¹ Nahano hanthi hoshe va pangethele ndaka imo lika na majui akulifua. ² Avo vaile vungenthi kuvukilo, avo va uanene cana mu cifuti ca Shinale avo va tungile nakuje. ³ Avo vakuaniene umo kumukuavo,"Ijeni, tupangeni vindopi naku vioca vikole." Avo vakele na ndopi tenga livue na lilova via kutungitha. ⁴ Va kuaniene, "Ijeni tutunge etu vavenia mbongi na njivo ya laha nchongo yaco ikahete muilu, na kuliluka lizhina etu vavenia. Nga etu kutuvilingi, etu tuka lishandokela na kuvatakana hanthi hoshe." ⁵ Ngoco honi Yehova ua shelelele na kutala mbongi na ndjivo yakulaha ivatungile vana va Andama. ⁶ Yehova ua kuania nguendi, "Taleni, avo vantu vamo na ndaka ya kulifua, avo na vana shangumuka kupanga evi! Mualolo navimo viahi vika va kaluuila vakevo. ⁷ Ijeni, tuyeni tu shuluke naku ka tanganetha ndaka yavo kuje, linga vakevo keti va liuvue hakati kavo." ⁸ Ngoco honi Yehova ua va shanduele kutunda oho va vatakanene helu lia hanthi hoshe avo na valikelele kutunga mbongi yakama ije. ⁹ Mukemo honi, lizhina liayo vai lukile Mbambele, mukonda Yehova ua tanganethele ndaka yavo hanthi hoshe kutunda oho Yehova ua va shanduele nakuli janja hanthi hoshe. ¹⁰ Ava vakele vana va Seme. Seme ua kele na miaka cihita ku vukuluntu, endi na ua kele ishe ya Alefashandi ha miaka ivali kunima ya livazhi. ¹¹ Seme uakele namuono miaka vihita vitanu munima ya kukala ishe ya Alefashandi. Endi naua ua kele ishe ya vanike vakuavo vavamala nava vavakentu. ¹² Alefashandi omo muakele na miaka makumi atatu na itanu, endi ua kele ishe ya Selaha. ¹³ Alefashandi uakele na muono miaka 403 munima ya kukala ishe ya Selaha. Endi ua kele lalo ishe ya vanike vakuavo vavamala nava vavakentu. ¹⁴ Selaha omo muakele na miaka makumi atatu, endi uakele ishe ya Embele. ¹⁵ Selaha ua kele na muono miaka 403 munima ya kukala ishe ya Embele. Endi lalo ua kele ishe ya vanike vakuavo vavamala nava vavakentu. ¹⁶ Embele omu muakele na muono miaka makumi atatu-naiuana, endi uakele ishe ya Pelenge. ¹⁷ Embele ua kele na muono miaka 430 munima ya kukala ishe ya Pelenge. Endi lalo uakele ishe ya vanike vakuavo vavamala nava vavakentu. ¹⁸ Pelenge omo muakele na miaka makumi atatu, uakele ishe ya Leu. ¹⁹ Pelenge uakele na muomo miaka 209 munima yaku kala ishe ya Leu. Endi lalo uakele ishe ya vanike vakuavo vavamala nava vavakentu. ²⁰ Leu omu muakele na muono miaka makumi atatu-naivali, endi uakele ishe ya Selengu. ²¹ Leu uakele na muono miaka 207 munima yakukala ishe ya Selengu. Endi lalo uakele ishe ya vanike vakuavo vavamala nava vavakentu. ²² Selengu omu muakele na muono miaka makumi atatu, endi uakele ishe ya Nahole. ²³ Selengu ua kele na muono miaka vihita vivali munima ya ku kala ishe ya Nahole. Endi uakele lalo ishe ya vanike vakuavo vavamala nava vavakentu. ²⁴ Nahole uakele na muono miaka makumi avali-naitanu-naiuana, endi ua kele ishe ya Tela. ²⁵ Nahole uakele na muono miaka 119 munima yakukala ishe ya Tela. Endi lalo uakele ishe ya vanike vakuavo vavamala nava vavakentu. ²⁶ Tela munima ya kukala na miaka makumi atanu na avali, endi uakele ishe ya Avilama, Nahole na Halane. ²⁷ Nahano honi, eli likelio limo lia Tela. Tela uakele ishe ya ya Avilama, Nahole, na Halane na Halane uakele ishe ya Lote. ²⁸ Halane ua nthsile ha mesho a ishe Tela mulifuti muva muthemenene, mu Ule ya vakaLendeya. ²⁹ Avilama na Nahole vatambuile vakentu, lizhina lia mukentu ua Avilama liakele Salai na lizhina lia mukentu ua Nahole liakele Milekaha, muna Halane ua mukentu, ouo ua kele ishe ya Milekaha na Isekaha. ³⁰ Hano honi Salai uakele nchimi; kakele na munike. ³¹ Tela ua tambuile mona Avilama, Lote muna munendi ua mumala Halane, na vainamueno Salai mukentu ua mona Avilama, voshe vathile Ule ya vakaLendeya, na kuya mucifuti ca Kanana. Vuno honi avo vezhile ku Halana na kukala ko. ³² Tela uakele na muono miaka 205 keho honi ua nthsililile mu Halana.