¹ Keho ange njamuene lilu na hathzi via viha, ngoco lilu lia mbangelo na hathzi hambangelo vina hiti vinai, na meme akalunga ahikona. ² Ange njamuene limbo liakujela, Yelusalema ya iha, ayo yaxelelele kutuhuka muilu kutunda kuli kalunga, vana ivuaetha ngue mukentu ivahana kuli ixamunendi. ³ Ange njovuile lijui liakama litunda kumangu ngualio, "Talenu! Muhela uakala Kalunga uli hamo navantu, endi na akakala navo. Avo vakapua vantu vendi, na Kalunga vavenha akakala navo nendi akapua Kalunga kavo. ⁴ Endi akathikumuna mixothi kuitunditha kumexo avo, akuona kuku kakala na kuthza, nambe kulinhenga, nambe kulila, nambe kuvavala. Via kupanga vioxe vina hiti vinai. ⁵ Uje watumamene ha mangu nguendi, "Talenu! Ange nji panga viuma vioxe viaviha." Uahandekele nguendi "Soneka evi vioxe mukonda majui aa avucili a kusungama." ⁶ Endi uahandekele nange nguendi, "Viuma evi vinahu! Ange nji Alfa na Omega, vuxangumukilo na vumanunthuilo, Kuli you ali na lihuila njika muhana kunua keci kuandando mema a muono kumuta. ⁷ Ou a tuvakana akahinga viuma evi vioxe, Ange na njikapua Kalunga kendi, nendi akapua munange. ⁸ Vunohoni ngue ku vaka liova, na vaje kuvathzilielele nava kakuvihilila, na vaka kuthziha, nava kavukuithi, na vilonthi, na vaka mahamba, na vaka vixaki voxe, muhela uavo ukapua cixali ca tuhia cakuxuama nafofo. Eci cikeco kuthza camucivali. ⁹ Umo uavaje tungelo vatanu navavali uethile kuli yange, uje uakele na malonga atanu na avali akuxula na tuyando tutanu na tuvali tuaku manethela, nendi ua handekele nguendi, "Ija kuno. Leketha vulo, mukentu ua muna injui." ¹⁰ Keho endi ua njikakuile mucithithimbi kunjituala ku mukinya uakama uakulaha na kunjileketha limbo liakujela Yelusalema ixelela kutunda muilu kuli Kalunga. ¹¹ Yelusalema yakele navumpau vua Kalunga, ya viathimine ngue livue lia kuvuaha muakama kama, ngue livue lia kilistale yakukuxa lia Yasepe. ¹² Ayo yakele na civumbe cakama ca kulaha cakele na vikolo likumi na vivali natungelo likumi na vavali kuvikolo. Havikolo vathoneneho madthina amixovo likumi na ivali ya vana vaIsaleli. ¹³ Kuvukilo kuakele vikolo vitatu, kunolote vikuolo vitatu, kusulu vikolo vitatu, na kuvutokelo vikolo vitatu. ¹⁴ Civumbe ca limbo cakele na maluvula likumi na avali, hali yavio vana thonoho mathona avaPostolu likumi nava vali va muna injui. ¹⁵ Umo uahandekele nange uakele na cetheketho ca lihona lia olu mukutheka limbo, vikolo vialio na vivumbe vialio. ¹⁶ Ngoco mbongi va yalele mu cetheketho. Muvulaha vuayo yapuile mumolika na muvuihi. Endi uethekele mbongi na cetheketho ca lihongo, Visitandiu makulukathi likumi na vivali muvulahe (muvulaha vuayo, na muvuihi, na muvutuntuke vuapuile mumo lika.) ¹⁷ Endi lalo uethekele civumbe cayo. Cihita ca vitavu na vitavu makumi auana na viuana via kuthika na vietheketho ca muntu (cije ca na cetheketho ca kangelu). ¹⁸ Civumbe va citungile na Yasepe na mbongi vaitungile na Olu ya kujela ngue makende akukuxa. ¹⁹ Ngoco na luvula valu talikile na nkala muxovo ualivue lia kuvuaha. Lia mbongi liakele lia Yasepe, liamucivali lia Safila, liamucitatu lia Kalesendinia, lia muciuana lia Esemelanda. ²⁰ Lia mucitanu lia Salendoniu, liamucitanu nalimo lia Salenda, lia mucitanu na avali lia Kilisolita, lia mucitanu na atatu lia Mbelelu, lia mucitanu na auana Topasilu, lia mulikumi Kelisopalesu, lia mulikumi na limo Yasintu, lia mulikumi na avali Ametisita. ²¹ Vikolo likumi na vivali via puile via makayi; kunkala cikolo vacipanga mukuntutha likayo lia likalialio. Vitapalo via mbongi viakele via kujela via olu, ngue makende akuthanyoka. ²² Ange kunjamuene Tembele mumbongi, ngoco muenene Kalunga ua helu lia vioxena muna injui vakevo Tembele yayo. ²³ Mbongi kuya thselele litangua nambe ngonde linga vituilemo ceke mukonda vumpau vua Kalunga vua tuilililedmo ceke, na kandielu kamuo muna injui. ²⁴ Vifuti vikenda haceke ca mbongi. Vimiene via hanthi vaka neha vumpau vuavo ku yikeyo. ²⁵ Vikolo viayo kuva kavixoko mutana uoxe, Amuo na kumu kakala vitsiki vuahi. ²⁶ Avo vakaneha vumpau na kathingimiko va vifuti kuli ikeyo, ²⁷ Vunohoni nacimo cahi ca kujuala cikakovelelamo omuo, nambe naumo uahi ua vakakupanga via kuviha nambe via vixaki, Vunohoni vaje lika madthina avo vana athono mumukanda ua muono ua muna injui.