¹ Yodiyo, karo twapa kudhingumutwedha nodivuyi dyodikuru dyawatunonga, tuthiye kehe ghuremu nomaharwero agha ghatudhingumutwedha. Tutjire nomadhidhimekero kumushupu ghu ha tu turekera ko kughutho. ² Tutape thinga thetu kwaJesusi, yodiye mutoti no muhungeki gho matawero ghetu. Kuyishamberera eyi hamu turerapo kughutho wendi, gha dhidhimekire kuyifa pathikurushe, mbadi gha pakireko thinga kuhonyi edhi ha muretere, nogha hungumana kurudyo rodipuna dyaNyambi. ³ Yodiyo eshi mughayare kuhatera kukwendi, ghofotji oyu gha dhidhimekire eyi hamwimanganyine haraghuri, podigho eshi mbadi mwa kona kukasha nokukashitha mitjima dhenu. ⁴ Mbadi muna shayekitha endi kurwa nodiharwero kate panaro dhomanyinga; ⁵ nomuna vurama matjokedhero agha hamu rawera shi mwahana: ''Mwanange, mwa shimba mahumbithero ghaNyambi ghuredhu, endi kughaya ngeshi kuna kukughorora ye. ⁶ Fumu ne kuhumbitha yu ghahaka no kuhumbitha kehe mwana oyu gha tambura.'' ⁷ Dhidhimeke yinyanda yira yihumbithitha. Nyambi gha mutenda yira hana. Endi poghadi mwana oyu ha dhiranga kuhumbitha kwawihe? ⁸ Ene ngeshi mwene mbadiko mahumbithero, omu hana pitanga waheya, gho mukare eshi mbadi mwahanendi gho ghushemwa. ⁹ Kughutho, twa kara no ha wihetu ho pakaye awo kutuhumbitha twe notwawa kutekera. Ngepi keho sho tukare ghutawedhi kwawihetu gho mupepo notupare! ¹⁰ Hawihetu ho pakaye kutuhumbitha pakanakoghana momuhana kughayarera eshi ghuwa. Ene Nyambi kutuhumbitha momumaghuwa ghetu, yodiyo shi tukuyarekere ghupongoki wendi. ¹¹ Mbadiko mahumbithero poro ruvedhe gho kureta yishamberera, ene kutera tjitju. Ene munyima ghuna kuyangura mbuyo dhothiraro dhoghuhungami kowa hapwa kudeghura. ¹² Yodiyo eshi tanarithe nyara dhoye edhi dhina kasha no manwi ghoye agha ghana kasha. ¹³ Tende mapadhi ghoye gha ghororoke mundhira, podigho eshi hayirema ne mbadi haremane ene heruke. ¹⁴ Shane thiraro nakeheyu, noghupongoki, kupira yi mbadiko yu gha kamona Fumu. ¹⁵ Mutakamithe eshi mbadiko yu sho ghapire thineke thaNyambi, no eshi dhakura midhi dhodhiruru dhirete ghukukutu, podigho eshi hohenge mbadi hayipe kukwadho. ¹⁶ Mukoneke eshi keheyu gho rungu endi kupira dikuto kuyinu yo kupongoka, tuninge shi Esaghu, oyu ghaghurithire ghumbedi wendi diyuwa dyofotji pamurandu gho mughondhera. ¹⁷ Tuna yidimuka eshi kutunda po, apa gha rurire kuyora matungekero ghendi, ghapwire kushweneka, yoyishi mbadi ghawanine kambenene kokukuthighura, ngambi kenge ghayi shanine nomahodhi. ¹⁸ Mbadi mweya kudirundu dyo kukona kukundama, dirundu dyo kwekeshera mudiro, dikokore, kupira makurupero, nodingundunga. ¹⁹ Mbadi mweya kukushigha marumbendo, endi kudiywi dyo kughamba haka kuyuva hana kukumbera eshi mbadiko nando dhimweya edhi hawa ghambitha wo. ²⁰ Mbadi ha konine kudhidhimeka kumarawero: ''Ngeshi ngambi gha thikundama thiyama kudirundu, ha kona kuthipagha nomawe.'' ²¹ Eyi ne yiyapithitha dyo gha yimonine Mosesi dyo ghayighambire eshi, ''Amene nayapa nokuna kututuma.'' ²² Mundyango dyo, muneya kudirundu dyaZiyoni nombara dhaNyambi ghomuyumi, Jerusalema gho mudiwiru, nomayovi dikumi ghawa engeli muyishamberera. ²³ Mweya kumakupakerero ghawa mbedi, awa hapwa kutjangitha mudiwiru. Mweya kwaNyambi, mupanguri wawahe, nokudhimipepo dhawahungami awa hapwa kuhungeka. ²⁴ Mweya kwaJesusi, mitakatji ghoghundambo ghoghupya, no kumatjakero ghomanyinga agha ghana kughamba kupitakana manyinga gha Abeli. ²⁵ Mone eshi mbadi ghushwene koyu ghana kughamba. Ngo mbadi homborokire apa ha shwenine kuwa konekitha wo pakaye, mbadi sho tukona kwomboroka ngeshi tushwaghe koyu ghana kutukonekitha mudiwiru. ²⁶ Paruvedhe rumwe, diywi dyendi kunyunga kaye. Ene pano ghana tutoyedhera no kughamba eshi, ''Paruvedhe rumweya mbadi na kunyunga kaye pithako, ene nodiwiru karo.'' ²⁷ Agha manando, ''Ruvedhe rumweya,'' kuna kutamba kushwayithapo yinu yokukunyunga-nyunga, yodiyo, yinu eyi yapwa kuvareka, podigho eshi yinu yo kupira kukunyunga-nyunga ya kukarerepo. ²⁸ Podigho eshi, mutambure ghufumu gho kupira kukunyunga-nyunga, tukare nomatawero nomuhingo ghu tufumaneke Nyambi nowoma noyitetu. ²⁹ Oyu Nyambi wetu ne gho mudiro gho kwanitha.