¹ Yehova ua lekele Mosesa nguendi, '' Shonga mavue avali ngue aje ambangelo, aje o ua tavuile. ² Livuahethele ku cimene an kulonda ku mukinia ua sinayi, na ku ka lijombolola kuli yange helu lia mukinia. ³ Kati u kejeko na muntu umo. Keci ukethelele muntu aka limuethe ha mukinia. Na vutanga vua vinjui ndi vua thingombe na vumo vuahi vuka lila hamu hehi na mukinia. '' ⁴ Mosesa mukemo mua shongele mavue avali ngue aje ambangelo, keho ua hindukile cimene mene na kulonda ku mukinia ua sinayi, ngue mua mulekele Yehova. Mosesa uambatele aje mavue a kushonga mu mavoko endi. ⁵ Yehova ua shulukile mulishelua keho uemanene haje na Mosesa, keho ua tumbuile muatho nguendi ; ''Yehova.'' ⁶ Yehova ua muhitile kumesho endi na kuambulula nguendi, ''Yehova, Yehova, Kalunga muka ngodhi na vumpahu, ua livandeka ku vukalu, mukemuo mua kuatelela cuvuathano ca kuononoka na lunthilielo. ⁷ Atakametha cuvuathano ca kuononoka hama kulukathi a memo, ecela vuhenge, lithino, na vupi. vuno nahamo hahi a ka dhimangana muka mulonga. Aneha kashitiko ka vupi vua vaishe kuli vana na vana va vana vavo, na kulimo lia mu citatu neli lia mu ciuana.'' ⁸ Mosesa ua kotamene cihanga cendi vuathi vuathi hanthi na kulemetha. ⁹ Mukemuo mua handekele nguendi, ''Nga njina uana ngothi mumesho ove, Kalunga kange, njina ku kandelela linga uye mukati ketu, muomu vantu ava vali na lithino. tuecele ku lithino lietu na vupi, keho tutambule tupue va suana. ¹⁰ Yehova nguendi, ''tala, mualolo njipanga cuvuathano. kulutue lua vantu, nji kapanga vi komouetho vije vicha kanda vapange lumo hanthi hoshe nambe muyati umo uahi. Vantu voshe mukati keni vaka mona vipanga viange, muomu cuma caliova eci cinji panga nove. ¹¹ Tolilila kuli eci cinji kushika lelo. Njiyongola kusheka va Amoleu, vaka Kanana, va Hiteu, va Pelizeu, va Hiveu, na va Yembuseu. ¹² Dhangama keti ukapange cuvuathano na vantu va mu cifuti cije ciu kaya, ndi vaka pua cilaha mukati keni. ¹³ Vuno, muna pande ku katavula miyombo yavo, muka lundumuna vungunthi viavo via mavue, nakuteta vingunthi via kalunga kavo Ashela. ¹⁴ Muomu kumua pandele kulemetha kalunga ueka, muomu Yehova, muatho uendi lifuua, ikeye Kalunga ua lifuua. ¹⁵ Keho dhangama kupanga cuvuathano na vantu vamu cifuti cije, muomu vaka litenguluka nava tulunga vavo, na kukombeleya kuli va tulunga vavo. Keho umo uavo aka mithana keho mukalia ku cikombelo cendi, ¹⁶ eni naua muka tambula vana vavo vava kentu na kuva hangela vana veni va vamala. ¹⁷ Keti uka lipangele tulunga tua kushonga. ¹⁸ Muna pande kuniunga cilika ca mbolo ya kujeneka kuthinina. Ngue munja mishikile, muna pande kulia mbolo ya kujeneka hingo matangua mutanu na avali ha nthimbu ije vene mu ngonde ya Avive, muomu mu ngonde ya Avive mua tuhukile mu Ingito. ¹⁹ Vambeli voshe vange, nambe vambeli va vamala, va thingombe, va thimpembe, na vampanga veni. ²⁰ Vunoni amba kumu vahiluitha handando, muna pande kupokola vinthingo viavo, Muna pande kuhiluitha vana va vambeli veni ha ndando. uahi a keja ku mesho ange ma voko voko. ²¹ Kuatha ukapange matangua mutanu na limo, vuno litangua lia mu citanu na avali una pande kukahuimako. Nambe hanthitu ya kupulula, na kungula, ove yakahuime. ²² Una pande kukatakametha cilika ca vivike na mbuto ya kulivanga, una pande naua kukaniunga cilika ca kulikungulula kukuhua kua muaka. ²³ Vantu vana pande kujombolola ku mesho a Yehova Kalunga, Kalunga ua Isaleli Vi nthimbu vitatu. ²⁴ Muomu njikasheka mishovo kumesho ove nakuka hametha vingamba viove. Naumo uahi a kali veyela livu liove ngue liavo mu ukaya kukajomboloka kumesho a Yehova Kalunga kove vinthimbu vitatu. ²⁵ Keci uka kombeleye maninga a cikombelo cange na hingo, nambe keci uka thedhemo muthedha ua cikombelo ca ku cilika ca pasovala noho kucimene. ²⁶ Una pande kukaneha vushuka vueni vuacili vua kulivanga kutia mumeha eni na ku yituala kunjivo yange. keci muka teleke muna mpembe ali mumahini avaina. ²⁷ Yehova ua lekele mosesa nguedi, ''Thona meji aa, muomu kushuama ku meji aco njina liuvuathana nove na Isaleli. '' ²⁸ Mosesa ua kakele kuje na Yehova makumi auana a mutania na auana a vunthiki, ka uanene nambe tuakulia tua kushuma ndi nambe tumema tua kunua. uathonene meji a cuvathano hamavue, mashiko likumi. ²⁹ Mua kandukile Mosesa ku mukinia ua sinayi na mavu a cuvuathano mulivoko liendi, kadhivukile nguendi cikanda ca luholo luendi cakethimine mua handekele na Kalunga. ³⁰ Va Alone na vana va Isaleli mova muene Mosesa, cikanda ca muluholo luendi ci kethimina, na vakevo vateuele kushuena ha muhehi nendi. ³¹ Vuno Mosesa ua va thanene, keho va Alone na vakuluntu va mishovo vedhile kuli yendi. Mukemuo Mosesa muava handekethele. ³² Munima yevi, vantu voshe va Isaleli vedhile kuli Mosesa, keho mukemuo muava lekethele mashiko aka muhanene Yehova kumukinia ua sinayi. ³³ Mua manene Mosesa kuhandeka navo, ua hakele ntanga kuluholo luendi. ³⁴ Hoshe hakele kuya Mosesa kuli Yehova linga aka handeke nendi, a tundithako ntanga, kamane haka tuhukila. Ha kutuhuka, a lekethako vana va Isaleli viva na muishika kuhandeka. ³⁵ Vana va Isaleli muva mona Mosesa a kedhimina muluholo, ali fuika naua ntanga kamane mua hiluka naua aka handeka na Yehova.