¹ ۔ خُداوند کا شُکر کرو۔ اُس کے نام کو پُکارو۔ قوموں میں اُس کے کاموں کا بیان کرو۔ ² ۔اُس کا گیت گاؤ۔ اُس کی حمد سُناؤ۔ اُس کے تمام عجائبات کا چرچا کرو۔ ³ ۔اُس کے قُدّوس نام پر فخر کرو۔ خُداوند کے طالبِوں کے دِل شادمان ہوں۔ ⁴ ۔خُداوند اَور اُس کی قُوّت کو طلب کرو۔ ہر وقت اُس کے چہرے کی تلاش کرو۔ ⁵ ۔اُس نے جو عجائبات کِئے ہَیں اُنہیں یاد رکھّو۔ اَور اُس کے کرشموں اَور اُس کے مُنہ کی قَضاؤں کوبھی۔ ⁶ ۔اَے اُس کے بندے اِبراہام کی نسل۔ اَے اُس کے برگُزیدے یَعقُوبؔ کی اولاد۔ ⁷ ۔ وہی خُداوند ہمارا خُدا ہَے۔ تمام زمین پر اُس کے احکام مُروّج ہَیں۔ ⁸ ۔وہ ابد تک اپنے عہد کو یاد رکھتا ہَے۔ یعنی اُس کلام کو جو اُس نے ہزار پُشتوں کے لئے فرمایا ہَے۔ ⁹ ۔ وہ عہد جو اُس نے ابرہام کے ساتھ باندھا۔ وہ قَسم جو اُس نے اضؔحاق سے کھائی۔ ¹⁰ ۔جو اُس نے یَعقُوبؔ کے لئے آئین۔ اَور اِسرؔائیل کے لئے عہد ِ اَبدی ٹھہرایا۔ ¹¹ ۔جب کہا کہ مَیں مُلکِ کِنعاؔن تُجھے دُوں گا۔ تاکہ تُمہاری مِیرَاث کا حِصّہ ہو۔ ¹² ۔ جس وقت وہ شُمار میں تھوڑے۔ بلکہ بُہت ہی تھوڑے تھے۔ اَور اُس مُلک میں پردیسی تھے۔ ¹³ ۔جب وہ ایک قوم سے دُوسری قوم میں۔ اور ایک مَملُکَت سے دُوسری مَملُکَت میں پھِرتے تھے۔ ¹⁴ ۔تو اُس نے کِسی شخص کو اُن پر ظُلم کرنے نہ دِیا۔ بلکہ اُن کی خاطِر اُس نے بادشاہوں کو دھمکایا۔ ¹⁵ ۔کہ''ؔمیرے ممسُوحوں کو ہاتھ نہ لگاؤ۔ اَور میرے انبِیاء کو کوئی نُقصان پُہنچاؤ" ¹⁶ ۔اَور اُس نے زمین پر قحط نازِل فرمایا۔ اور روٹی کا سہارا بِالکُل توڑ ڈالا۔ ¹⁷ ۔اُس نے اُن سے پہلے ایک آدمی کو بھیجا تھا۔ یعنی یُوسؔف کو جو غُلامی میں بیچا گیا۔ ¹⁸ ۔اُنہوں نے اُس کے پاؤں کو بیڑیوں سے باندھا۔ اُس کی گردن لوہے سے جکڑی رہی۔ ¹⁹ ۔جب تک اُس کا سُخن پُورا نہ ہُؤا۔ خُداوند کا کلام اُسے آزماتا رہا۔ ²⁰ ۔بادشاہ نے حُکم بھیج کر اُسے رِہائی دی۔ اقوام کے حُکمران نے اُسے آزاد کِیا۔ ²¹ ۔اُس نے اُسے اپنے گھر کا مُختار۔ اور اَپنی ساری مِلکیّت پر حاکِم ٹھہرایا۔ ²² ۔تاکہ اپنے اِرادے کے مُطابِق اُس کے اُمراء کو تربیت دِلائے۔ اَور اُس کے بزُرگوں کو حِکمَت سِکھائے۔ ²³ ۔پس۔ اِسرؔائیل مِصؔر میں داخِل ہُؤا۔ اَور یَعقُوبؔ مُلک ِ حاؔم میں مُسافِر رہا۔ ²⁴ ۔اور اُس نے اپنی اُمّت کو نہایت بڑھایا۔ اَور اُنہیں اُس کے مُخالفِوں سے زیادہ قَوی کِیا۔ ²⁵ ۔اُس نے اُن کے دِل کو برگشتہ کِیا کہ اُس کی اُمّت سے نفرت کریں ۔ اَور اُس کے بندوں سے دغا بازی کریں۔ ²⁶ ۔اُس نے اپنے بندے مُوسؔیٰ کو بھیجا۔ اَور ہارُوؔن کو بھی جِسے اُس نے چُن لِیا تھا۔ ²⁷ ۔اُنہوں نے اُن کے درمیان معجزات کئے۔ اَور حاؔم کی سَرزمین میں عجائبات دِکھائے۔ ²⁸ ۔اُس نے تارِیکی بھیجی تو اندھیرا ہو گیا۔ پر اُنہوں نے اُس کے کلام سے خلاف ورزی کی۔ ²⁹ ۔اُس نے اُن کی ندیوں کو خُون بنا دِیا۔ اَور اُن کی مچھلیوں کو مار ڈالا۔ ³⁰ ۔اُس کے مُلک میں مینڈک بھر گئے۔ یہاں تک کہ اُن کے بادشاہوں کی چار دِیواری میں بھی آگئے۔ ³¹ ۔اُس نے حُکم فرمایا تو مکھّیوں کے غول آ گئے۔ اَور اُن کی تمام حُدُود میں مچھّر پھیل گئے۔ ³² ۔اُس نے اُن پر بارِش کے بدلے اَولے برسائے۔ اُن کے تمام مُلک میں دَہکتی آگ نازِل کی۔ ³³ ۔اُس نے اُن کے تاکوں اَور اِنجیروں کو مارا۔ اُن کی حُدُود میں اُن کے درختوں کو توڑ ڈالا۔ ³⁴ ۔اُس نے حُکم فرمایا تو ٹِڈّیاں آگئیں۔ اَور مَلخ بھی جو شُمار سے باہر رہے۔ ³⁵ ۔وہ اُن کی زمین کی سب نباتات کو چَٹ کرگئے۔ اَور اُن کے کھیتوں کا پھَل کھا گئے۔ ³⁶ ۔اَور اُس نے اُن کے مُلک کے سب اُن پہلوٹھوں کو مارا۔ جو اُن کی پُوری شہزوری کے پہلے پھَل تھے۔ ³⁷ ۔اَور وہ اُنہیں چاندی اَور سونے کے ساتھ نِکال لایا۔ اَور اُن کے قبیلوں میں ایک بھی کمزور شخص نہ تھا۔ ³⁸ ۔مِصری اُن کے چلے جانے سے خُوش ہو گئے۔ کیونکہ اُن پر اُن کا خوف چھا گیا تھا۔ ³⁹ ۔اُس نے سائبان کے طور پر بادِل پھیلادِیا۔ اَور آگ دی جو رات بھر روشنی دے۔ ⁴⁰ ۔اُنہوں نے مانگا تو اُس نے بٹیر پُہنچائے۔ اَور آسمانی روٹی سے آسُودہ کِیا۔ ⁴¹ ۔اُس نے چٹان کو چِیرا تو پانی پھُوٹ نِکلا۔ اَور بیابان میں ندی کی طرح بہنے لگا۔ ⁴² ۔کیونکہ اُس نے اپنے اُس قُدُّوس قول کو یاد فرمایا۔ جواپنے بندے ابرہام سے کہا تھا۔ ⁴³ ۔وہ اپنی اُمّت کو شادمانی کے ساتھ۔ اور اپنے برگُزیدوں کو خُوش اِلحانی کے ساتھ نِکال لایا۔ ⁴⁴ ۔اُور اُس نے اُنہیں قوموں کے مُمالِک دِیئے۔ اَور وہ اُمّتوں کی محِنت کے پھَل پر قابِض ہوئے۔ ⁴⁵ ۔تاکہ وہ اُس کے قَوانِین پر عمل کریں۔ اَور اُس کی شریعت کو مانیں۔ ہلّلویاہ