¹ Muragho ne mudhidhimbi ngenyu ghoyinu yoyiwa eyi yakwiya, mbadi yineghedhitho yoshemwa ghoyo yinu yathinda. Awa ho kuhenya kwaNyambi ne mbadi mbo hawa royithera pandupu edhi ha retanga hapristeri kehe mwaka. ² Shimengwa, ngo mbadi dha shayekire ndupu kudhitapa? Awa haka kundupura ne ngo hawa kushura parofotji no ngo mbadi wakukara noyighayadhara yodiharwero. ³ Ene nondupu dhi ne kutuvurukitha maharwero kehe ghuno mwaka. ⁴ Ghukukutu shemwa manyinga ghomandwedho nonombo ghashwayithepo maharwero. ⁵ Apa gheyire Kristusi pakaye, ghana ghambire eshi, ''Mbadi washanine ndupu nomiyambo , ene yirama eyi wani royithere; ⁶ mbadi wahakire ndupu dhokutumekera nondupu dhomaharwero. ⁷ Kokuninga kwange eshi, 'Mone, yame yuno-thika edi hayitjanga yo kukwange mumbapira-nitende, Nyambi, mahimeno ghoye.''' ⁸ Pakutanga ghaghambire eshi, ''Mbadi wahakire ndupu, endi miyambo, endi miyambo dhokutumekera, endi miyambo dhomaharwero. Owene mbadi wadhihakire.'' Edhi ne miyambo edhi hayambanga kukutha kumuragho. ⁹ Kokuninga kwendi eshi, ''Mone, yame yuno nitende mahimeno ghoye.'' Ghashwayithapo miyambo dho kutanga podigho eshi gha turepo muyambo ghoghuwadi. ¹⁰ Pamahimeno ghaya twapa kukushura kupitera mumuyambo ghoyirama yaJesusi Kristusi parofotji nokuroruheya. ¹¹ Kehe mupristeri ghemana kehe diyuwa ghayuvithe, ghutapa miyambo dhofotji kehe pano-miyambo dhokupia kutundithapo maharwero. ¹² Ene apa gha tupire Kristusi muyambo ghofotji ghomaharwerokuroruheya, gha hungumanine kurudyo rwaNyambi. ¹³ Aye kuna kutaterera kate gha ture hanore dhendi kuthidjatero thomapadhi ghendi. ¹⁴ Pamuyambo ghofotji gharoyitha kuroruheya awa hapwa kukushura. ¹⁵ Mupepo gho kupongoka naye ghashupa kukwetu. Pakutanga ghaghamba eshi, ¹⁶ ''Oghu ne gho ghundambo nakutenda nawo kughutho ghomayuwa gho, ghaghamba Fumu. Mbo na tura miragho dhange mumitjima dhawo, no mbo na dhitjanga mumaghano ghawo.'' ¹⁷ Gha wedhera karo eshi, ''Mbadi mbo ni vuruka no kamanana temba maharwero ghawo nomaghuyi ghawo.'' ¹⁸ Pano oku kudi mathiyerero gho yinu yi ne, mbadiko keho kehe ghuno muyambo ghodiharwero. ¹⁹ Apano keho, mwayendha, tuna wana matjimapero gho kungena mudyango dyokupongoka thikuma pamanyinga ghaJesusi. ²⁰ Odhi ne dhondhira dhodhipya dhomoyo odhi gha tuturitherapo kupitera padikehe, ayo ne, kupitera payirama yendi. ²¹ Yoyishi twakara nomupristeri shokuru mundhugho dhaNyambi, ²² ninge mutuhenye kwaNyambi nomitjima dho kukushuka nomatawero gho kuyara, ghukenitha dhimitjima dhetu dhikene kuyighayara yoyimango no kukenitha yirama yetu nomeyu ghokupira kunyata. ²³ Ninge natwe tukwaterere ghupira kutamangera kumakurupero agha twa tongonona, oyu gha tu kuruperithire ne wamakurupero. ²⁴ Muninge tukenge eshi ngepi edi sho tukutjokedhe twathinda mukuhaka hoyirughana yoyiwa. ²⁵ Twashagheka kukuwana pofotji, thika edi hatenda hamweya. Ene, mutuku tjokedha tjokedhe rorwingi, opa muna kumona diyuwa dina kuhenya popepi. ²⁶ Ngeshi tutwikere kuharura muwina oku ne twawana ghudimuki ghoghushemwa, mbadi twa kukara karo nomuyambo ghomaharwero. ²⁷ Ene, kothidi ngenyu thitatereramo thowoma thomapangwero, noghupata gho mudiro oghu wakumina hakanore dhaNyambi. ²⁸ Kehe yuno ghashwena muragho waMosesi ne ghana kufa kupira thineke paghushupi gho hawadi endi hahatu. ²⁹ Mahumbithero gho kuhura kupi ghuna kughayara gha roghera yu gha djata nomapadhi Mwana Nyambi, oyu gha tendire manyinga ghoghundambo yira mbadi gha pongoka-nokutharuka mupepo honeke? ³⁰ Twa dimuka twe oyu ghaghambire eshi, ''Amene nakara nongcamu dhokuhutha awa hani yipithera; mbo na hutha.'' No karo, ''Fumu Fumu mbo ghana pungura hanu wendi.'' ³¹ Kuyapitha shemwa ngeshi ghuwere munyara dhaNyambi ghokupara! ³² Ene muvuruke mayuwa ghokare, apa gha mukumithire Nyambi kuthishe, ngepi edi mwa dhidhimekire muyikondja yoyikuru muyinyanda. ³³ Hamushererire mumatuka nomumakutha-kuthero, nomwakutaperire no mwa pitire mumanyando ghofotji. ³⁴ Mwa fererire neke haka notwa, nomwatamburire noyishamberera awa hashimbire yinu yenu. Mwa dimukire eshi amwe mwathinda ne mwakara noyinu yohasha yokutotuheya. ³⁵ Mbadi mumwaghe keho ghutjima wenu, oghu wakara nondjambi dhodhikuru. ³⁶ Amwe mwa nyanda madhidhimekero podigho eshi apa mwakutenda mahimeno ghaNyambi, nanyi mwa kuwane eyi gha mu toyedhera. ³⁷ ''Kapupi kamanana, oyu ghana kwiya mbo ghaneya yashemwa nombadi sho gha dhiyame. ³⁸ Hahungami wange mbo hana para pamatawero. Ngeshi hana huka munyima, mudhimu wange mbadi sho ghu shamberere nendi.'' ³⁹ Ene atwe ne mbadi yatwe ya twa hukanga munyima kumaharanganyeno, ene twe ne pofotji nowa ha kara no matawero no kukunga midhimu dhawo.