ ²⁸ ۔اَور اپنی تنگی میں اُنہوں نے خُداوند کو پُکارا۔ تو اُس نے اُنہیں اُن کی تکالیف سے باہر نِکالا۔ ²⁹ ۔اُس نے تُند ہوا کو دھیما کر دِیا۔ اَور سُمندر کی موجیں ٹھہر گئیں۔ ³⁰ ۔اَور وہ خُوش ہوئے اِس لئے کہ وہ تھم گئیں۔ اَور وہ اُنہیں بندر گاہ مقصُود تک لے گیا۔ ³¹ ۔چاہیئے کہ وہ خُداوند کی رحمت کے لئے۔ اَور اُس کے اُن عجائبات کے لئے جو اُس نے بنی آدم کی خاطر کِئے۔ اُس کی شکُر گُزاری ادا کریں۔ ³² ۔اَور وہ اُمّت کے مجمع میں اُس کا شُکر کریں۔ اَور بزرُگوں کی مجِلس میں اُس کی حمد کریں۔ ³³ ۔وہ دریاؤں کو بِیابان۔ اَور پانی کے چشموں کو خُشک زمین کر ڈالتا ہَے۔ ³⁴ ۔اَور بسنے والوں کی شرارت کے سبب سے۔ زرخیز زمین کو کلّر کر دیتا ہَے۔ ³⁵ ۔وہ بیابان کو جھیل۔ اَور خُشک زمین کو پانی کے چشمے بنا دیتا ہَے۔ ³⁶ ۔اَور وہاں بُھوکوں کو بسا دیتا ہَے۔ اَور وہ رہنے کے لئے شہر بناتے ہَیں۔ ³⁷ ۔اَور کھیت بوتے اور تاکِستان لگاتے ہَیں۔ اَور اُن کی پیداوار حاصِل کرتے ہَیں۔ ³⁸ ۔اَور وہ اُنہیں برکت دیتا ہَے اَور وہ بُہت بڑھ جاتے ہَیں۔ اَور وہ اُنہیں بکثرت مواشی بخشتا ہَے۔ ³⁹ ۔تب وہ غم اَور مُصِیبت کی شِدّت سے۔ گھٹ جاتے اَور پست ہو جاتے ہَیں۔ ⁴⁰ ۔لیکن جو اُمراء پر ذِلّت اُنڈیلتا ہَے۔ اَور بے راہ وِیرانے میں اُنہیں بھٹکاتا ہَے۔ ⁴¹ ۔وہ مِسکین کو اَفلاس میں سے اُٹھا لیتا ہَے۔ اَور گھرانوں کو بھیڑوں کے گلّوں کی مانند بڑھاتا ہَے۔ ⁴² ۔پس راست دِل دیکھ کر خُوش ہوتے ہَیں۔ اَور ہر ایک بَدی اپنا مُنہ بند کرتی ہَے۔ ⁴³ ۔کون دانا ہَے جو اِن باتوں پر غور وخوض کرے۔ اَور خُداوند کی رحمتوں کو خُوب سمجھ لے؟