¹ Keho Mbazalele na Oholiave na nkala muntu ua mutima ua mangana uye Yehova namu hana mutima ua mangana muku panga nkala vipanga mukutunga muhela ua kulela ua Kalunga, vapange ngue muye Yehova na shika. ² Mosesa ua thanene Mbazalele, Oholiave, na uoshe muntu ua mutima ua mangana uye athivuka nguendi Yehova na muhana mutima ua mangana, na uye uoshe mutima uendi una muthindiya linga endje na kupanga vipanga. ³ Vatambuile kutundilila kuli Mosesa uoshe mulambu uo vahanene va Isaleli linga vakevo vaku tungitheko muhela ua kulela. Kanda vantu vakele nakuhana mulambu uavo ua vuana kuli Mosesa nkala cimene ca lintangua, ⁴ Voshe vantu va mutima ua mangana va pangele muhela ua kulela va tundile ku vipanga via kulifua nevi vio va kupangele. ⁵ Keho vaka kutunga va lekele Mosesa nguavo, ''viova neha vantu via vingi kutuvakana viana tushika Yehova linga tuvi pange, '' ⁶ Keho Mosesa ua lekele vantu vamu limbo nguendi na umo uahi na aneha mulambu ua kutungitha muhela ua kulela. Keho vantu valikelele kuneha ma vuana avo. ⁷ Vakevo viye viova kele navio via hitakanene vye vio vatondele muku pangetha. ⁸ Vaka panga va pangele Tavenekulu na vintanga likumi via liniu ya kuotha muacili, ya kufua lilu, ya pulupula, na vuanda vua kuvenga na cifua ca Selumbini. Evi via puile vipanga via Mbazalele, vakevo vapuile va mutima ua mangana na vuino. ⁹ Mu kulaha ca nkala ntanga capuile vikuvitu makumi avali na vitanu na vitatu, mu vuihi dhikuvitu viuana. Vioshe vintanga viapuile hamo lika. ¹⁰ Mbazalele ua vuethelele vintanga vitanu kumo mutambela umo, na ku haka vintanaga vitanu ku mutambela ukuavo. ¹¹ Ua pangele vikongo via kufua lilu kunchongo ya handja ya ntanga yimo, na kupanga muyevene ku ntanga yikuavo ya mucivali. ¹² Ua pangele vikongo makumi atanu ku ntanga imo na vkongo makumi atanu kunchongo ya ntanga ya mucivali. vikongo ku mutambela ou na kumutambela ukuavo. ¹³ Keho ua pangele vikuatetho via Olu makumi atanu na ku kuata kumo lika thintanga thoshe linga tavenakulu yipue yimo lika. ¹⁴ Mbezalele ua tungile thintanga na maka a mpembe ya mbalaka kufuika helu lia tavenekulu; Ua pangele vintanga via kupua ku likumi na yimo. ¹⁵ Kulaha kua nkala ntanga dhikuvitu makumi atatu, na vuihi vua nkala ntanga dhikuvitu viuana. vioshe vintanga likumi na yimo via puile hamo lika. ¹⁶ Ua vandakanene vintanga vitanu kumo na vintanga vitanu na yimo kumo. ¹⁷ Ua pangele vikongo makumi atanu kunchongo ya vintanga via kulivanga, na makumi atanu a vikongo kunchongo ya vintanga via mu civali. ¹⁸ Mbezalele ua pangele vikuatetho via nkengelethi makumi atanu linga akuatetheko mbalaka yipue yimo lika. ¹⁹ Uapangelele Tavenekulu ca kufuika helu ca cikanda ca njui vana haka livala lia kuvenga, cifuiko cikuavo ca kuhaka helu liaco ca cikanda. ²⁰ Mbezalele ua pangele vivuliko via kuimana via citi ca Akasiya via tavenakulu. ²¹ Kulaha ca nkala civuliko ca puile vikuvitu likumi, na vuihi vua nkala civuliko capuile vikuvitu cimo na cimo caku tepa hakati. ²² Nkala civuliko ca kele na vimbambo vivali via citi ia kukuathe vivuliko via tavenakulu yoshe. ²³ Keho ua pangele tavenakulu mu njila eyi: makumi avali a vivuliko ku mutambela ua vuihi vua cifuti. ²⁴ Mbazalele ua pangele mathanda a nkengelethi akale kuinthi lia vivuliko makumi avali. Kuakele mathanda avali kuinthi lia chivuliko chino atoka kane vivuliko kumolika, na mathanda akuavo lalo kuinthi lia nkala vivuliko vikuavo mu kutokakana vivuliko vioshe ku molika. ²⁵ Ku mutambela uamu chivali ua tavenakulu, ku mutambela uamu vuhati vua cifuti, ua pangele vivuliko makumi avali. ²⁶ Na mathanda avio a kupua makumi auana a nkengelethi. Kuakele mathanda avali kuinthi lia civuliko cha kuhatako, vi lishuame muje vene. ²⁷ Kunima ya tevenakulu ku vutokelo, Mbezalele ua pangele vivuliko vitanu na cimo. ²⁸ Ikeye ua pangele vivuliko vivali via kunima ya vimbango vivali via tavenakulu. ^{29 30} Vivuliko evi vavi tepethele kuinthi liavio, vunoni via litokakanene helu via lithengelekele mumo lika. Ikeye ua vilingile munjila iye vene, muvimbango vivali. Vikevio via puile vivuliko vitanu na vitatu, kumo lika na mathanda avio a nkengelethi. Mathanda oshe ku a vandakana apuile likumi na atanu na limo, mathanda avali kinthi lia civuliko ca kulivanga, avali lalo kuinthi lia civuliko ca kuhatako, mukemuo vene via lishuamene. ³¹ Mbezalele ua pangele mavalo a citi ca mungongo atanu ku mutambela umo ua vivuliko via tavenakulu, ³² Mavalo atanu ku muatmbela ua ku nima ya tavenakulu ku vutokelo. ³³ Ikeye ua pangele mavalo mukati ka vivuliko, cikeco, ca vatakamene nakuheta kunchongo na kunchongo. ³⁴ Ikeye ua fuikile vivuliko na Olu. Ikeye ua pangele vikuatetho viayo via Olu, vipue vikuatetho ku mavalo, na yikeye ua fuikile mavalo na Olu. ³⁵ Mbezalele ua pangele ntanga ya kuvunduluka, na kuvenguluka, na maka akuthivuluka, yakuvuaha ya kutonga mua cili, na cifua ca va selumbinu. Vianga via muntu muka vuino mu vipanga. ³⁶ Ikeye ua pangele ku vintanga vingundhi viuana via mavaya a muthu, na ikeye ua vifukuile na Olu. Ikeye lalo napangelele tu lovo tua Olu ku vingunthi, Ikeye uombilileko mathandaa uana a palata. ³⁷ Ikeye ua pangele cifuiko ca ku cikolo ca ku mbalaka. ua vipangele na kuvunduluka, kuvenguluka, maka aku thivuluka, va pangethele ntanga ya kuvuaha ya kukotongola vuino, vipanga via mu kakutonga na vuana muku shovathana mavala. ³⁸ Ikeye ua pangelele vifuiko vitanu ku vingudhi na tulovo. Ikeye uafuikile helu liavo na mampanda avio atanu va apangethele na nkengelethi.