¹ Kehe mupristeri shokuru, ghapwa kutorora mukatji kawanu, ghapwa kutorora mukukarerapo hanu muyinu yimwe yo kuhatera kwaNyambi, podigho ye gha kona kutapa yoyiheya yitapa nomuyambo gho maharwero. ² Aye kukona kuhumbitha thiwana no wa gha kara dinyatho noyu ghapwa kupemukitha, yoyishi naye thinda ne ghukashu wamupetha. ³ Pamurandu ghoyinu yi, naye karo gha kona kutapa muyambo kudiharwero dyendi thinda, thika edi gha tenda kumaharwero gha wanu. ⁴ Mbadi papendi thinda shi kehe yuno gha shimbe dikuto. Shimengwa, yu ghapwa kwitha kwaNyambi, thika Aroni. ⁵ Mundhira dhofotji, kemo Kristusi mbadi gha kufumanekire mukukutenda thinda mupristeri shokuru. Kemo, ghofotji ghana kughamba kukwendi ghuninga eshi, ''Yowe Mwanange; dyarero nakara nowiho.'' ⁶ Thika dyodi naye ghaghambire pamango ghamweya, ''Owene gho mupristeri kuroruheya munyima dho thika Melgisedeki.'' ⁷ Mumayuwa ghendi gho kupara, Kristusi ghatupire yoyiheya nomandapero noyikumbera nodiywi dyo kukugherera ghudira nomaruhodhi kwaNyambi, oyu ghapwire kumughamwena nokuyifa, gha muyuverire pamurandu ghoghuparo ghoghu Nyambi wendi. ⁸ Ngambi kenge gha karire mwana, gha kuhongire ghutawedhi payinyanda yendi. ⁹ Ghapwire kutenda mughushemwa nogha karire kemo, keheyu ghana kukara ghutawedhi nendi, muyipara yo mashutukero gho kuroruheya. ¹⁰ Ghamu turire po Nyambi mukukara mupristeri shokuru thika Melgisedeki. ¹¹ Tudi noyoyingi yo kughamba kuhatera kwaJesusi, ene ghukukutu mukuyitjwathanitha thika edi muna kara ghuthururu mukutuva. ¹² Ngami kemo poruno ruvedhe ne ngo mwa hongi, mwa nyanda ghumweya gho kumuhonga maveta nomayendithitho ghonando dhaNyambi. Mwanyanda manhwe mbadi yidya yo kukukwata! ¹³ Kehe yuno gho kunwa manhwe pithagho, mbadi gha kara noghudimuki gho kumbudhi dhodhihunga, yoyishi shime mwanuke. ¹⁴ Ene yidya yokukukwata ne shemwa yawakuru. Awa ne wa yoyishi hakuru no hakara nomadewero ghoku tjwathana no kuyakunutha ghuwa noghuyi.