¹ Hanikengi kwange no kumona ndjwi ghanemana padirundu dya Siyoni. Nendi hakarire 144,000 owa hakarire no dina dyendi no dina dya wihe patuhungu para twagho. ² Haniyuvu diywi dina kushwayerera mudiwiru no mughuma ghushokuru yira meyu no mughuma yira mushoro. Mughuma ghu nayuvire ne yira yihumba hanakushika haka yihumba. ³ Hembire dimbo dyodipya kughutho gho dipuna no kughutho ghoyivareka yine yoyiyumi ghomayami. Noghofotji temba ghakonine kukuhonga dimbo di shimengwa owa 144,000 owa hapwire kughura mukaye. ⁴ Owa ne ghowa hapirire kukunyateka hathinda na mbuyama, Awo hapwire kukukongora hathinda kurungu. Owa ne ghowa hakuthire ndjwighana keheku ngayendanga. Agho ne hapwire kukomonona mukatji kohanu wahe, no hambuyo hokutanga waNyambi no gho ndjwighana. ⁵ Mbadiko mbango dhi ghawanine mutunwa twagho; hapirire murandu. ⁶ Namonine muEngeli ghanakutuka mukatji komawiru, oyu ghakara no mbudhi dhodhiwa mukuyuvitha kowa hatunga mukaye- kukehe muhoko, diko, ndimi, no hanu. ⁷ Ghethire nodiywi dyodikuru,''kuyapa Nyambi nokutapa fumwa. Ruvedhe romapangwero ne runeya. Mumu kughe, koyu ghatendire diwiru no kaye, dikuruviya no meyu gho mavetu-vetu. ⁸ Mu Engeli ghumweya-ghoghuwadi-ghakuthire ghughamba, ''ghunaghu, ghunaghu Babyloni eshi ghomukuru, oyu ghaningithire ghoghuhe mukunwa kuvinyu ghorungu rwendi noyirumbera. ⁹ Mu Engeli ghumweya-ghoghuhatu-ghawakuthire ghughamba nodiywi dyodikuru, ''Ngeshi poghadi ghatongamena thishereka, no thishwi thatho nokuwana thitareka pakahungupara. endi kudyoko dyo rudyo. ¹⁰ Naye karo mbwananu kuvinyu ghoghupa waNyambi, vinyu yu hapingwira mbadiko yihavungiremo mukopi ghoghupata. Kwa munu oyu mboghanwako mboghana wana tjitju kumudiro no maretha kughutho wawaEngeli waNyambi ghokupongoka no kughutho gho ndjwighana. ¹¹ Mwithi gho ku mahumbithero ghawo mbo ghuna karera po kuroruhe no roruheya, no mbadi mbo haturumutha ghuthiku no mutenya-Owa mbo haraperera thishereka no thishwi thendi, no wa ha tareka thitareka tho dina dyendi. ¹² Ogha ne gho methero gho hanu wa Nyambi wa ha dhidhimeka no ha pongoka, owa ha turekire miragho dha Nyambi no matawero ghawo mwa Jesus kristusi." ¹³ Haniyuvu kwange mudiwiru dinakughamba eshi, ''Tjange yi: Hakaruviya wa hana kufera mwa fumu. ''Ghi,'' dyoghunakughamba mupepo'', mbohana katurumutha kuyiruwana yagho. yiruwana yagho mboyinawakuthu.'' ¹⁴ Hanimono kwange, no pakarire divuyi dyodikenu. Yira mwana munu ghanahungumana. Ghakarire no nata dho mangondo pamwitwi wendi nodikerevere dyoditwe munyara dhendi. ¹⁵ Mu Engeli ghumwe ghaswhayire mutembeli wendi witha no diywi dyodikuru koyu ghahungumanine pamavuyi: ''Shimbe dikerevere dyoye no tameke kukesha. Ruvedhe romukesho ne runakumu. Thika muyangu ghokaye ghuna pi. ¹⁶ Noyu ghahungumanine padivuyi ghawithere dikerevere dyendi pakaye, nokaye kapwire kukesha. ¹⁷ Mu Engeli ghumwe ghashwayire mutembeli mudiwiru: Naye karo ghakarire nodikerevere dyendi dyoditwe. ¹⁸ Shime mu Engeli ghumwe ghatundire kuthinyaku, oyu ghakarire nomarawero kumudiro. Ghethire nodiywi dyodikuru koyu ghakarire no dikerevere dyoditwe, shimbe dikerevere dyoye dyodi twe no ghongawedhe mashokambwa ghomandjembere mudipya dyo kaye, mandjembere ghapo ghanapi.'' ¹⁹ Mu Engeli ghavukumine dikerevere dyendi mudipya dyo kaye. Ghavukumenine kwendi muthikamitho thoghukenya ghoghuru waNyambi. ²⁰ Yishokombwitha hayidjovithire panunda dho mbara, manyinga ghapingurukire muthikamitho kate kumayuru gho mbi, ghomakilo metera 296(stadia).