¹ Kuli kangelo uakucikungulukilo caEfeso thona nguavo, eli likelio lijui liakutunda kuli yauje nakuata thintanga ntanga thitanu nathivali kuli voko liendi liacilio na muka kuenda ngana hakati kathindeya thitanu nathivali tha olu, ² ''Ndjinathivuka vije viunalingi, ndjinathivuka kufuitangana kuove nakuthimpa kuove, ndjinathivuka nguange vakuviha kouatha kukala navo, vunoni ove kuetheka vaje vali tumbula vaPostolo, vana jomboloka ngacije nkuma vanapu vakavixaki. ³ Ange ndjinathivuka kukoletha cove nomumounambata tuyando omo lithina liange, vunoni kouahonene. ⁴ Vunoni kuli cuma cimo ndjina linienge hali yove kauethi nakundjiyongola ngohoni muje moua ndjiyonguele hakulivanga. ⁵ Vuluka kuje kuuauile. Tenguluka vupi vuove nakulinga vije viua lingile hakulivanga. Nga xove kutenguluka kuvupi vuove, yange ndjindja kuli yove nakutunditha ndeya yove kumuhela uayo nga koutenguluka. ⁶ Vunoni eci uli naco: Una thindi vije viva nalingile va Nikolau, ngohoni muje mondji navithindi yange lalo. ⁷ Nga uli namatui, tolilila vije vialinakuhandeka muthithimba kuvikungulukilo. Kuli vaje vandjana ndjika vahana mpoko yakulia kuvuxuka vuamuti ua muono, uje uli mulihia liaKalunga.''' ⁸ Kuli kangelo thona nguove, eli likelio lijui linatundu kuli uje uakulivanga nakukotokela, uje uathsile lalo uayoyele: ⁹ ''Ndjinathivuka tuyando tuove ndjinathivuka ngecije yove una pu ucihutu, vunoni muvusunga unapu muka kufuka. ndjinathivuka kuxaula vaje valitumbula nguavo vanapu vayunda, vunoni keti vakevo. Vakevo vapua vakambunga yakukundama kuli satana. ¹⁰ Keti uteue vietheko evi vikuuana, tala, satana ahaka vakueni vamo mukamenga linga vamietheke, tuyando tueni tukapua tuamatangua likumi. Ngecije vene pua mukakuononoka kuliange noho kukuthsa, keho ndjika kuhana cilongo camuono. ¹¹ Nga uli namatui, tolilila vije vialinakuhandeka muthithimba kuvikungulukilo kuli vaje vahiana. Kuthsa kuamucivali kuci kavavulumuna.''' ¹² ''Kuli kangelo nakucikungulukilo camu Pelenga thona nguove: 'Eli likelio lijui liatundu kuli uje ali nampoko yamukuale yavutuethi kuvali: ¹³ ''Ndjinathivuka kuje kuuakala, kuje kuakala citumamo caSatana. Yove unapu mukavuxunga kuli yange. Kouombilile kuti kuthelela kuli yange, nakuthelela eci uandjithelela yange kaualivianene, nambe hamatangua Antipa mukaleho uange uakuononoka vamuthsihilile kuje vene kuakala satana. ¹⁴ Vunoni kuli viuma viavindende ndjalinienga kuli yove: Kuvali vamo hakati keni vaje vacikavangeya kulongetha kuaMbalame, uje ualongethele Mbalake kutuamenena vana vaIsaleli kulinga vupi nakuvathindiya kulia viakulia vije vana kombeleya kulia lutumponia nakulinga vupangala. ¹⁵ Mungila ije vene, yove lalo hakati kove cili vantu vaje vali nakukavangeya kulongetha kua Nikolau. ¹⁶ Tenguluka kuvupi vuove, ngaxove, ndjili nakuija vuathi kuli yove, nakuluitha vantu vaje namukuale uakutunda mukanua kange. ¹⁷ Nga uli namatui, tolilila vije viali nakuhandeka muthithimba kuvikungulukilo. Ndjikavahana mana akuxueka, lalo ndjikavahana umo ku umo uavo livue liakutoka lije vanathona lithina lialiha lije naumo uahi alithivuka, kuvanga vavena uje ali tambula.''' ¹⁸ Kuli kangelo uamucikungulukilo camu Tatila thona nguove: 'Eli likelio lijui linatundu kuli muna Kalunga uje ali namexo akuviathima ngohoni mulengi uatuhia uje ali namexo akutuila ceke ngohoni vunengu vuakukuita mufuitilo: ¹⁹ ''Ndjinathivuka vije viu nakulinga: ndjinathivuka cilemo cove nakuononoka kuove navipanga viove nalukakatela luove. Ndjinathivuka ngacije mualolo uli nakulinga muacili navua navua kutuvakana muje ualingile hakulivanga. ²⁰ Vunoni hali cimo cindja nienga hali yove: Unecela mukentu uje Jezevele, uje akulitumbula ikeye vavena nguendi kapolofeto uakalunga. Kulongetha kuendi kuli nakutuamenena vangamba vange kulinga vupangala nakulia viakulia viakukombelela kutumponia. ²¹ Ndjinamuhana nthsimbu ngacije atenguluke kuvupi vuendi, vunoni ikeye kayongola kutenguluka kuvupangala vuendi. ²² Ndjikamumbila kumuhela navaje valingile nendi vupangala nendi vakayanda muakama, vunoni ndjikalinga eci kuvanga vatenguluke nakutunda kuviuma viakuvihia vije viva lingile nendi. ²³ Lalo ndjikathsiha vaje vakakumukava , keho vimbunga vioxe vikathivuka ngacije nkuma yange uje ndjithivuka viyongola viavantu navithango viavo. Ndjikafueta kumuntu kumuntu kupuitha kuvilinga viendi. ²⁴ Vunoni vuingi vueni muli muTatila komua kavangeyele vilongetha evi viakuvihia yeni komualilongethele vije vivanatumbula vakueni vavo nguavo, vaje kavathivuka viuma viakulova viaSatana-kundjikamituika citeli ceka lalo.' ²⁵ Vunoni vije vimuli navio, vikakateleni noho ndjikendja. ²⁶ Kuli vaje vahatha vaje valinga vije vindjiyongola nohohakukotoka, ndjika vahana mpoko kuvakua vifuti. ²⁷ 'Vakavathika namulamu uavutale nakuvatavothola ngohoni vivala vala ngohoni ndeho yavuma ngue yange ndjatambuile ndthzili kuli tata. ²⁸ Lalo ndjikamuhana litota. ²⁹ Nga uli namatui tolilila viali kuhandeka muthithimba kuvikungulukilo.'''