¹ Munima yevi ndjamuene tungelu vauana vanemana kuthimbango thiuana thiahano hanthsi, vemikile mpundthzi muvimbango viuana ngeci keti luhuue hanthsi nambe hamema aKalunga, nambe kunkala muti. ² Ndjamuene kangelu mukuavo atundilila kukutuhuka calitangua, nacithivukitho caKalunga uakuyoya. Uatambekele nalijui liakama kuli vaje tungelu vauana vaje Kalunga vahanene ndthzili yakuvihitha hanthsi namema aKalunga: ³ ''Keti uvihithe hanthsi, nambe mema aKalunga, nambe viti noho tunahaka vithivukitho viaKalunga hamaluholo ava ngamba vendi." ⁴ Vandjilekele ngeci vuingi vuavaje vavahakele cithivukitho: cakasatetho caKalunga hamaholo avo vapuile 144.000 vatundile kumiyati likumi naivali yavana vaIsaleli: ⁵ Muyati uavaYunda vaje vavahakele cithivukutho vapuile 12.000 muyati ualuvene vaje vavahakele cithivukutho vapuile 12.000, muyati uangande vaje vavahakele cithivukitho vapuile 12.000, Muyati uaAshele vaje vavahakele cithivukitho vapuile ⁶ 12.000 muyati uaNafetali vaje vavahakele cithivukitho vapuile 12.000 muyati uaManathe vaje vavahakele cithivukitho vapuile 12.000, ⁷ 12.000 yakumuyati uaSimioni, 12.000 yakumuyati uaLevi, 12.000 yakumuyati uaIsakale, ⁸ 12.000 yakumuyati uaZemboloni, 12.000 yakumuyati uaMbendjemani, 12.000 yakumuyati uaYosefe. ⁹ Munima yevi ndjamuene mbunga yakama naumo uahi uathele kuvatanda vantu voxe vaje, vatundile kumiyati yoxe nakuvifuti vioxe nakuvantu voxe nakuvindaka vioxe, vemanene kulutue luacituamo nakulutue lua munampanga. Vathalele vuthalo vuakutoka vakuatele tunkoma mumavoko avo. ¹⁰ Vatambekele namajui akama nguavo: "Vuovole vuatunda kuli Kalunga ketu, uje natumama kucituamo, nakuli munampanga. ¹¹ Tengelu voxe vemanene kuthengeleka cituamo navakuluntu navaje vikaxama vauana vakuyoya, valiumbilile hanthsi kucituamo vihanga viavo valemethele Kalunga, ¹² vahandekele nguavo, "Eua! Kusangathala, vumpahu, mana,kuhandekela, kathingimiko, ndthzili, navukama viaKalunga ketu kumiaka yoxe! Amen!'' ¹³ Umo uavakuluntu uandjihuile nguendi, "Veya ava vanathala vithala viakutoka, kuiko vanatundu?'' ¹⁴ Ndjakumbuluile nguange, ''Muene, unathivuka,'' uahandekele kuli yange nguendi, ''Ava vakevo vantu vanatundu kulamba yakama. Vanakuxu vuthalo vuavo nakuvutoketha too mumaninga amuna mpanga. ¹⁵ Vemanene kulutue luacituamo caKalunga nakumupangela mutania vuthsiki mundjivo yendi. Uje natumama hacituamo aka vaniunga. ¹⁶ Vakevo kavathivuka lalo ndjala nambe lihuila. Lalo litangua nambe mpundthzi yantuima koi kavenieka lalo. ¹⁷ Muomu muna mpanga uje ali mukati kacituamo akapua kaniungi kavo, akavatuamenena kulutue luandundthzi yamema amuono, ndjambi aka vahunda mixothi yoxe kumexo avo..'''''