¹ Entón Iahveh díxolle a Moisés: Olla, eu fágote coma Deus para Faraón, e teu irmán Aarón será o teu profeta. ² Ti falarás todo o que che eu mande, e Aarón teu irmán falaralle a Faraón, para que deixe saír da súa terra aos fillos de Israel. ³ Pero eu endurecerei o corazón de Faraón para multiplicar os meus sinais e os meus prodixios na terra de Exipto. ⁴ E Faraón non vos escoitará; entón porei a miña man sobre Exipto e tirarei da terra de Exipto os meus exércitos, o meu pobo os fillos de Israel, con grandes castigos. ⁵ E saberán os exipcios que eu son Iahveh, cando eu estenda a miña man sobre Exipto e tire de en medio deles os fillos de Israel. ⁶ E fixeron Moisés e Aarón coma Iahveh lles mandou; así o fixeron. ⁷ Moisés tiña oitenta anos e Aarón oitenta e tres cando falaron a Faraón. ⁸ E faloulles Iahveh a Moisés e a Aarón, dicindo: ⁹ Cando vos fale Faraón, e diga: “Facede unha milagre”, entón diraslle a Aarón: “Colle a túa vara e bótaa diante de Faraón para que se converta en serpe.” ¹⁰ Viñeron, pois, Moisés e Aarón a Faraón e fixeron tal coma Iahveh lles mandara; e Aarón botou a súa vara diante de Faraón e dos seus servos, e esta converteuse en serpe. ¹¹ Entón Faraón chamou tamén os sabios e os feiticeiros, e tamén eles, os magos de Exipto, fixeron o mesmo cos seus encantamentos; ¹² pois cada un botou a súa vara, as cales se converteron en serpes. Pero a vara de Aarón devorou as varas deles. ¹³ Pero o corazón de Faraón endureceuse e non os escoitou, tal coma Iahveh dixera. ¹⁴ Entón Iahveh díxolle a Moisés: O corazón de Faraón é teimudo; négase deixar marchar ao pobo. ¹⁵ Preséntate a Faraón pola mañá cando vaia ao río, e ponte na beira do Nilo para te atopares con el; e colle na túa man a vara que se converteu en serpe. ¹⁶ E dille: “Iahveh, o Deus dos hebreos, envioume a ti, dicindo: ‘Deixa marchar ao meu pobo para que me sirva no deserto. Mais velaí, ata agora non escoitaches.’ ¹⁷ Así di Iahveh: ‘Nisto coñecerás que eu son Iahveh; velaí, eu golpearei coa vara que está na miña man as augas que están no Nilo, e converteranse en sangue. ¹⁸ E os peixes que hai no Nilo morrerán, e o río corromperase e os exipcios terán noxo de beberen a auga do Nilo.’” ¹⁹ E Iahveh díxolle a Moisés: Dille a Aarón: “Colle a túa vara e estende a túa man sobre as augas de Exipto, sobre os seus ríos, sobre os seus regatos, sobre os seus estanques e sobre tódolos seu depósitos de auga, para que se convertan en sangue; e haberá sangue por toda a terra de Exipto, tanto nas vasillas de pau coma nas de pedra.” ²⁰ Así o fixeron Moisés e Aarón, tal coma Iahveh lles ordenara. E alzou Aarón a vara e golpeou as augas que había no Nilo ante os ollos de Faraón e dos seus servos, e tódalas augas que había no Nilo convertéronse en sangue. ²¹ E os peixes que había no Nilo morreron e o río corrompeuse, de xeito que os exipcios non podían beber auga do Nilo. E había sangue por toda a terra de Exipto. ²² Pero os magos de Exipto fixeron o mesmo cos seus encantamentos; e o corazón de Faraón endureceuse e non os escoitou, tal coma Iahveh dixera. ²³ Entón volveuse Faraón e entrou no seu pazo, sen facer caso tampouco disto. ²⁴ E tódolos exipcios cavaron nos arredores do Nilo na procura de auga para beberen, porque non podían beber das augas do Nilo. ²⁵ E pasaron sete días despois de que Iahveh ferise ao Nilo.