¹ Hanipire kambu nimetitheko. Ghanitongwere she " wimane ghumete tembeli wanyambi no thinyaku, nowa hakughangamo. ² Ene wameta ditete dyopanunda dho tembeli, yoyishi adyo ne haditapa kwawanu awa hakara eshi mbadi haJuda. Nanyi hakudjate tembeli dhokupongoka mutughonda makumi mane notuwadi. ³ Nanyi nakupe hashupi wange hawadi ghuraghuri ghokupumba mumayuwa 1,260, nanyi hakuvate yiketji yothikukumba. ⁴ Awa hashupi ne hohayitondo yondhwe yiwadi noyikuroyiwadi eyi yemana kughutho gho fumu wa kaye. ⁵ Ngeshi kuwayuvitha tjitju , kushwagha mudiro mutunwa twagho nokumina hakanore dhagho. Kehe yuno ghokushana kuwayuvitha tjitju ne, hakona kumupagha mundhira dhi. ⁶ Hashupi wa ne hakara no ghuraghuri ghokuyandhera diwiru podiyo shi mbadi gharoke mvhura mumayuwa gha hana kupumba. Hakara nongcamu dhokuthitununa meyu ghakare manyinga nokunyandeka kaye no kehe yino yinyandekitha kehe pano hana himi. ⁷ Apa hakumana ghushupi wagho, nanyi thakuwarwithe thishereka thi thakushwagha mudikwina dyodidhungi. Nanyi ghakughawithe no kuwapagha. ⁸ Mwimbwa dhagho nanyi dhakurare mumukara ghombara dhishokuru(edhi hetha mumaghanekero eshi Sadoma na Egiptena) oku hapamarere fumu wagho. ⁹ Mumayuwa mahatu no dihenda hanu hamwe homukehe diko, ndimi, no mushovo mbohana kengi kumwimba dhagho. Mbadi mbohawatawedhera kuwatura muthipiro. ¹⁰ Awa hatundanga pakaye mbohana shamberera kukwagho no kudjabwana. Mbohana kutuma tumena maghushwi yoyishi haporofeta hawadiwa ne hanyandekire hakakaye. ¹¹ Ene pakupwa mayuwa mahatu no dihenda munu ghomoyo gho kwaNyambi mboghunawangeni, no nanyi hakwimane. Ghoma ghoghukuru mboghuna wera powa hakuwamona. ¹² Mbohanayuvu diywi dyodikuru dyomudiwiru dinakughamba eshi ''Mwiye kuno!'' mbohanayendi mudiwiru padivuyi, oku hanyathi wagho ne pakuwakerera. ¹³ Nanyi pakukare makineno gho muve panako dhiya nothofotji kudikumi dho mbara mbodhina ghu. Hanu mayovi kwoko nomawadi mbohafu kumakineno gho muve, no owa hakupara ne mbohana yapa thikuma nokutapa makughero kwaNyambi ghomudiwiru. Yinyanda yoghuwadi ne yinapiti. ¹⁴ Yinyanda yoghuhatu ne yinakumu ghutambuka. ¹⁵ Mu Engeli ghoghukwoko noghuwadi ghashiyire dipori dyendi, no maywi ghomakuru ghaghambire mudiwiru ghughamba eshi ''ghufumu ghokaye ghunakara keho ghufumu wa fumu wetu na Kristusi wendi, no nanyi ghakuraghure kuroruheya no kuroruheya.'' ¹⁶ Hakuru makumi mawadi no hane, awa hahungumana pama puna ghagho mughukareri waNyambi, ha kurumanine nokukugha Nyambi. ¹⁷ Haghambire eshi, kutapa ndangi twe kukoye fumu gho ngcamu, oyu ghakarireko , noyu ghadiko yoyishi washimba ngcamu dhoye nowatanga kuraghura. ¹⁸ Dhimushovo dhanyeghenyire , ene ghupata ghoye ne ghuneya. Runakumumo ruvedhe rokupangura hafu nokuruwera hapikoye haporofeta no hanu waNyambi hokupongoka, no awa hayapire dina dyoye, wahe hakakupira mudyo nohakamangcamu. Runakumumo ruvedhe roye rokuhanyaghura kaye nohanu awa hana kuhanyaghura kaye. ¹⁹ Kokuyandhuruka tembeli dhaNyambi mudiwiru nodimbangu dyo ghundambo wendi hadimonine mutembeli.Kwakarire dhimushoro, tuyoghototo , mudikitero, makineno ghomuve no mbwe dhodhikuru.