¹ Munima jevi kuakele tjiuano tjimo tjakulia tjava Jundeja, keho Jesu ua kandukile kuJelusalema. ² MuJelusalema muhiehi natjikolo tjavampanga kutjili tjishali. MuHevelu vatjitumbula Mbetesenda, tjakele namatala tala atanu. ³ Mulievi muakothele mbunga javakakuvavala, tupuputa, vilema. Vakatukile vatumamene nekutupuka tjamema. ⁴ Moumu kangelo kamuene uashulukile thimbu kuthimbu mutjishali mukuthetetha mema. Keho uje ualivangele kukovela mumema akutheta, ua kangukile kuvuvethio vuakele navuo vuoshe. ⁵ Keho kuakele muntu umo okuo, ikeje uakele navuvethi vuendi makumi atatu amiaka na miaka itanu naitatu. ⁶ Omo Jesu uamu muene kujekuandandelele, keho uathivukile nguehoni nakele thimbu jakama. Uahandekele nendi nguendi, ove ujongola kukanguka ndi? ⁷ Muvethi ua mukuanjene nguendi, muene kanjethi namuntu uakundjikoveletha mutjishali omo mema atheta. Vunoni omo ange njinja, muntu ueka ashelela kulutue luange. ⁸ Jesu uamulekele nguendi, hinduka ambata muhela uove, keho enda. ⁹ Keho haje vene muntu uje uakangukile uambatele muhela uendi keho uendele. Keho litangua lia puile Sapalalo. ¹⁰ Ngotjo vene vaJundeja valekele uje jakanguithile, nguavo lelo Sapalalo. Keho katjitava kuambata muhela uove. ¹¹ Vunoni uavakuanjene nguendi uje uandjikanguithile, ikeje uandjilekele nguendi ambata muhela uove, keho enda. ¹² Vamuhuile nguavo, muntu muka uakulekele nguendi, ambata muhela uove , keho enda? ¹³ Vunoni uje ja kanguithile, kathivukile ija, moumu Jesu ualivangele kutundaho omo kuakele mbunga kumuhela uje. ¹⁴ Kulutue Jesu uamu uanene mutembele, keho uamulekele nguendi, tala, una kanguka. Ketji ulinge vupi lalo, kuteua tjuma njeka tjakuviha tjakutuvakana etji tjikaku uana. ¹⁵ Muntu uje uaile ualekele, vaJundeja nguendi Jesu ikeje uamukanguithile. ¹⁶ Keho mukemuo va Jundeja va jandethele Jesu, moumu ualingile viuma evi haSapalalo. ¹⁷ Vunoni uavakuanjene nguendi, tata apanga navuno nange ndjipanga. ¹⁸ Mukemuo va Jundeja va jonguele kumuthiha, moumu kavihithile Kalunga Ishe. Nakulipuitha vavena mumona Kalunga. ¹⁹ Ngotjo Jesu uakuanjene ko, uavalekele nguendi, tjili tjili ndjikumileka nguange, munendi kahatha kulinga nakamo kahi lika liendi. Vunoni vije via namono kuli Ishe vikevio via linga, moumu vioshe via linga ikeje. Vikevio vialikulinga munendi lalo mumolika. ²⁰ Moumu Ishe ajongola munendi, keho akamumuetha vipanga via kutuvakana evi, linga mukakomoke. ²¹ Moumu nguehoni Ishe uekushitula vathi, keho avahana moumu ngatjije vene munendi ahana mouno kuli uoshe jana jongola. ²² Moumu Ishe kapangula naumo uahi, vunoni nahan kupangula tjoshe kuli munendi. ²³ Linga voshe vakathingimike munendi, nguehoni vathingimika Ishe. Oukathingimika munendi kathingimikaIshe uje ua mutumine. ²⁴ Tjili tjili ndjikumileka nguange, ou ovuali juiliange, keho athelela kuli uje ua ndjitumine alina muono kauekuhua ua ja je. Kakamono tjihitho, vunoni natundu kukutha, nakovela mumuono. ²⁵ Tjili tjili ndjikumileka nguange, ola ikuinja novuno kuili, omo vathiva ko vua lijui lia muna Kalunga. Keho vaje vovua vaka joja. ²⁶ Moumu nguehoni Ishe alina muono muli vavena, ngatjije vene nahana kuli munendi lalo kukalana muono muli vavena. ²⁷ Keho namuhana nahilija kupangula muomu ikeje munamuntu. ²⁸ Ketji mukomoke etji, muomu ola ikuinja. Omo voshe vali muvihilo vakovua lijui liendi. ²⁹ Keho vakatuhuka mo vaje vanapanga via tjili kutjisangukilo tjamuono. Nava jevanapanga via ku viha, kutjisangukilo tjatjihitho. ³⁰ Likaliange kandjihatha nakamo kahi, nguehoni ndjuvua, ngatjije vene ndjipangula. Keho kupangula tjange tjakuvuaha, moumu kandjithetela tjithango tjange. Vunoni tjithango tjauje ua tjitumine. ³¹ Ngandjilia mbulula vukaleho vuange ketji vua vutjili. ³² Kuli uaje anjambulula vukaleho, keho ndjinathivuka nguehoni vukaleho vujevundjinambulula, vukevuo vua vusunga. ³³ Eni munatumu kuli Joano, keho ikeje nambulula vukaleho vua vusunga. Vunoni vukaleho vundjitambula, ketji vuamuntu. ³⁴ Vunoni ndjinahandeka ngatjije linga eni muovoke. ³⁵ Ikeje uapuile ndeja jakushukuma nakutua tjeke. Neni muatavele kuthimbuimo ku jolela mutjeke tjendi. ³⁶ Vunoni vukaleho vundjili navuo, kutuvakana vuje vua Joano, moumu vipanga vije tata nandjihana kuvilinga, vipanga vije vene vindjilinga vinjambulula kaleho. Nguehoni tata nandjitumu. ³⁷ Keho tata ua ndjitumine ikeje na njambulula vukaleho. Eni lijui liendi kandamuliuvue nahamohahi, nambe tjifua tjendi kanda mutjimone. ³⁸ Keho lijui liendi kalie kukala kala mulieni, moumu uje jatumine kamuamuthelele. ³⁹ Eni muli nakutanda tanda visoneka muomu muthinganjeka, nguehoni muli muono ua miaka joshe muvikevio, navikevio vinja mbulula vukaleho. ⁴⁰ Keho eni kamutava kuinja kuliange, linga mutambule muono. ⁴¹ Kandjitambula kushangala tjavantu. ⁴² Vunoni ndjimithivuka eni, kamuethi natjilemo tjaKalunga mulieni. ⁴³ Ndjine njamulithina liatata, keho eni kundjitambula kuahi. Ngaueka enja mulithina liendi vavena, ikeje Imutambula. ⁴⁴ Eni muhatha kuthelele vati, mutambula kuthumbangeja umo namukuavo. Keho kamuthetela kuthumboka tjije tjakutunda kuli Kalunga uje umolika. ⁴⁵ Ketjimuthinga njeke nguehoni angetji kamiambulula kuli Tata. Kuli umo mukakumiambuluila, ikeje Mosesa vene, uje imuthika mbunge. ⁴⁶ Moumu nga munamuthelela Mosesa, ngamunandjithelela nange, moumu ikeje uandjithonekele. ⁴⁷ Vunoni nga kamuthelela visoneka viendi, vati mukathelela mujui ange.