[ازداؔؤد] ¹ ۔ اَے میری جان خُداوند کو مُبارَک کہہ۔ اَو ر جو کُچھ مُجھ میں ہَے اُس کے قُدّوس نام کو مُبارَک کہے۔ ² ۔اَے میری جان خُداوند کو مُبارَک کہہ۔ اَور اُس کی کِسی نعمت کو فراموش نہ کر۔ ³ ۔وہ تُجھے تیری تمام بَدیاں مُعاف کرتا ہَے۔ وہ تُجھے تیری تمام بیماریوں سے شِفا دیتا ہَے۔ ⁴ ۔وہ تیری زِندگی کو ہلاکت سے چُھڑاتا ہَے۔ وہ شفقت اور رحمت کا تاج تُجھ پر رکھتا ہَے۔ ⁵ ۔وہ تیری زِندگی کو اچھّی چیزوں سے آسوُدہ کرتا ہَے۔ تُو عُقاب کی مانند اَز سرِ نَو جوان ہوتا ہَے۔ ⁶ ۔خُداوند عدالت کا کام کرتا ہَے۔ اَور تمام مظلُوموں کے لئے اِنصاف کرتا ہَے۔ ⁷ ۔اُس نے اپنی راہیں مُوؔسیٰ کو۔ اَور اپنے کام بنی اِسرؔائیل کو دِکھائے ہَیں۔ ⁸ ۔خُداوند رحیم اَور مہربان ہَے۔ وہ قہر کرنے میں دھیما اَور نہایت شِفیق ہَے۔ ⁹ ۔وہ ہمیشہ کے لئے خفا نہ رہے گا۔ اَور نہ اَبد تک جھِڑکتا رہے گا۔ ¹⁰ ۔وہ ہمارے گُناہوں کے مُطابِق ہم سے سلُوک نہیں کرتا۔ اَور نہ ہمارے جرائم کے مُطابِق ہمیں بدلہ ہی دیتا ہَے۔ ¹¹ ۔کیونکہ جس قدر آسمان زمین سے بُلند ہَے۔ اُسی قدر اُس کی رحمت اُس سے ڈرنے والوں پر ہَے۔ ¹² ۔جس قدر مشرق مغرب سے دُور ہَے۔ وہ ہمارے گُناہ ہم سے اُتنی ہی دُور کر دیتا ہَے۔ ¹³ ۔جس طرح باپ اپنے بچّوں پر رحم کرتا ہَے۔ اُسی طرح خُداوند اپنے ڈرنے والوں پر رحم کرتا ہَے۔ ¹⁴ ۔کیونکہ وہ ہماری سرِشت کو جانتا ہَے۔ اُسے یاد رہتا ہَے کہ ہم خاک ہَیں۔ ¹⁵ ۔اِنسان کے ایّام گھاس کی مانند ہَیں۔ وہ میدان کے پھُول کی طرح کِھلتا ہَے۔ ¹⁶ ۔جُونہی ہَوا اُس پر چلتی ہَے وہ غائب ہو جاتا ہَے اَور اُس کا مقام اُس سے پھِر واقِف نہیں ہوتا۔ ¹⁷ ۔لیکن خُداوند کی رحمت اُس سے ڈرنے والوں پر ۔ اَزل سے اَبد تک ہَے۔ اَور اُس کا عدل نسل در نسل کے لئے ہَے۔ ¹⁸ ۔یعنی اُن کے لئے جو اُس کے عہد کے پابند ہوتے ہَیں۔ اَور اُس کے قواعد پر عمل کرنا یاد رکھتے ہَیں۔ ¹⁹ ۔خُداوند نے اپنا تخت آسمان میں نَصب کِیا ہَے۔ اَور اُس کی بادشاہی سب پر مُسِلّط ہَے۔ ²⁰ ۔خُداوند کو مُبارَک کہو۔ اَے اُس کے فِرشتو۔ جو قُوّت میں زور آور ہو۔ اَور اُس کے کلام کی آواز سُن کر اُس کی بات پر عمل کرتے ہو۔ ²¹ ۔خُداوند کو مُبارَک کہو۔ اَے اُس کے تمام لشکرو۔ جو اُس کے خادِم ہو اَور اُس کی مرضی بجا لاتے ہو۔ ²² ۔خُداوند کو مُبارَک کہو۔ اَے اُس کی تمام مخلوقات اَے میری جان اُس کی حُکومت کے ہر مقام میں۔ خُداوند کو مُبارَک کہہ۔