¹ Yodiyo, mwayendhange ghokupongoka, mwa yerana kumethero ghomudiwiru. Mwakona kughayara yokuhamena kwaJesusi, mupostoli nomupristeri shokuru ghomatongweneno ghetu. ² Aye ghakarire ghutawedhi kwaNyambi, oyu ghamutororire, thika di ghakarire naye Mosesi ghutawedhi mumatungo ghomaheya ghaNyambi. ³ No fumwa dhaJesusi ne ghapitakana dhaMosesi, yoyishi muka kushokeka ndhugho ghakara nofumwa kupiterera ndhugho dhathinda. ⁴ Kehe dhino ndhugho ghadhishokeka munu ghumweya, ene oyu ghatenda yoyiheya ne Nyambi. ⁵ Yoyishi Mosesi ghakarire mupaka ghomutawedhi mu kehe ndhugho dhaNyambi, ghakarire mushupi kuhamena kuyinu eyi ha kughamba kughutho. ⁶ Ene Kristusi ne mwana ghomutawedhi oyu ghakara noghuraghuri ghomundhugho dhaNyambi. Atwe ne twandhugho dhendi ngeshi ku tuna tanara muma tjimapero no muma nongweneno agha twakununeka. ⁷ Yodigho, ya kara thika di gha yighamba mupepo ghokupongoka: ''Dyarero, ngeshi muyuve diywi dyendi ⁸ mwakukutitha dhimutjima dhenu thika di hanimanganyenine, muruvedhe romayerekero mumamboreya. ⁹ Eyi ne popa hanimanganyene hakerekandongo wenu mukuniyereka, nomumamwaka makumi mane , ha monine yiruwana yange. ¹⁰ Podiyo napatire nodiya diko. Na ghambire eshi, 'Mitjima dhagho dhakara kehe pano mumapemukero. Mbadi ha dimukire madhira ghange.' ¹¹ Po nedhere mughupata wange eshi: 'Mbadi mbohangena mumaturumuthero ghange.''' ¹² Mutakamithe, mwayendhange, podiyo eshi papenu mbadi pakare ghumweya ghomutjima ghoghuyi ghokupira kutawa, mutjima ghu wa thiya Nyambi ghokupara. ¹³ Ene mukutjokedhe kehe diyuwa, kenge yikara shi kuna kuditha eshi, ''dyarero,'' podiyo eshi noyofotji temba ghopapenu shoghapemuke kughuyi ghombango dhomaharwero. ¹⁴ Atwe ne tuna kara keho mumakupakerero ghaKristusi ngeshi hatukwaterera kumatjimapero ghetu ghomumwendi kutunda kumatangero kate kughuhura. ¹⁵ Koyi ghaghambire eshi, ''Ngeshi muyuve diywi dyendi dyarero, mwakukutitha dhimitjima dhenu, thika di mwa nimanganyene.'' ¹⁶ Hadye keho wa hayuvire Nyambi no kumwimanganyena? Mbadi wowa hatundire muEgiptena kupiterera mwaMosesi? ¹⁷ No hadye ghapatire mumyaka makumi mane? Mbadi nowa ha harurire, awa ya wererire yirama yagho yokufa mumamboreya ndi? ¹⁸ Kwadye ghedhere eshi mbadi mbo ha ngena mumaturumuthero ghendi, ngeshi ngo mbadi kowa hapirire ghutawedhi kukwendi? ¹⁹ Po tuna kumonena eshi mbadi hakonine kungena mumaturumuthero ghendi pamurandu ghokupira matawero.