¹ Podigho twa kona kutapa thikuma thinga koyi twayuva, podigho eshi mbadi tupemuke. ² Ngo ngeshi mbudhi edhi gha ghambire kwawaengeli ghadhi tanarithire eshi dhoghushemwa, no kehe ghuno murandu endi no kupira ghutawedhi kuwana mahumbithero, ³ ngepi ne keho gho kukona tuka keruke ngeshi tunyathe makomweneno ghomakuru? Agha ne makomweneno agha ha tangere kuyuvitha Fumu nohagha tanarithire kukwetu kupitera mowa hagha yuvire. ⁴ Paruvedhe rofotji Nyambi ghayi shupire muyi neghedhitho, noyitetukitha, nomuyitenda yongcamu, no pakutapera yitapera yoMupepo Mupongoki kukuthamahimeno ghendi. ⁵ Yoyishi Nyambi mbadi gha tapire kwawaengeli eshi mbo haraghure kaye aka kakeya, oka tuna kughamba. ⁶ Ene ayo ne, ghumwe kudyango dimwe gha kashupire ghughamnba eshi, ''Munu ne dye, eshi ghumu ghayare? Endi mwana munu, eshi ghumu pakere thinga? ⁷ Watenda munu ghakare kwishi kamanana kwaengeli; wamutungekire noghurwedhima nodikuto. ⁸ Watura yoyihe kwishi dhomapadhi ghendi.'' Papendi podigho ghatapere Nyambi yinu yoyihe muthinga thendi. Mbadiko ethi gha pirire kumupa. Ene keho mbadi tuna kumona yoyiheya eyi yidi kwishi dhendi. ⁹ Ene tuna kumona oyu gha tendire kwishi dhawa engeli pakapupi kamanana, Jesusi, oyu gha tungekire noghurwedhima nodikuto pamurandu ghoyinyanda noyifa yendi, podigho pathineke thaNyambi gha kona kufera hanu wahe. ¹⁰ No yaroyire kwaNyambi, yoyishi yoyihe yakarerapo papendi nokupitera mumwendi, mukureta hana hohengi kughurwedhima. Yaroyire kukwendi mukutenda mupiterithi wogho gho ma komweneno ghayarere muyinyanda yendi. ¹¹ Kwawo wahe oyu gho kupongora nowa hapongora hakara nondunderero dhofotji. Payinu yi aye mbadi ghana kukuyuva honyi pakuwatoya eshi mwayendhange. ¹² Ghana kughamba eshi, ''Ame mbo na yuvitha dina dyoye kwawayendhange, mbona kukughu we mwishi dho mbunga dhawatawi.'' ¹³ Karo shime, ''Mbona kurupera mumwendi.'' No karo shime, ''Mone yameno pano no hana awa hanipa Nyambi.'' ¹⁴ Podigho eshi, thika edi ha kuyarekera hanuke panyama nopamanyinga, ghakuyarekere moyo yinu mundhira dhofotji, podigho shi kupiterera muyifa gha kona kuhanyaghura no yu ghakara no ngcamu dho yifa, aye ne shatani. ¹⁵ Oyi ne ya karire kemo podigho shi gha kone ku shutura owa gha kara mughupika kupitera mughoma oyifa gha parire wo ghuparo wawo mughupika. ¹⁶ Mughushemwa aye ne mbadi ghahamwene gha engeli, ene Abrahamu no hana hoka wendi. ¹⁷ Podigho shi ya royire kukwendi mukukupitura nawayendhendi muyoyi heya, podigho shi gha kare mupristeri Shokuru gho thi neke no mughunga kughatera kuyinu ya Nyambi, ndani podigho gha kutenda makurupero gho kushemwathanitha maharwero gha wanu. ¹⁸ Yoyishi Jesusi naye thinda gha nyandire no ghamuyerekire, aye kukona kughamwena awa ghadi mumayerekero.