¹ Podigho eshi, muninge tuthiye matamekro ghombudhi dhaKristusi notutware kughutho makurero. Mbadi tuturepo karo nunderero dhomapirukero kuyirughana yokufa nomatawero ghomwa Nyambi, ² ngambi nunderero dhoyihonga kuhatera kumayoghero, makambero ghonyara , muvumbukero wawafu no matetero ndhango dhororuhe. ³ Natwe nanyi mbotuyitende ngeshi kuyitawedhera Nyambi. ⁴ Ayo yina kukangera kowa hapwa kuyuvithera, owa hayereka yitapa yomudiwiru, owa hakuyarekire mupepo ghokupongoka, ⁵ nowa hayereka nando dhaNyambi dhodhiwa nomangcamu gho kaye kokughutho. ⁶ Ene awo hanakuwako yira yina kukangera kuwahutha karo kumapirukero. Yoyishi ha pamarera mwana Nyambi kukwagho hathinda karo, nokumu sherera thitunu meho. ⁷ Kumuve ghuya ghuya ghuna kunwa meyu ghokushwagha kumvura , no ghunakureta mukesho mwene kowa hana kuvunda muve, aghone muve ghokuwana matungekero kwNyambi. ⁸ Ene ngeshi yina kareta mighunga no ghuruwa , yina kupira mudyo nokukokera kuthikuto. Ghuhura wayo ne yina kupyera. ⁹ Ene mwatutawitha kuyinu yoyiwa yokuhatera kukwenu, mwahakwa, yinu yokutawitha makomweneno , ngambi kenge tunakughamba kemo. ¹⁰ Nyambi ne mbadi muyi. Aye mbadi mboghavurama yiruwana yenunoruhakitho ghoru ghaneghedha padina dyendi, yoyishi mwakomonona hapongoki wendi, no shime hamuwakarera. ¹¹ Twa hima thikuma eshi kehe yuno ghakone kuneghedha manongwahu ghogho kate kughuhura, podiyo makurupero ghenu ghakashemwape. ¹² Eyi yimuningithe eshi mbadi muvape, ene tukare twatemununi ghowaya homatawero no kudhidhimeka kughupingwa oghu ghatuturekera. ¹³ Apa ghatapire Nyambi maturekero kwaAbrahamu, ghakwedhire thinda , yoyi mbadi ghedhire kwaghumweya gho kumupiterera . ¹⁴ Ghaghambire ''eshi ame mughushemwa mbona kufiyadhokitha no kuvurukitha thivarero thoye.'' ¹⁵ Mundhira dhi Abrahamu ghawanine eyi ghamuturekerire munyima dho kutaterera ghudhidhimeka. ¹⁶ Hanu kwedha kwaghumweya ghokuwapirera . Kughuhura gho kehe nananidhagho , medhero ghemanenapo yira matanaritho ghonando. ¹⁷ Apa ghatokorire Nyambi mukuneghedha yokukenena kwawapingwa hokutoyedhera ngcamu dhokupira makutjindjero kuthitambo thendi, ghayikuruperitha nomedhero. ¹⁸ Ghayitendire podiyo yinu yishi kutjindji yiwadi no ayo ne yina kukangera Nyambi mukwangera- atwe, tjirera kumondo, nanyi mbotukare nongcamu dhomatjokedhero mukukwaterera nganganga kumakurupero agha hatu turera kughutho wetu. ¹⁹ Atwe tudi yira mondo nomakurupero ghokuturumuthitha moyo, makurupero agha ghangena mudyango dyomwishi munyima dho dhothifikitho, ²⁰ Omu ghayendire Jesusi kughutho wetu, ghengenine mudyango diya muku tukarerapo. Aye ghakarire mupristeri shokuru kuroruheya yira Melgisedeki.