¹ Nayuvire diywi dyodikuru dina kwitha ghushogherera mu tembelino kughamba kwaEngeli kwoko nohawadi eshi '''muyende no mukanotwere pa kaye turonga kwoko no tuwadi to ghupata waNyambi.'' ² Mu Engeli ghokutanga ghayendire no kanotwerakaronga kendi pakaye , noyimburu yoyimango no tjitju thikuma ya manine hanu awa hakarire no thidimukitho thothishereka, awa haraperire thishwi thatho. ³ Mu Engeli ghoghuwadi ghanotwerire karonga kendi mudikuruviya. Dyakuthitunukire manyinga , yira manyinga ghomunu ghokufa , no kehe thinu thokupara mudikuruviya tha fira. ⁴ Mu Engeli ghoghuhatu gha notwerire karonga kendi murware no muma vetu vetu ghomeyu, no yakuthitunukire manyinga. ⁵ Nayuvire muEngeli ghomumeyu ghakughamba eshi '' Owe ne ghomuhunga- yowe ghudiko no yowe wakarireko, yowe mupongoki - pamurandu shi yowe ghunapangura yinu yi. ⁶ Pamurandu shi hanotwerire manyinga gho hanu waNyambi no kupongoka no hapumbi, wa wapire manyinga ha nwe; yodigho yawa roghera.'' ⁷ Nayuvire thinyaku thina kuhutha eshi, ''kemo, fumu Nyambi gho mangcamu dhodhihe, yipangura yoye ne yaghushemwa no yihunga.'' ⁸ Mu Engeli ghoghune ghanotwerire karonga kendi pa diyuwa, no hadipire matawedhero mukutumeka hanu no dyekeshera dyo mudiro. ⁹ Hanu hapwire kuvavura no dyekeshera dishokuru , no hashedhaghurire dina dyaNyambi, oyu ghakarire no marawero ku mahumbithero gha. mbadi ha pirukire ngambi kumupa fumwa. ¹⁰ Ene mu Engeli ghoghukwoko ghanotorire karonga kendi padipuna dyo thishereka, no dikokore dyafikire ghufumu wagho. Hatafunine marudimi ghagho pamurandu gho tjitju. ¹¹ Hashedhaghurire Nyambi ghomudiwiru pamurandu gho tjitju no yironda, no hashwenine shime kupiruka ku yitenda yagho yoyimango. ¹² Mu Engeli ghoghukwoko-fotji ghanotwerire karonga kendi murware dhishokuru dhaEupharates. Meyu ghamo ghapwererire mukuroyitha ndhira dhawa fumu hokudiva. ¹³ Namonine dhimupepo dhokunyata edhi dhapiturire yira manyudya, dhina kushwagherera mutunwa to dikongoro, to thishereka, no mutunwa to haporofeta ho mbango. ¹⁴ Adho ne dhi mumpepo dho dhimango edhi dha tendire yitetukitho. Adho mbo dhina yendi mukaye kokahe mu kuwa kongwedha pofotji kuyita yo diyuwa dyo dikuru yaNyambi gho muka ngcamu dhodhihe. ¹⁵ [ ''Kenge! ame nakwiya yira mwidhi! Mukaruviya ne muka kurawa, gho kukunga yitere yendi podigho shi maghana gha yendaghura thiheha no maghana hamona yothihonyi yendi''] ¹⁶ Hawa kongwedherire pofotji mudyango edi hatoya muThihiburayi eshi: Armageddon. ¹⁷ Ene muengeli gho ghukwoko no ghuwadi gha notwerire karonga kendi muwiru. No diywi dyo dikuru dya shwaghererire mutembeli no kudipuna ghughamba eshi, '' Yina pu keho! '' ¹⁸ Ghakarire methero gho mishoro, tuyoghototo, madikitero gho mushoro, no makineno gho muve gho makuru-makineno gho muve gho makuru agha ghapira kuhokoka rumweya kutunderera pa heya hanu pakaye, gho ghukuru gho makineno gho muve ghu. ¹⁹ Mbara dho dhikuru dhapwire kuyakunutha mu yipindhi yihatu, no mambara gho muhoko dhodhihe ghadhingunukire. Babylon shokuru gha mughayarire Nyambi, no gha dhipire mbara dhiya kopi gho vinyu gho kuyara ghupata waNyambi gho ghukuru. ²⁰ Yirudhi yoyihe ya dhongonokire, no marundu mbadi gha wana karo. ²¹ Mbwe dhodhingi dhina kuviha yira {34.2Kg}, dheyire kushwagherera muwiru dhiwere hamu. Hanu hanyeghenyine Nyambi pamurandu gho mahumbithero gho mbwe gho mukuru.