¹ Ange njovuile lijui lia kama-kama ku tundilila mutembele na ku kuania na tungelo vaje mutana na vavali, ''Yauye na kumbalumuina hanthi aje malonga mutanu na avali avukalu vua Kalunga.'' ² Kangelo uambangelo uaile uambalumuine lilonga liendi hanthi, mbandu ya kuviha yaikalu yethile ha vantu vaje vakele na cileketho ca kunthitu, novo valemethele cifua cendi. ³ Kangelo ua mucivali ua mbalumuine lilonga liendi mu Kalunga ndonga, ngue maninga amuntu natsi, na nkala viuma viakele na muono mu Kalunga-ndonga via tsile. ⁴ Kangelo ua mucitatu ua mbalumuine lilonga liendi mu vindonga na mumihava ya mita mema, na vikevio via himpukile maninga. ⁵ Ange njovuile kangelo ua mema nguendi, ''Yove u ua kuvuaha-umo ou aliko na ou uakeleko, umo uakulela-mukonda uahinthile viuma ovio. ⁶ Mukonda avo vambalumuine maninga avantu vakuakulela va Kalunga na vapolofeto, ua vahanene maninga vanue, vanafuilamo. ⁷ Ange njovuile vatala kuhandeka nguavo, ''Cili muene Kalunga mukandthili yoxe, Vipangula viove via cili kuhua via sunguma.'' ⁸ Keho kangelo uamuciuana uambalumuine lilonga liendi ha litangua, Luhua vali handene kutavethela kuuemeka vantu na tuhia. ⁹ Keho vantu vauemene na tuhia tua kama, luhua vaxauile lithina lia Kalunga, uje ali na ndhzili ya kutuyando tuno, kuvalangulukile nambe kumuxangaletha ikeye. ¹⁰ kuxuamako kangelo ua mucitanu uambalumuine lilonga liendi hacituamo ca kanthilu, na mithithi ya fuikile vumuene vuendi. Keho va thsakinine vindaka viavo mukonda lia kuvavala. ¹¹ Avo vaxuauile Kalunga ua muilu mukonda lia kuvavala na vimbandu viavo, Luhua vakevo nolo vene vavianene kulenguluka muvipanga viavo. ¹² Ku kangelo ua mucitanu naumo uambalumuine lilonga liendi mundonga yakama, Yufalate. Mema endi omine kulingila kuvuahetha ngila ya vimiene vaje vakatunda kuvukilo. ¹³ Ange njamuene vithithimbi vitatu via kujuala avio kuvitala ngue manjunda vija vituhuka mukanua ka mukithi, mukanthitu, na muli kapolofeto. ¹⁴ Ngoco avo vithithimbi via vindemone valinga vikomo va vimuetho. Avo vaile kucimene vahanthi hoxe mukuvakunguiya voxe hamolika kundhzita ha litangua lia kama lia Kalunga muka ndhzili yoxe. ¹⁵ (''Taleni ange njija ngue cithi! Avethuka ou avingila, keho anyunga vithala viendi kuteuetha kuenda mixenga-xenga keho vamona nxuama yendi.'') ¹⁶ Avo vavanehela mumolika kumuhela uje uvathona mucihevelu nguavo Alimangindo. ¹⁷ Keho kangelo uamucitanu navavali uambalumuinine lilonga liendi hampundhzi. Keho lijui liakama lia tuhukile mutembele lalo litunda kuntuama, ngualio, ''Vinahu!'' ¹⁸ Okuo kuakele muhiato uaceke, na cikumo, kutiavangana ca cithimo, na mandunduma akama a hanthi-mandunduma ahanthi akutuvakana nkala via jomboloka tunde hakela muntu hanthzi, kukekuo kuhama ca akele mandunduma. ¹⁹ Keho mbongi iye yakama yalihandele vimbaluvuila vitatu, na vifuti membo auile. Mukemuo Kalunga uavulukile katambakana Mbambilone yakama, lalo endi uahanene mbongi ije nganja ivaxulithile na vinyu kutunda kukunyengua vukalu vuendi. ²⁰ Kuakele nkudu yathimanganene na mikinya yaxa kuvaiuanene. ²¹ Mema acivue akama, kulema kupuitha matalentu anokele kutunda halilu helu lia vantu. Avo vaxauile Kalunga omo lia cipupu ca livue mukonda cipupu ca kama muamo.