¹ Kuli kangelo uakucikungulukilo camuSalendisi thona nguove: 'Eli likelio lijui linatundu kuli uje ali namithithimba itanu na ivali navintongonosi vitanu navivali. ''Ndjinathivuka vije viuli nakulinga. Ndjinathivuka ngeci uli nalithina ngeci uli nakuyoya, vunoni unathsi laja. ² Ngacije vene imana koletha vije viuli navio nthsimbu kanda vicithililile vioxe, muomu ndjina uana ngecije vije viunalingi kanda vicipue via kutantuluka kumexo a Kalunga kange. ³ Ngacijevene, vuluka, vije vivakulongetha navije viua thivukile. Viononoke, nakutenguluka kuvupi vuove. Nga xove kunyangumuka, ndjikendja kuli yove ngue muithi, koukathivuka nthsimbu ika indjikendja kuliove. ⁴ Vunoni vamo veni vavandende muSalendesia vananiungu vuthalo vuavo kupua vuakuyela, vakenda hamo nange, nakuthala vuthalo vuakutoka, omuo vafuila kulinga ngacije. ⁵ Kuli vaje vahiana vakavathika vuthalo vuje vene vuakutoka, kundjikatunditha madthina avo mulivulu liamuono. Ndjikahandeka citona mexo kumexo atata nakumexo atungelo tuendi nguange avavanapu vange. ⁶ Kuli uje ali namatui, tolilila viuli nakuhandeka muthithimba kuvi kungulukilo.''' ⁷ Kuli kangelo uamucikungulukilo camu Filandelufiya soneka nguove: 'Eli likelio lijui liakutunda kuli umo uje uakuyela navusunga nakuata sapi ije yakundamene kuli Ndaviti, omo axokolola lipito naumo uahi ahatha kuli xoka, omo alixoka naumo uahi ahatha kuli xokolola. ⁸ '''Ndjinathivuka vije viuekulinga. Ndjinathivuka ngecije uli nandthzili yayindende una kavangeya vilongetha viange, unapu mukakuononoka kuliange, ndjina xokolola lipito kulutue liove uahiko umo uakulixoka.''' ⁹ Tolilila, ngohoni kumbunga ije yakundama kuli satana vakavixaki vaje valitumbula vakevo vavena nguavo vanapu vaYunda vunoni kati vakevo vakahandeka vixaki-Ndjikavalitha ngeci vakeje kuli yove nakuthsikama kumiandja yove, voxe vakathivuka ngeci nkuma ndjakuyongola. ¹⁰ Omo unaniungu lijui liange nakupua mukakuthimpa, lalo ndjikakuniunga kuthsimbu yatuyando tuje tuli nakuija hanthsi hoxe, nakuetheka vantu voxe vahano hanthsi. ¹¹ Ndjinakuindja vuathi vuathi niunga muacili vije viuli navio, ngeci kukale umo akundjeka cilongo cove cakutuvakana. ¹² Uje ahiana ndjika mupuitha ngundthzi mundjivo yakalunga. Nalumo luahi lalo akatuhukamo, ndjikathona hali ikeye lithina liaKalunga kange, nalithina lianganda yakalunga kange (ikeyo Jelusalema yayiha, ije ikaxuluka kutunda muilu kuli Kalunga kange), lalo ndjikathona hali ikeye lithina liange lialiha. ¹³ Nga uli namatui, tolilila vije viali nakuhandeka muthithimba kuvikungulukilo.'''' ¹⁴ Kuli kangelo uamucikungulukilo camu Laondisiya thona nguove: 'Eli likelio lijui linatundu kuli ame, mukaleho uakuononoka kuvusunga, ikeye nthina yaviuma vioxe vije viatangele Kalunga. ¹⁵ Ndjinathivuka vije viunalingi, ndjinathivuka ngacije yove kahi uuakuxaluka nambe uuakutontola. Tendjinayongola ngacije yove upue uuakuxaluka nambe uuakutontola! ¹⁶ Vunoni mouapua uuakuxaluka nambe uuakutontola ndjikakuxandja nakukujekula mukanua kange. ¹⁷ Muomu unahandeka nguove, 'Yange ndjinafuku ndjinapuithamo, vioxe ndjiyongola ndjili navio, vunoni yove kuuthivuka vuhutu, natuyando uli natuo, mukakuvindama uli navuthsi lalo ukapuputua. ¹⁸ Ngeci vene ndjikuhangula ngeci ulande olu kuliange, olu yakuyela, ngeci ufuke, lalo landa vuthalo vuakutoka uthale ufuike mixenga xenga yove muomu nthuama, lalo landa navihemba viamexo, kukuita kumexo ove linga umone. ¹⁹ Yange ndjivindika nakuthangametha vaje vondjayongola, ngecije vene, tengulukeni kuvupi vueni. ²⁰ Tala, ndjinemana kulipito nakungongola nga umo ovua lijui liange nakuxokolola lipito , ndjikakovela mundjivo yendi nakulia hamo nendi naikeye lalo akalia hamo nange ²¹ Kuli vaje vahiana ndjikavahana mpoko yakutumama hamo nange kucitumamo cange, ngohoni yange ndjahianene nakutumama muhiehi natata kucitumamo cendi. ²² Uje uoxe ali namatui, tolilila vije viali kuhandeka muthithimba kuvikungulukilo.'''''