¹ Keho Kalunga ua vedhikithile Noa na vana vendi vavamala, na kuva leka, "Lithemeni, livuetheleleni, na ku shulitha lifuti. ² Tuthitu tuoshe tua hanthi otu tuli na muono, tudhila tua muilu, vuima vioshe via mulivu na vanthi voshe vali mu mema. Njina vi hana mu livoko liove. ³ Vioshe vije vi kende vili na muono vikapua viakulia viove, ngue vene munja ku hanene vishoka via ku tontola, ngechi nji ku hana viuma vioshe. ⁴ Vuno honi keti mulie nthitu ili na muono uayo_maninga ayo_mu ikeyo. ⁵ Vuno honi ha maninga eni, muono uje uli mu maninga eni, njike hula fueto. Ku mavoko a nkala kathitu nji kehula. Ku livoko lia nkala muntu, avio evi, ku livoko lia uje nathsihi mukuavo, njika mu fuetetha kumuono ua uje uana thsihi. ⁶ Uoshe a mbalumuna maninga a muntu, nendi lalo muntu a ka mbalumuna maninga endi, muomu muntu va mu panga mu chifua cha Kalunga. ⁷ Eni honi, lithemeni muli vuedhelele, li shandueleni mu lifuti na ku livuedhelela mulikelio. ⁸ Keho Kalunga ua kuaniene na Noa na vana vendi, nguendi, ⁹ "Ange, tolilileni! Njika haka kuliuvuathana hakati keni nange, na vana veni vakeja ko kunima yeni, ¹⁰ nevi vioshe vili na muono vili neni, na tudhila, vimuna, na tuthitu tuoshe tua hanthi tuli neni, kuli voshe va tuhukile mu vuato, ku tuthitu tuoshe hanthi tuli na muono. ¹¹ Hano nji hana ku liuvuathana neni,"nguange na litangua lalo liahi linji ka vihitha nthitu yoshe na mema a livazhi. Na litangua lalo liahi kuka kala livazhi lia kuvitha lifuti." ¹² Kalunga ua kuaniene, "Echi chikecho chileketho cha kulivuathana chi nji haka hakati kange neni na vioshe vili neni, via mishovo ikeja ko: ¹³ Njina haka nkongolo mu lishelua, keho ikakala chileketho cha kulivuathana hakati kange na lifuti." ¹⁴ Vika kala nguavo munji ka neha lishelua lia ku fuika hanthi na nkongolo va imona mu lishelua, ¹⁵ keho njika vuluka kuliuvuathana kuange, echi chili ha kati keni nange na viuma vioshe via kala na nthitu. Mema kuakakala lalo livazhi lia kuvihitha nthitu yoshe. ¹⁶ Nkongolo ika kala mu mashelua keho nji ka imona linga nji ka vuluke kuluivuathana kua ku kalelela ho ha kati ka Kalunga na vioshe vili na muono via nthitu vije vili hanthi." ¹⁷ Keho Kalunga ua kuaniene na Noa, "Echi chikechio chileketho cha kuliuvuathana chi nji na haka hakati kange na vioshe via nthitu vili hanthi." ¹⁸ Vana va Noa va tuhukile mu vuato vakevo Seme, Hame, na Yafete. Hame ua kele ishe ya Kanana. ¹⁹ Avo vatatu vakele vana va Noa, na muli yavo hanthsi hoshe ha shulile na vantu. ²⁰ Noa ua shangumukile kukala ndimi, ua limine lihia lia vinui. ²¹ Ua nuine ko tu vinui tumo keho ua pendele. Ua ndandele mu mbalaka yendi mishenga-shenga. ²² Keho Hame, ishe ya Kanana, ua muene mushenga-shenga ua ishe keho ua lekele ko va munaina. ²³ Keho Seme na Yafete va tambuile ntanga na ku ihaka ha vithsili viavo, keho vendele kathetanima vaka fuika ishe ua kele mishenga-shenga. Mesho avo va atalekethele kuako, kuteuetha kumona mushenga-shenga ua ishe. ²⁴ Mua hindukile Noa ku vinui, ua dhivukile via mu pangethele mona ua kanike. ²⁵ Keho ua kuania nguendi, "Kanana apue ua kuthinga. Apue ndungo ya vindungo via va munaina." ²⁶ Ua kuaniene lalo nguendi, "Yehova, Kalunga ua Seme, a vedhike, na Kanana apue ndungo yendi. ²⁷ Kalunga a hamethe livu lia Yafete na kumu tavethela ku tunga muvi mbalaka via Seme. Kanana apue ndungo yendi." ²⁸ Munima ya livadhi, Noa uovokele vihita vitatu via miaka na miaka makumi atanu. ²⁹ Matangua a Noa oshe kumo a puile vihita vitanu na viuana na makumi atanu, mukemo honi ua thsile.