¹ Munyima dhopo, thika di ghakara makuruperitho ghokungena mudyango dyendi dyomakuruperitho hapwa shime kutawedhera, tukoneke keho eshi ngo mbadiko ghumweya ghopapenu yu shoghathiyareko. ² Atwe ne hatutongwera mbudhi dhodhiwa thika wo. Ene mbudhi dhi ne mbadi dhaghamwenine wa ha hapirire kukara mumatawero pofotji nowa hadhi tawire. ³ Atwe twatawa ne kungena mumaturumuthero, thika di ghaghambire eshi, '' Thika di nedhere mughupata wange, mbadi mbo hangena mumaturumuthero ghange.'' Ngambi kemo, yirughana yendi yapwire kutunda kumavarekero ghokaye. ⁴ Popadi pa ghaghambire yokuhamena kudiyuwa dyoghukwoko noghuwadi: ''Nyambi ghaturumuthire mudiyuwa dyoghuko noghuwadi kuyirughana yendi. ⁵ Gha ghambire karo muthiparatjangwa thi eshi, ''Mdadi mbo hangena mumaturumuthero ghange.'' ⁶ Munyima dhopo, yina kukara kemo kwawamwena hakangene mumaturumuthero ghaya, nowa ha tangere kuyuva mbudhi dhodhiwa edhi hawayuvithere mbadi hakangeninemo pamurandu ghokupira ghutawedhi. ⁷ Podiyo Nyambi karo ghatororire diyuwa dimweya, nokuditha eshi, ''Dyarero,'' opa ghaghambire kupitera mwaDavita mumanando gha ghapwire kughamba eshi, '' Ngeshi muyuve diywi dyendi dyarero, mwakukutitha mitjima dhenu.'' ⁸ Ngo ghawa pire Joshuwa maturumuthero ne ngo mbadi gha ghambire karo Nyambi yodiyuwa dimweya. ⁹ Ghathiyarako keho maturumuthero ghosabata ghohanu waNyambi. ¹⁰ Oyu ghokungena mumaturumuthero ghaNyambi ne ghana kuturumutha karo kuyirughana yendi, thika di ghatendire Nyambi kuyighurana yendi. ¹¹ Ninge keho natwe tuhafere kangena maturumuthero ghaya, podiyo eshi noyofotji temba shoghawerere mumayerekero ghokupira ghutawedhi yira wo. ¹² Nando dhanyambi ne dhiyumi noshime ghadhipara no dhitwe kupitakana kehe dimende dyokurora kuwadi. Kuteta dyo ngambi pamakutawero ghomudhimu nomupepo, nomakunungero ghomushukwaghongo, no adho kukona kunongonona yighayara noyitambo yomutjima. ¹³ Mbadiko thivareka thokundeka kughutho waNyambi. Ene yoyihe yayandhuruka kumeho ghoyu twakanongwenena ghushemwa. ¹⁴ Kenge tudi nomupristeri shokuru oyu ghapita mumawiru, Jesusi mwana Nyambi, ninge tukwaterere kumatawero ghetu. ¹⁵ Mbadi twakara nomupristeri ghokupira kuyuva neke kughukashu wetu. Ene tudi nomunu ghumweya yu hayerekekire mumadhira ghomahe yira twe, aye ngenyu ne mbadiko diharwero. ¹⁶ Mutuyende keho noghutjima kudiputa dyoneke, podiyo eshi tu kawane neke dhokutughamwena mumanako ghoyinyanda.