Thikurumingwa 10
1
Podigho namonine muengeli ghumweya ghomangcamu gha kushuruka mudiwiru. Ghapwa kuyenga nomavuyi, nomuto ghomvura pamutwi wendi. Rupara rwendi yira diyuwa nomapadhi ghendi yira maghundhi ghomudiro.
2
Ghakwaterere mbapira dhi ha fikwere munyara dhendi. Kokutura kwendi dighuru dyendi dyorudyo mudikuruviya no dyorrumoho ne pandundu.
3
Podigho ghakuyerere nodiywi dyodikuru yira nyime ghokuvuma. Mukukugherera kwendi, dhi mishoro kwoko nothiwadi dha ghambire no mighuma dhadho.
4
Pakughamba dhimushoro kwoko nothiwadi dhi, na shanine kutjanga, ene nayuvire diywi dina kushwagherera mudiwiru ghughamba eshi,'' Ghundeke yi dhina ghamba dhimushoro. Mbadi ghuyi tjange.''
5
Muengeli yu na monine ghanemana padikuruviya no pandundu ghayeyurire dyoko dyendi dyorudyo kudiwiru.
6
Ko kwedha kwendi koyu gha para kuroruhe nokuroruheya, oyu gha tendire diwiru noyoyihe eyi yakara mo, kaye no yoyihe eyi yakara mo, dikuruviya no yoyihe eyi yakaramo, no muengeli kokughamba eshi,'' Mbadi shoghakare po karo maranga.
7
Ene mudiyuwa oku muengeli ghoghukwoko noghuwadi ne tamba gha shiye dipori dyendi, mbo yina rikanya eyi ghondekire Nyambi, thika di ghayuvithire mbudhi dhodhiwa kwawapikendi haporofeta.''
8
Diywi edi na yuvire dyokushwagherera mudiwiru dya ghambire karo nange eshi,''Yende, kashimbe mbapira dho kuyandhuruka edhi dhidi munyara dhamuengeli yu ghanemana padikuruviya nopandundu.''
9
Podiyo nayendire kwamuengeli yu nokamutongwera eshi gha nipe mbapira dhi dhodhimbiru. Gha ghambire kwange eshi,'' Shimbe mbapira dhi ghu dhi dye. Nanyi dhi tende dira dyoye ghururu, ene mukanwa koye ne nanyi dhi kare ghutowi yira wiki.''
10
Na shimbire mbapira munyara dhamuengeli yu no nadhidire. Dhakarire ghutowi yira wiki mukanwa kange, ene apa namanine kudhidya ne dira dyange dyakarire ghururu.
11
Ghumweya ghaghambire kukwange eshi, ''Pumbere karo kumako, mandimi, no kumafumu.''