¹ Podigho muengeli gho ghukwoko ghashighire dipori dyendi. Namonine ditungwedhi edi dyawerere pakaye. Ditungwedhi di hadipire matjapi gho kudikwina dyodidhungi. ² Gha yandhururire thero dho kudikwina dyodidhungi, nomwithi washwayiremo mwithi oghu wathimutukere muwiru kutunda muthero yira mwithi ghodidiro dishokuru. Diyuwa nomupepo ya bwipire kumwithi oghu wa shwayire muthero. ³ Mumwithi ne mwatundire mbathi-mbathi edhi dheyire pakaye, hadhipire ngcamu yire dha nge pakaye. ⁴ Hadhi tongwere eshi mbadi dhi hanyaghure muhonyi gho pakaye endi kehe thino thimena endi thitondo tho thina mahako, ene hanu ngenyu awa hapira thitareka thaNyambi pamarupara ghawo. ⁵ Mbadi hadhipire matawedhero dhipaghe hanu wo, ene kuwahumbitha ngenyu mutughonda tukwoko. Yinyanda yawo mbo yina kara yira kenge runonga ronge pakungengena munu. ⁶ Mumayuwa gho hanu mbo hana shana yifa ene mbadi mbo hayiwana. Mbo hana rumbera thikumenena kufa, ene yifa mbo yina watjira. ⁷ Mbathi-mbathi dhi dhamonekire yira tukambe otu hana royithera yita. Pamitwi dhadho pakarire yinu yira hutji ghothifumu tho ngorondo, nomarupara gho yira ghawanu. ⁸ Dha karire nohuki yira dhwawa mbuyama, nomayegho ghadho yira ghonyime. ⁹ Dha karire noyishupata yoyikuvo pamuyidi, mupughumeno ghomando ghadyo, yira mupughumeno gho mbi edhi dhina kutjirera kuyenda kuyita. ¹⁰ Dha karire nomithira norunonga yira nge; mumithira dhagho dha karire nongcamu dhokuhumbitha hanu mutughonda tughonda tuhatu. ¹¹ Dha karire nofumu oyu ghawa piterere, muengeli gho dikwina dishokuru. Dina dyendi muThiheburayi ne Abbadoni, muThihirika ne gha karire nodina eshi Apollioni. ¹² Yihumbitha yo kutanga ne yinapu. Mukenge! Kutunda yi yina kumu karo yihumbitha yiwadi. ¹³ Muengeli gho kwokofotji ghashighire naye dipori dyendi, nona yuvire diywi edi dya shwaghire mumanyiha ghothinyaku thongorondo ethi thakara kughutho waNyambi, ¹⁴ ghughamba kwamu engeli ghokwokofotji oyu gha karire nodipori eshi, ''Shuture ha engeli hane awa hakara munwato kurware dhishokuru dhaEupharatesi.'' ¹⁵ Ha engeli ha ne owa hakuroyithera nako dho, diyuwa dyo, kaghonda ko, nomwaka gho hawa shwayithire haka paghe rudhi ro hanu ruhatu. ¹⁶ Thivarero thawa kayita bwa hakarire patukambe kwakarire mamiriyona mathere mawadi. Nayuvire nomora dhawo. ¹⁷ Omu ne monamonine tu tukambe muyirota yange nawa ha tudhinine: yishupata yagho yakarire yoyikihu, thina diwiru, nothina dihenga. Mitwi dho tukambe dha piture yira dhonyime, nomutunwa twato mwashwayire mudiro, mwithi, nomudiro gho kwekeshera. ¹⁸ Rudhi ruhatu rwahanu rwapwire kupagha kumahumbithero mahatu: kumudiro, kumwithi, nokutuwe tomudiro otu twa tundire mutunwa to tukambe. ¹⁹ Mangcamu ghato kwakara mutunwa twato nomithira dhato-dha karire yira yiyoka nomitwiko, no kumithira kwakarire yinyandekitha kwawanu. ²⁰ Hanu awa hathigharireko, kuyihumbitha yihatu mbadi ha thighukire kuyipara yomuyitenda yawo eyi ha tenda, karo mbadi ha shayekire kuraperera ma demoni nohaNyambi ho mbango ho ngorondo, noyoyikuvo, mawe, noyitondo-yinu yo kupira kumona, kuyuva, no kuyenda temba. ²¹ Karo mbadi ha thighukire kughupayi wawo, ghurodhi wawo, rungu rwagho endi yiperemeka yagho yowidhi.