Kujombolola muhato 5
1
Ndjamuene livulu liakuthenga mulivoko liacilio lia uje uatumamene kucituamo lije livathona handja namukati, vali xokele nathivukitho tutanu natuvali.
2
Ndjamuene kangelo uandthzili uje uambuluile nakutambeka nalijui liakama nguendi, "Iya nafuila kuvatula cithivukitho nakufukula eli livulu?''
3
Vunoni naumo uahi uovauanene muilu nambe hanthsi nambe muinthsi lia hanthsi uakuatha kufukula lije livulu nakutala vili mukati.
4
Ndjalilile navua nakucukuka omo kovauanene umo uje nafuila kufukula livulu nambe kutalamo.
5
Mukuluntu umo uavaje vakuluntu uahandekele nange nguendi, "keti ulile. Tala! Ndumba uakutunda kumuyati uayunda, muthi uandaviti, ikeye nahiana. Ahatha kuvatula cithivukitho eci tutanu natuvali nakufukula eli livulu."
6
Mukuluntu ndjamuene muna mpanga nemana mukati kacituamo vaje vikaxama vauana navakuluntu . Ua jombolokele ngohoni uje yivanathsihi. Uakele navimbinga vitanu navivali namexo atanu naavali, evi vinapu mithithimba itanu naivali yakalunga ije yova tumine hanthsi hoxe.
7
Uakatukile nakunona lije livoko liacilio lia uje uatumamene hacituamo.
8
Omo ualingile ngacije, vaje vikaxama vauana navakuluntu makumi avali navauana valiumbilile kulutue liamuna mpanga. Umo kuumo vakuatele kalialia namalonga angolinde axulile nacihemba cakuthsimika, evi vikevio viapua kulomba kuavantu vakalunga.
9
Vembile muaso uauha nguavo: "Yove uafuila kuambata livulu nakuvatula cithivukitho cavio. Omuo vakuthile, hakuthsa kuove uakulile vantu namaninga ove kalunga, vakutunda kumiyati yoxe navindaka vioxe nakumafuti oxe nakuvantu voxe.
10
Unavapuitha vumuene vuavaka kukombelela mukupangela kalunga uetu, vakasuana hano hanthsi.''
11
Ange ndjamuene nakuvua lijui lia tungelu vavengi vengi vanathengeleka cituamo navikaxama vauana vakayoya navakuluntu.
12
Vembile namajui akutendeka nguavo, "Uafuila muna mpanga, uje yuvathsihile, kutambula ndthzili, vufuko, mana, vukama, kathingimiko, vumpahu nakuthumboka."
13
Ndjathivukile via kutanga vioxe vili muilu nahanthsi namuinthsi lia mavu namumema aKalunga nevi via kuyoya vioxe viahanthsi, vioxe viembile nguavio, "Kuli uje natumama hacituamo kuli muna mpanga kukale kuthumboka, nakathingimiko, navumpahu nandthzili kumiaka yoxe.
14
Vaje vikaxama vauana vakuyoya vakumbuluileko nguavo, "Eua!" Vaje vakuluntu valiumbilile hanthsi nakulemetha.