¹ Hamonine thidimukitho thothikuru mudiwiru: mbuyama ghapwire kuyenga no diyuwa, nokaghonda kwishi dhomapadhi ghendi, nonata dhomanungwedhi dikumi nomawadi pamutwi wendi. ² Ghakarire yirama yiwadi, nogha kughererire pakunyatitha. ³ Nothidimukitho thiweya thahokokire mudiwiru: mone! pakarire dikongoro dishokuru dyodikinhu dyo mitwi kwoko-wadi nomanyiha dikumi no manatakwoko-wadi pamitwi. ⁴ Muthira wadyo wakokire ditungwedhi dyoghuhatu mudiwiru diwere pamuve. Dikongoro dyemanine kughutho wambuyama oyu ghanyatithire , podiyo eshi apa shoghawane kakeke ne ghodimine mwanendi. ⁵ Hashamuruka mwana ghomukatughuru, oyu mbogharaghura marudhi ghomaheya nomutagha ghothikuvo. Mwanuke yu hamuyeyura Nyambi kudipuna dyendi. ⁶ Nombuyama yu hatjirera mumamboreya kudyango di ghamuroyithera Nyambi, eshi ghakakuhorekemo mayuwa 1260. ⁷ Mudiwiru mwakarire yita. Mishaghere nawaEngeli wendi hemananyene dikongoro, dikongoro nawaEngeli wendi hahuthire nyara. ⁸ ene dikongoro mbadi dyakarire nongcamudhokuyarera mukuwitha , nombadi hawaninedyango mudiwiru. ⁹ Dikongoro dishokuru - Dikuruyoka edi hetha eshi shadipinyi oyu ghapemuna kaye kokaheya hamuvukumene pakaye, nawaEngeli wendi. ¹⁰ Kokuyuva kwange diywi dyokwiyuka mudiwiru: ''eshi ghaneya makomweneno nongcamu dhoghufumu waNyambi noghuraghuri waKristusi. Murunderi wawaghendhetu ghanapu kwitha,oyu ghawarundera kughutho waNyambi mutenya no ghuthiku. ¹¹ Ghapwire kuwitha nomanyinga ghondjwighana no nando dho manongweno, nombadi hahakire yipara yagho kate kukufa. ¹² Yodiyo eshi mushamberere, mwaka diwiru nawaheya awa hatungamo! Ene kunyanda kunamutaterera mwaka pamuve nodikuruviya, yoyishi shatani hanamuwithera pamuve! Ghadi nonyinya dhodhikuru noghanadimuka eshi ruvedhe wendi ne rupu runathiyarako! ¹³ Apa dyamonine dikongoro eshi hanadivukumena pamuve ne, dyakutha kuthire mbuyama oyu ghashamurukire mwana ghomukatughuru. ¹⁴ Ene mbuyama yu ne hamushupekire mando mawadi ghodishambakodhi ghatuke ghatjirere wangu mumamboreya ghakakuhoreke, ruvedhe no ruvedhe no dihenda kumayakunukero gho diyoka. ¹⁵ Diyoka dyathipadhanene mategho yira rware ghupoposha eshi rumine mbuyama. ¹⁶ Ene muve ne waghamwenenine mukamadi . Muve wayandhurire kanwa kagho no kumina rware oru rwashwaghire mukanwa kadikongoro. ¹⁷ Kokunyeghenya dikongoro namukamadi no hadiyendi dikatende yita nawana hoka wendi, kowa hakarire ghutawedhi kumuragho waNyambi nokukwata manongweneno ghaJesusi Kristusi . ¹⁸ Ndani dikongoro hadi kemana pambombwa dhodiheke dyodikuruviya.