¹ Kalunga ua vulukile Noa, na tuthitu tuoshe, na viuma vioshe via kele nendi mu vuato. Keho Kalunga ua lingithile mpunzhi, hanzhi hoshe., amba mema a shangumukile kushelela kamandende. ² Mavutuhukilo a muinthi, na vijanena via hanthi via li shokele, na kulikela kuhita. ³ Na mema a livazhi ayile kamandende-kamandende hanthi na kulikela kuhitisa mema matangua akupua 150. ⁴ Na vuato vua uanene kuhuima mungonde ya mu chitanu na vivali, mu matangua likumi na atanu na avili a ngonde ije vene, ha mikinia ya Alalahe. ⁵ Mema a tualele kulutue muku shelela noho mu ngonde ya mu likumi. Muli tangua lia kulivanga lia ngonde, vintshongo via kulivanga via mikinia via jombolokele. ⁶ Noho a hitile matangua aku pua makumi a uana mukemuo naua ua shokoluele vi janena via vuato vuje vua pangele. ⁷ Ua tumuneko likololo, keho likololo lia yile kuvimbango viuana noho mema omine hanthi. ⁸ Ua tumineko lalo livembe linga aka taleko nguavo mema a nomu hanthi, ⁹ vunoni livembe ka uanene ha huimina, mukemo ua hilukile kuli ikeye mu vuato, muomu mema nolo komine hanthi. Keho hani uoluele livoko liendi hanja, uamu nona uamu haka muvuato nendi. ¹⁰ Keho hani ua tumamene ko matangua atanu na avali mukemo lalo ua tumine livembe mu vuato. ¹¹ Livembe ua hilukile ku chinguezi. Tala! mu kanua kendi muli chimaho cha ku tukula cha chiha cha Olivela. Keho ua zhivukile nguavo mema ngechi anomu hanthi. ¹² Keho ua tumamenene ko lalo matangua atanu na avali, mukemo ua tumineko lalo livembe. Kahilukile ko naua kuli yendi. ¹³ Keho, cha kele muje mu vihita vitanu na chimo mu muaka ua kulivanga, na mungonde ya kulivanga, na mulitangua lia kulivanga mungonde, omo mema omine helu lia hanthi Noa ua noneneko chifuiko cha ku vuato, ua talele hanja, ua muene, ua talele, hanthi lia mavu ha nomu. ¹⁴ Kungonde ya kushuama ko, mu makumi avali na vitanu na avali mu litangua lia ku ngonde, hanthi homine. ¹⁵ Kalunga ua kuaniene na Noa, ¹⁶ "tuhuka janja lia vuato, yove, mukentu uove, na vana vove va vamala, na vakentu va vana vove kumo. ¹⁷ Tuhula yove viuma vioshe vili na muono vioshe vili na nthitu evi vili nove_tuthila, tuthitu, na vimbumbulu vioshe vie ku kalava hanthi_Linga vika litheme mua kama-kama hanthi, naku lilanetha, vali lanese hanthi." ¹⁸ Keho Noa ua tuhukile hanja na vana vendi vavamala, na mukentu uendi, na vakentu va vana vendi, kumo nendi. ¹⁹ Nkala chuma cha kupanga chili na muono, na vimbumbulu na tuthila tuoshe, na vioshe vije vie kuenda hanthi, muku tuala vushoko vuavo, vathile vuato. ²⁰ Noa ua tungile mutula kuli Yehova, ua nonene tuthitu tua kujela na tuthila tua kujela, na ku kombeleya ha mutula. ²¹ Yehova ue vuile kunika kua chili keho ua kunia mu mbunge yendi, "Ku nji ka vihitha naua hanthi muomu mana a muntu nambe ngocho vi thinganieka via mumbunge ya muntu via kuvihia kutunda mu vunike vuendi. Ku nji ka vihitha lalo vioshe vili na muono, ngue omu njina lingi. ²² Nthimbu oyo mavu ana thala, kuli nthimbu ya kukuna neyi ya kuyangula, kutontola na kutuima, nthimbu ya ndombo neyi ya lithika, mathsiki na mutania kuvi ka likele."