¹ Mu engeli ghumweya poha engeli kwoko nohawadi oyu gha kwaterera turonga kwoko no tuwadi gheyire no ghaghambire kwange eshi, '' Wiye, nanyi nikuneghedhe matetero ndhango gho mukarungu ghoghukuru oyu ghahungumana pa mararware, ² no yu ghatendire rungu no mafumu gho pakaye, no haka kaye hatererire ku rungu rwendi. ³ Mu engeli gha nishimbire pa mupepo mumamboreya, no namonine mukamadi ghana hungumana pa thishereka tho rudhi ro ghukihu othi tha karire no mena gho kushedhaghura. Thishereka thi tha karire no mitwi kwoko no dhiwadi no manyiha dikumi. ⁴ Mukamadi yu gha kwatererire munyara dhendi kopi gho ngorondo gha yara yinu yo kunyata no yinu yo kupira kupongoka yo rungu rwendi. ⁵ Pa rupara rwendi ha tjanga po dina edi hahoreka yitongora eyi dyatongora: '' Babylon gho mukuru, nyina gho rungu no yinu yoyiheya yoyimango pakaye.'' ⁶ Namonine eshi mukamadi yu ne ghaterera no manyinga gho hanu hokuponga waNyambi no manyinga gho wa hatawa mwa Yesusi. Apa namumonine mukamadi yu, natetukire thikuma. ⁷ Ene mu engeli ghaghambire kwange eshi, '' Pashanye ghuna tetukera? Nanyi nikutjwathanithe yitongora eyi hahoreka yo mukamadi yu no thishereka ethi thina shimbi mukamadi yu, thishereka ethi thidi no mitwi kwoko no dhiwadi no manyiha dikumi. ⁸ Thishereka ethi ghuna mono, mbadi thidiko pano, no tamba thiye kutunderera mudikwina dyo kupira mahurero. No ghana kuyenda gha kaharanganye, awa hatunga pakaye, owa hakara eshi mena ghawo mbadi ha ghatjange mu mbapira dhomoyo kutunda ku matatekero gho kaye-nanyi ha kutetuke pa kumona thishereka thi, yoyishi ghakarire ko, mbadi ghadiko, no mbo ghaneya karo. ⁹ Oyi yethha maghono ghoghunyanyami.Dhi mitwi kwoko no dhiwadi ne marundu kwoko no mawadi opa ghahungumana mukamadi yu. ¹⁰ Shime karo koghadi mafumu kwoko. Mafumu kwoko ne ghawa, ghofotji ne poghadi, no ghumweya ne shime mbadi gheya, no apa mbo gheya, nanyi mbo ghakare mo kamanana ngenyu. ¹¹ Thisheka thi thakarire ko, no mbadi thidiko, aye fumu gho ghukwoko no ghuhatu. Gha hatera ko hakwoko no hawadi ndani kuna kuyenda naye kumaharanganyeno ghendi. ¹² Manyiha dikumi ogha ghuna mono ne mafumu dikumi owa hapira kuwana ghufumu, ene mbo ghana wana ghuraghuri hafumu muviri dhofotji pofotji no thishereka thi. ¹³ Owa ne ho maghano ghofotji, no mbohana tapa ngcamu dhagho no ghuraghuri wagho ku thishereka. ¹⁴ Nanyi mbo hatange yita nondjwi . Ene ndjwi ghana kuwa wina, yoyishi aye ne Nyambi wawa Nyambi no fumu wawa fumu - no owa hadi nendi ho hetha, hawatorora , ndani ho hahunga. '' ¹⁵ Mu engeli ghaghamba kwange eshi, '' Meyu gha ghuna mono, opa gha hungumane mukamadi gho rungu , ne hanu hohengi, hawatorora, ndani mandimi. ¹⁶ Manyiha dikumi agha ghuna mono - awo no thishereka nanyi ha kunyenge mukarungu. Nanyi hakunine yirama yendi, no nanyi hakumutumekere no mudiro. ¹⁷ Nyambi mbo ghatura mitjima dhagho mukutwara thitambo thendi mu kutawa kutapa mangcamu ghawo ku thishereka kare mbo gharikanye mo manando gha Nyambi. ¹⁸ Mukamadi yughuna mono ne mbara dhodhikuru edhi dha kara no ngcamu mukupiteritha mafumu pa kaye. ''