¹ Matawero ne ghodiyo makurupero agha ghatanarera payinu eyi tuna kutaterera, noghushemwa ghoyinu eyi tuna kupira kumona. ² Yodiyo modyiyo hawanene hakerekandongo wetu ghuhungami kwaNyambi. ³ Pamatawero twa dimuka eshi kaye gha kavarekire pamarawero ghaNyambi, Yodiyo eshi, yinu yokumona ne mbadi ya tundire kuyinu neyi tuna kumona. ⁴ Matawero ne ghodigho waningithire Abeli gha tape muyambo mwene kwaNyambi kupiterera waKayini, pamatawero ghamuyire eshi munu gho muhunga, Nyambi ne gha menya-menyene muyambo dhendi, no pamatawero ghogho ghofotji ghana kumughambitha pashadyarero ngambi kenge ghafa kare. ⁵ Pamatawero ghodigho hashimbirepo Henoku ghuyumi mbadi ghawanine kufa. ''Mbadi ha muwanine kumweya, yoyishi Nyambi ghamu shimbire.'' Kughutho gho kumushimba, hanongononine eshi gha shambererithire Nyambi. ⁶ Ngeshi ha ghupiri matawero ghukukutu muku mushambereritha ye. Yoyigho eshi keheyu ghana kwiya kukwendi ghakona kutawa eshi koghadi no aye karo eshi kuruwera awa hana kumushana. ⁷ Pamatawero ghaNowa, ghafumanekire Nyambi nogha karire ghutawedhi kumatjokedhero gho kuhatera yokughutho eyi ya pirire kuhokoka, eye gha karire ghutawedhi kwaNyambi, pogha tendire dyato edi dyaparithire hendi. Payitenda yo kemo, pogha katetere kaye pogha wanene ghuyori ghoghuhungami kukutha matawero. ⁸ Pamatawero ghogha muningithire Abrahamu, apa ghamwithire, ghakare ghutawedhi ghayendire kuditunga edi gha shanine kumupa dikare ghupingwa wendi. Gha yendire, oku mbadi gha dimukire eshi kupi ghana kuyenda. ⁹ Pamatawero pogha ghatungire muditunga dyomatoyedhero yira mutundakure. Gha tungire muyishashara naIsaki naJakopu, awa ha yorire pofotji nendi matoyedhero ghofotji. ¹⁰ Aye gha rurire thikuma mbara edhi dha tanara kashema ndhugho kadho, naNyambi yomatangero nomutendi wadho. ¹¹ Pamatawero, naSara thinda gha karire mbumi, Abrahamu gha konine kuwana ngcamu dho kukara wiha. Eyi yakarire ngambi kenge eshi myaka dhendi kupitakana ruvedhe rwendi rokureta, dyo gha dimukire eshi aye ne gha kuruperire Nyambi oyu ghayi mutoyedherire. ¹² Yodiyo, kutunda kwamunu ghofotji-no momu ghafe-gherekire hanahoka hohengi yira tutumwedhi totwingi muwiru no mbadi nombadi wa kukona kuwatara yira muve gho kumbadi dho dikuruviya. ¹³ Mumatawero wahe hafire nombadi ha wanine matoyedhero ghawo. Mudyango dyo kuninga eshi hayimone no kumorora oku shime kayenda hadi, awo hayitamburire eshi hanumaghana no hamutundakure pakaye. ¹⁴ Kowa hokughamba yinu yi kuyikenitha eshi kuna kushana wo ditunga dyo kakoghatji. ¹⁵ Ngeshi ha ghayarire ditunga edi ha shwayire, ngo roruvedhe hawanine rokuhuka. ¹⁶ Ene thika edi yidi, harumberire ditunga dyohashako, adyo ne, dyomuwiru. Podigho Nyambi mbadi ghana kukuyuva honyi mukumwitha ye eshi Nyambi wawo, thika edi ghawa royithera mbara. ¹⁷ Pamatawero ghaAbrahamu, ruvedhe oru hamukonakonine, gha tapire Isaka. Yomwanendi ghokatughuru ghopithendi yogha tapire, oyu ne yogha wanine matoyedhero. ¹⁸ Aye ne Abrahamu yu hayi tongwere eshi, ''Kupitera mwa Isaka hanahoka ghoye dyombo hawetha.'' ¹⁹ Abrahamu gha ghayarire eshi Nyambi kukona kutumuna Isaka muyifa, muyighamba yimweya, kutunderera kukwagho gha muwanine karo. ²⁰ Pamatawero karo yinu yi yeyire eshi Isaka gha kandadheka Jakopu naEsaghu. ²¹ Pamatawero pogha Ninga Jakopu, ruvedhe ro kuyenda kuyifa, gha kandadhekire kehe yu mwana Josefu. Jakopu gha fumanekire, oku ghana fumbera kumutagha wendi. ²² Pamatawero gha Josefu, ruvedhe roghuhura gho yipara yendi eshi pepi rudi, gha ghambire yo mashwaghero gho hana waka Israeli gho kutunda muEgiptena no kuwarawera yo kuhatera kuyishokora yendi. ²³ Pamatawero gha Mosesi, ruvedhe ro kumushamuruka, gha pwire kuhoreka tughonda tuhatun kwawakuru wendi yoyishi hamonine eshi mwanuke ghomuwa. Awo mbadi hayapire marawero ghaFumu. ²⁴ Pamatawero ghaMosesi, munyima dho kukura kwendi, gha shwenine kumwitha eshi mwikurwa Faragho. ²⁵ Gha torore muku mupetha pofotji nohanu waNyambi kupiterera yishamberera yo maharwero yo kapupi kamanana. ²⁶ Gha ghayarire eshi dishamu dyo kukutha Kristusi gho ghushwi gho kupiterera kupitakana ghutungi waEgiptena. Aye gha kambekedhire meho ghendi kuyiruwera. ²⁷ Pamatawero ghaMosesi gha shwayire muEgiptena. Mbadi gha yapire ghupata wafumu, gha dhidhimekire yira kuna kumona yu ghana kudhira kumona. ²⁸ Pamatawero gha pungurire Pasika nokutjakera manyinga, podigho eshi muyipithi wawambedi maghana gha kundama hambedi wawa kaIsraeli. ²⁹ Pamatawero hapitire kupitera mudikuruviya dyombu yira parundanda. Ruvedhe ro hayerekire haka Egiptena hadhipite, hapwire kumina kumeyu. ³⁰ Pamatawero ghokemo dikuma dyaJeriko dyawire, munyima dho kudhinguruka mayuwa kwoko nomawadi. ³¹ Pamatawero gho kemo Rahabu gho mukarungu mbadi ghafire nowo hapirire ghutawedhi, yoyishi gha tamburire tundhaya muthiraro. ³² Yinu munye yoyingi eyi shoni ghambe? Ruvedhe runa kunipwera ngeshi nighambe yo kuhatera kwaGidiyoni, Baraka, Samusoni, Jefuta, Davidi, Samuweli, ndani kuhatera haporofeta. ³³ Mumatawero hawanine maghufumu, hakuturire mughuhungami, nohawanine matoyedhero. Hayendherire tunwa to nyime, ³⁴ hadhimithire mangcamu gho mudiro, hombire mamende, herukire kuyikorwa, hatanarire muyita, no ha withire mashurundate ghawa mutundakure. ³⁵ Hakamadi hawa hutherire hafu wagho mumuvumbukero. Hamwe ne hawa shinyine, mbadi ha tamburire eshi hawa shwayith, yoyishi hawane muvumbukero gho hashako. ³⁶ Hamwe hawa sherere no kuwa mwashura no kuwaghanga nomenge no kuwakwata munwato. ³⁷ Hawa paghire nomawe. Hawa tetire notjaha pakatji. Hawa paghire noyimende. Hayendaghurire muyikukumba yondjwi noyikukumba yonombo. Hakarire mukunyanda. Hawa nyekererire no kuwapetha momumango. ³⁸ Kaye mbadi ka karire mudyo kukwagho. Hakarire kuna kurenda-renda mumamboreya nomumarundu nomumangurungoma nomumakwina. ³⁹ Ngambi kenge eshi hanu wahe wa hapwire kutambura kwaNyambi pamurandu ghomatawero ghawo, mbadi ha wanine matoyedhero. ⁴⁰ Nyambi gha rongathanine yinu yo hashako yokukwetu, podigho eshi kupirapo twe ngo mbadi mbo yi kumenenamo.