¹ Ndjamuene muna mpanga avatula cithivukutho cakulivanga keho tuje tuthivukitho tutanu natuvali, ndjathivukile umo uavaje vikaxama vauana vakuyoya vahandekele nalijui lia kufua ngohoni cindindimo nguendi, ''Indja!" ² Ndjamuene kuakele kakambe uakutoka. Uje ualondeleho uakuatele vuta vualunguxa, vamuhanene cilongo. Ua katukile ngohoni muka kuhiana aya mukuhiana. ³ Vuno muna mpanga uavatuile kathivukitho kamucivali, ndjathivukile cikaxama uakuyoya uamucivali uahandekele nguendi, "Indja!" ⁴ Kakambe mukuavo lalo uatuhukile uapuile uakuvenga. Uje ualondeleho vamuhanene ndthzili yakuneha ndthzita hano hanthsi, ngeci vantu valithsihe umo namukuavo. Vamuhanene mpoko yakama yamukuale. ⁵ Vuno muna mpanga uavatuile lalo cithivukitho camucitatu, ndjathivukile cikaxama uakuyoya uamucitatu ahandeka nguendi, "Indja!" Ndjamuene kuje kuakele kakambe uakuthivala uje ualondeleho uakuatele cipetheletho mulivoko liendi. ⁶ Ndjathivukile lijui litunda mukati kavaje vikaxama vakuyoya vauana ngualio, "Cihele catileku inapu ngohoni fueto yalitangua lioxe lia mutuntu vunoni keti uvi hithe mathi navindju navimbongo viaPalata keti uvivihithe. ⁷ Muna mpanga uavatuile lalo cithivukitho camuciuana, ndjathivukile cikaxama uakuyoya uamuciuana ahandeka nguendi, "Indja." ⁸ Ndjamuene kuajombolokelele kakambe uakutokoloka. Uje ualondeleho vamulukile lithina nguavo kuthsa, vukalo vua vathsi vuamuxuamene munima. Vavahanene ndthzili yakama yamutambela umo uami tambela iuana yahano hanthsi, ngeci vavathsihe nampoko yamukuale, nandjala nakuthsa, natuthi tuakumuthenge tuahanthsi. ⁹ Vunoni munampanga uavatuile cithivukitho camucitanu, ndjamuene muithi liamutula miono yavaje vavathsihile omuo vambuluile lijui liaKalunga vapuile vakakuononoka muvukaleho vuavo. ¹⁰ Vatambekele nalijui liakama nguavo, "Xukulu kalunga muka ndthzili yoxe, uakujela navusunga, nthsimbu mukaco ukakala ngeci ukasompele vantu vahanthsinakuvathangametha movatuthsihile. ¹¹ Umo naumo uavo vavahanene cikovelo cakutoka, vavalekele ngecije vahuime kanthsimbu lika nakuhuimitha noho nomola yoxe yavavuxoko vuavo navavuthamba vuavo vana vathsihi ngohoni movathsihile vakevo... ¹² Ndjamuene muna mpanga avatula cithivukitho vamucitanu nacimo, tala kuakele mandunduma akama navua navua. Litangua liathivalele ngohoni cikeleya cakuthivala, ¹³ Vintanga ntanga viauililile hanthsi kutunda kuilu, ngohoni vuxuka vuamukuyu vuavuvixu vulundumukila hanthsi kutunda kuciti omo mpundthzi. ¹⁴ Lilu liatundile ngohoni livulu liakuthenga valinakulithengela hamo. Mikinia yoxe naminkundu yoxe vavitundithile kumihela yavio. ¹⁵ Vimiene viahano hanthsi navakakusuana navakuluntu vanthzita, vakakufuka navakanthzili, navantu voxe veka lalo, vindungo nava keti vindungo, vavandele muvina namumavue namuinthi liamavue amikinia. ¹⁶ Vathanene mikinia namavue nguavo, "Indjeni mutuuile nakutufuika kutunda kumexo auje natumama kucituamo nakuvukalu vuamuna mpanga. ¹⁷ Omuo litangua liakama liavukalu linahete. Iya akatha kuimana?"