¹ Munyima dho yinu yino kokumona kwange muEngeli ghana kushuruka gha shwaghe mudiwiru. Gha karirre no ngcamu dhodhikuru, no muve ghoghuhe wa mumunakerire thishe thofumwa dhendi. ² Gha kughererire no diywi dyo ngcamu thikuma ghuninga eshi, '' Gha wa, gha wa Babiloni shokuru! Ghakarire dyango dyo matungo gho dhi mupepo dho dhimango, no kehe mupepo gho ghuyi no thinyunyi tho kunyata. ³ Marudhi ghomaheya gha nwine vinyu gho didovo dyendi dyo rungu. Hakamighuro gho pa muve ha karire ghutungi kumangcamu ghoyipara yo rungu rwendi. '' ⁴ Kokuyuva kwange diywi dimweya dina kushwagherera mudiwiru ghughamba eshi, '' Mutunde mumwendi, mwa guva wange, podigho shi maghana mukupakerera mumaharwero ghendi, podigho shi maghana muwana ku kehe mahumbithero ghendi. ⁵ Maharwero ghendi gha kupongeka muwiru yira diwiru, naNyambi gha vuruka yiperemeka yendi yoyimango. ⁶ Mumuhuthere thika di ghahutherire hamweya, no mumu ruwerithe paruwadi pa yitenda yendi, mu kopi yu ghavunga, kughumuvungera pa ruwadi. ⁷ Thika di ghakufumaneka thinda no ghatunga mughushwi, mumupe matjitjupithero no yinyanda yokurikanya . No ghana kughamba kukwendi thinda, ''Ame nahungumana yira herekadhi ; Ame ne mbadi no mudidhi, no mbadi mbo nimona yitokota.'' ⁸ Podigho eshi, diyuwa dimweya yikorwa yendi mbo yineya;Kufa, toko- toko, no diyerenge. Aye nanyi mbo gharokote ku mudiro, yoyishi hekudyetu ne ngcamu, no aye ne mupanguri wendi. '' ⁹ Hafumu ho pa muve awa ha tendire rungu nendi no mbadi ha kukungire nanyi mbo ha dire no kumutokotera opa mbo ha mona mwithimgho kupyera kwendi. ¹⁰ Nanyi mbo hemane kokayenda mu kuyapa tjitjudhendi, no kughamba eshi, '' mawe ghukukutu gho mbara dhishokuru, Babiloni, mbara dho ngcamu! pa ruvedhe rofotji mahumbithero gha neya. '' ¹¹ Haghurithi ho pa muve mbo hana diri no kumutokotera yoyi hana piri gho kughura mighuro dhawo karo - ¹² mighuro dho ngorondo, siliveri, tuwe totuwa, makwarara, makehe ghomawa, no ghokukihuruka, ¹³ yitondo yoyihe yo thiwe tho thiwa, yikote yoyihe yo yishokora yothindhovu, no yoyitondo yoyiwa, borozi, yikuvo, tuwe to ndhiro.Yitovitha yothina mahako,vinyu,maghadhi ,mushungwa ghofunufunu, mavumbukiro ngombe no ndjwi,tukambenoyihingitho yapo, yirama no midhimu dho hanu. ¹⁴ Mbuyo edhi mwa rumberire no mangcamu ghenu ghomahe dha mutunda. Ghushwi ghoghuhe no yoyihe yi yakutwedhimenine ya ndhongonoka, no kumutokotera wiyuka. ¹⁵ Ha ghurithi ho yinu yo yiwa yi awa ha karire hatungi papendi mbo ha nemana kayenda nendi yoyishi woma ku tjitju dhendi, kumudirera no kumutokotera wiyuka. ¹⁶ Ghuninga eshi, '' mawe, ghukukutu gho mbara dhishokuru edhi dha pwire kuyenga no makehe gho makenu, noghukihu , no ghokurwedhima no mangorondo gho makwarara, no yipako yoyiwa! ¹⁷ Pa ruvedhe rofotji ghushwi ghoghuhe ghuna kuhanyaghuka. Ha hingi yikepa wahe, ha rughani kumakuruviya, hemanine ko kayenda. ¹⁸ Kokudira kwawo pa kumona mwithi gho kupyera kwendi. Kokughamba kwawo eshi, '' mbara munye dhodhikuru yira mbara dhi? '' ¹⁹ Ha kutunu kwawo rukungu pa mitwi dhawo noghukugherera, kumudirera no kumutokotera, '' mawe, ghukukutu gho mbara dhishokuru oku ha karire wahe no yikepa yawo kudikuruviya ha karire ghutungiku ghushwi wendi. Pa ruvedhe rofotji ghayi haranganyine. ²⁰ Ghu shogherere ghudiwiru papendi, hanu ho kupongoka nawa postoli nawa porofeta, Nyambi ghareta mapangwero papendi! '' ²¹ Mu Engeli gho ngcamu gha dhamunine diwe dyo kuninga yira kakundhu kokakuru no kudivukumena mudikuruviya ghuninga eshi, '' mundhira dhi, babiloni mbara dhishokuru, nanyi mbo ha muvukume no ngcamu dho kuharanganya no mbadi mbo ha mumona karo. ²² Mughuma oghu hatenda ha shiki tungoma , nawa tumbimbi, haka mishigho, nawa ka mapori , mbadi mbo ha yuveka karo mumoye. No mbadiko ha yuwi ho kehe yino mbo hamoneka mumoye.No mbadiko mughuma gho tukundhu mbo ghu yuveka mumoye. ²³ Thishe tho munyenge, mbadi mbo thi musheghenyena karo, maywi gha herekadhi na mukawenga, mbadi mbo ghayuveka karo, ko haghurithi hohapitereri ho pa muve, no marudhi ghapwire kupemukitha kughurodhi. ²⁴ Mumwendi manyinga ghawa porofeta no hanu waNyambi ho kupongoka hapwire kupagha pa muve, ha gha wanine mumwendi. ''