¹ Kuiko kue kutundilila muyoyo na vimpata mukati keni? Nkuma keti vie ku tunda ku mashungu eni eku miluitha mukati keni? ² Muyongola kukala naviuma, kumuethi navio. Munthiha na kuliveyela, vunoni ko muatha ku vi uana. Ko muatha kufuka muomu ku mue ku lomba. ³ Mue kulomba keho ku mue ku viuana muomu mue kulomba muvuhenge, linga muvi pangethe ku mashungu eni. ⁴ Eni vikuithi! Komu thivuka ngueni vuthamba vua lifuti vua pua chithindo kuli Kalunga? Mukemo uoshe uje a yongola kuli kuata vuthamba na lifuti na li puitha vavenia chitothi cha Kalunga. ⁵ Ndi mu thinganieka ngueni lithona lia mbulula vishaki, "Mpunthi ya tuhana ya kala na lifuua ndi"? ⁶ Vunoni ngothi ya hana Kalunga ya tuvakana navua, ngocho mathona ahandeka nguao "Kalunga a viana va ka vukama, vunoni ovuila ngothi va ka kulikehesa." ⁷ Lihaneni kuli Kalunga. Vianeni satana, na ikeye a ka mishondoloka. ⁸ Shueneni muhiehi na Kalunga, na ikeye aka kala muhiehi neni. Toketheni mavoko eni, eni va ka kuviha, toketheni thimbunge theni, eni vaka kuthinganieka koka. ⁹ Yonjueni, chukokeni na kulila! Vijolo vieni vipue kudhumua mba na kujanguluka kueni kupue vuthiua. ¹⁰ Likehetheni yeni vavenia kumesho a Kalunga keho ikeye aka mi jundula. ¹¹ Keti ku li kunia mua kuvihia umo na mukuavo, va vuthamba vange. Uoshe a fueya mukuavo ndi apangula mukuavo na paya lishiko na kuhitha lishiko. Nga upangula lishiko, ko ua puile muka ku panga via lishiko, vunoni una pu muka ku pangula. ¹² Umo lika muka ku hana lishiko na muka kupangula. Ikeye lika muka kuovola na ku vihitha. Yove iya, ove muka kupangula muka mahalembo uove? ¹³ Mualolo tolilila, eni mue ku kuania ngueni, "Lelo nambe yimene tuka ya muimbo liakama lia chingandi, tuka kale ko muaka, kupanga ndando na ku uana lukulu." ¹⁴ Iya nadhivuka vika vi ka jomboloka imene, mba vati uka fua muono uendi? Muomu muna pu fuka ya kuija ha nthimbu ya ihi mba na yithimangana. ¹⁵ Ngachije vene, muna pande kuhandeka ngueni "Nga nayongola Muene, tukala na muono na kupanga evi na vije." ¹⁶ Vunoni eni muli tuntula na kuli shangalela vutumbe vueni vua vukenia. Kulituntula kuoshe oku kua ku vihia. ¹⁷ Ngocho vene nga umo adhivuka kupanga vuchili vunoni keku vupanga, ikeye na lingi mulonga.