Thikurumingwa 15
1
Hanimono karo thineghedhitho thimwe mudiwiru thothikuru nothothiwa: kwakarire ha Engeli kwoko nohawadi noyinyandekitha kwoko noyiwadi, ayo ne yoyinyandekitho yokumanithera. Ghupata waNyambi ne mboghuna kumenenamo mumwayo.
2
Namonine eyi yamonekire yira dikuruviya dyokutwedhima dyakuvunga no mudiro. Kumbadi hemanineko awa hawitha thishereka no thitjwandjo no nomora dhi dhemanena po dinadyatho. Hakwatererire yivandjero eyi ghawapire Nyambi.
3
Hembangire membo gha Mosesi, mupika waNyambi no dimbo dya ndjwighana: ''yiruwana yoye ne yikuru noyiwa, fumu Nyambi mukamangcamu. Mandhira ghoye ne ghahungama no ghashemwa, fumu ghodhimushovo .
4
Yidye shoghapire kukuyapa fumu no kukugha dina dyoye? yowe pithoye wapongoka . Dhimushovo dhodhihe mbodhineya nokuna kukugha yoyishi yirughana yoye yoyihunga ne hayineghedha.
5
Apa yapwire yinu yi ne, namonine tembeli gho tende ghoghushupi ghanayandhuruka mudiwiru.
6
Mutembeli mune mwashwayire haEngeli kwoko nohawadi ghukwaterera yinyandeka kwoko noyiwadi. Hawavateka makehe ghokutwedhima no hakarire no dhimukata dhongorondo padhimuyidi.
7
Ghofotji ghopa yikamoyo yi ne ghatapire kwawaEngeli kwoko nohawadi turonga tongorondo tokuyara ghupata waNyambi oyu ghapara kuroruheya nokuroruheya.
8
Mutembeli mwayarire mwithi ghokushwagha kumakughero ghaNyambi noku ngcamu dhendi. Mbadiko ghokungena mo kate yinyandeka kwoko noyiwadi yawaEngeli ne yinapu.