¹ Aye Melchizedeki, fumu waSalema, mupristeri waNyambi Shokuru, yoghawnine Abrahamu ghana kahuka oku ghaka paghere nafumu ghamukandadhekire. ² No kukwendi Abrahamu gha tapire thofotji kudikumi ghoyinu yoyiheya. Pakutanga, dina dyendi kutongora eshi, ''Fumu ghoghuhungami''; ndani aye karo ne ''fumu waSalemu,'' eyi yina kutongora eshi, ''fumu ghothiraro.'' ³ Aye mbadi ghakara nawihe, mbadi ghakara nanyina, mbadi hakara nohakerekandongo, endi matangero ghomayuwa endi ghuhura ghomoyo. Ene, ghapitura mwana Nyambi, yoyishi aye mbo ghana kara mupristeri kuroruheya. ⁴ Kenge kughutungi gho katughuru yu oku ghana tapa Abrahamu thofotji kudikumi kuyinu eyi ghana kashimba muyita. ⁵ Hanahoka waLevite awa ha tambura yipuna yoghu pristeri hadi nomarawero kukutha kumuragho gho kukongwedha thofotji kudikumi kwawanu, yikare, kwawakurwagho, endi kwawakerekandongo ho kutunga kwaAbrahamu. ⁶ Ene Melichizedeki, hakerekandongo wendi mbadi ha wanine kwaAbrahamu, hawanine thofotji kudikumi kwaAbrahamu, noghamu tungekire, oyu gha karire nomakuruperitho. ⁷ Mbadiko mahamwero kwamunu ghomumbiru ngeshi ghawana matungekero kwamunu ghomukuru. Yodiyo pano, ⁸ kehe yu munu ghopanyama kuwana thofotji kudikumi, ene yapwa kushupa eshi aye shime ghapara. ⁹ Nomughukaro ghorughambitho, haLevite, awa hatamburire thofotji kudikumi, nokaro haruwere thofotji kudikumi kupitera mwaAbrahamu, ¹⁰ pamurandu Levite gha karire pathirama thawa kerekandongo wendi apa ha kuhangane Melichizedeki naAbrahamu. ¹¹ Ngeshi maroghero ne kukona kupitera mughupristeri waLevite (mumwagho hanu hawanine muragho), ngo yinu munye yakarera eshi mupristeri ghakeyemo munyima dhoghukaro waMelichezedeki, nombadi wakumunongononitha kughukaro waAroni? ¹² Ngeshi kutjindja ghupristeri, muragho nagho wakona kughutjindja. ¹³ Koyu ha tongwerire yinu yi eshi yakara kudiko dimweya, oyu ghapira kurughana rumwe kuthinyaku. ¹⁴ Pano yakenenena eshi kutunda kwaJuda hanerekamo Fumu wetu, mukadiko edi gha pirire kutoya Mosesi kuhatera kughupristeri. ¹⁵ Eyi tuna kughamba ne yakenenena eshi ngeshi mupristeri mbo ghaneya muthishwi thaMelichedeki. ¹⁶ Mbadi yadhemenena pamuragho ghoyirughanitha eshi ghakarire mupristeri, ene yadhemenena pamangcamu ghomoyo ghororuhe. ¹⁷ Matjangwa ghashupa eshi, ''Gho mupristeri kuroruhe kukutha kumarawero ghaMelichizedeki.'' ¹⁸ Mbadi eshi marawero ghakare pithagho hatundithako yoyishi, mbadiko ngcamu nombadiko mudyo, ¹⁹ muragho mbadi watenda kehe thi ghuhunga ene hasha eshi makurupero na hayiyareka, kupitera mumeghero ghetu pepi naNyambi. ²⁰ Ndani no kupira medhero! Hamwe hakarire hapristeri ghupira medhero, ²¹ ene aye gha karire mupristeri kupitera medhero koghaghatamburire koyu ghayi ghambire kukwendi, ''Hekudyetu gha kwedhera nombadi mbo gha tjindja maghano ghendi: 'Ghomu pristeri kuroruhe.''' ²² Poyino Jesusi gha tapire makuruperithogho ghundambo mwene. ²³ Hapristeri hokare hakarire hengi muthivarero, no pamurandu ghoyifa eyi yawashwayithire mukutwara kughutho yirughana yawo. ²⁴ Ene pamurandu eshi Jesusi shime kupara kuroruhe, ghakara noghupristeri gho kukarererapo. ²⁵ Podigho eshi aye shime kukona kukomonona awa hana kuhenya kwaNyambi kupitera mumwendi, kuna kupara mukuwaghamberera. ²⁶ Yarikanyine kemo eshi tukare nomupristeri ghokemo, oyu ghapongoka, mbadiko murandu, ghakushuka, ghayakunuka kwawayiharuri, nohamuyeyura kuwiru dhomawiru. ²⁷ Mbadi ghanyanda, mbadi yira hapristeri hoshokuru, mukutapa muyambo gho kehe diyuwa, kutangerera ghomaharwero ghendi, ndani nomaharwero ghawanu. Gha konine kuyitenda rofotji mumakutapero ghendi thinda. ²⁸ Muragho wanegha yira hapristeri hashokuru awa hakara nomaghukashu. Ene nando dhomedhero, edhi dheya munyima dhomuragho, watorore Mwana, oyu ghapwire kuhungamitha kuroruheya.