¹ Hanimono kwange thishereka thinakukanduka mudikuruviya . Thakarire no manyiha dikumi no mitwi kwoko nodhiwadi, nopamanyiha pakaarire manata dikumi, no kehe mutwi dhatho pakarire dina dyomushedho. ² Thishereka thi namonine thapitura yira ndhogho. mapadhi ghatho thapitura yira mapadhi gho didjidjikwe, nokanwa katho yira kanwa ko nyime. Dikongoro ghadipire ngcamu, mudipuna dyendi, no hamupire ghuraghuri ghoghukuru gharaghure. ³ Mutwi ghothishereka thofotji waremanine thikuma, ene thiremana thi thapwire kwirukitha. Kaye kokahe katetukire nagho hakuthire thishereka thi. ⁴ Nagho karo hakughire dikongoro , yoyi hamupire ghuraghuri ko thishereka. Hakuyire thishereka ,karo hatwikere kughamba eshi yidye ghoyira thishereka thi? no dye ghokutenda natho yita? ⁵ Thishereka ghathipire kanwa kokukona kughamba manando ghokukununeka nomushedho. hathitawedhire mukuruwana ghuraghuri tughonda makumi mane notuwadi. ⁶ Thishereka tayandhurire kanwa mukughamba manando ghomushedho kwaNyambi, kushedha dina dyendi, no thinyaku thendi, nowa hatunga mudiwiru. ⁷ Thishereka hathitawedhere kufuta yita no haguva waNyambi hokupongoka, nokuwawitha. shime karo hathipire ghuraghuri kukehe mako, hanu, ndimi no muhoko. ⁸ Wahe watungire pakaye nanyi hakuthikarere, kehe ghokupira dina dyendi mumbapira dho moyo, Owa hahatera kundjwighana oyu hapagha kutunda kukashema ndhugho dho kaye. ⁹ Oyu ghadi no matwi, ghategherere. ¹⁰ Ngeshi kehe yuno ghafumanena kumutwara mu nwato, mbohana mutwara munwato. Ngeshi wa hafumanena kuwapagha no dimende, mbohanawapagha nodimende vene. Ghano ne methero kughudhughutjima , kuyinyanda nomatawero kohaguva waNyambi hokupongoka. ¹¹ Hanimono thishereka thakushwagha mukaye, tha karire nomanyiha mawadi yira ndjwighana, no kughamba yira dikongoro. ¹² Aye gharuwana ghuraghuri ghoghuhe kuthishereka thokutanga mughukareri wendi, noyu ghatendire kaye nowa hatungamo mbohanakarera thisherka thi thokutanga , thitombo thothikuru thi thaporire. ¹³ Natho thatendire yitetukitho yoyikuru. natho karo thatendire mudiro ghushwaye mudiwiru wiye pakaye kughutho dhawanu. ¹⁴ Hathipire ngcamu kukwateramo thishereka, mukughamba mbango kowa hatunga kapaye , nokuwatongwera mukuturapo thishwi thothishereka ethi tharemane kudimende, no thaparire. ¹⁵ Hathipire matawedhero mukutapa munu kuthwishwi tho thishereka podiyo thishwi thikone kughamba nokurawera wahe awa mbohashwena kukarera kuthishereka ghakona kuwapagha. ¹⁶ Karo thathinenekire keheyu, ghokupira mudyo no hakamangcamu , hatungi no hahepwe, hakahoro nawa pika, mukuwana thitareka kudyoko dyorudyo endi parupara. ¹⁷ Yakarire ghukukutu kwakehe yuno mukughura endi kughuritha shimengwa ghakare no thitareka thothishereka, thitara thi ne thinemanenapo dina dyatho. ¹⁸ Ogha ne methero ghoghunyanyami, oyu ghadi nomatjwathaneno ninge ghatare thitara thothishereka shi. Othi ne thitara tha munu, thitara thi ne 666.