¹ Ngambi kenge ghundambo gho kutanga wakarire nomayendithitho ghomakuyero nodyango dyokupongoka dyopamuve. ² (Tabanekeri) Ngonda dhokupongoka dhopamuve dhapwire kuroyitha. Ngonda dhokutanga, omu mwakarire yimaneno yomashera, tishi, nomaghuroto ghomuyambo, hayitoyire eshi dyango dyokupongoka ³ Munyima dhodikehe dyoghuwadi mwakarire ngonda dhimweya edhi dhapiterire kughupongoki. ⁴ Dya karire nothinyaku tho ngorondo thothiwe thomuyambo. Dya karire karo nodimbangu dyoghundambo, edi dyapwire kuyenga nongorondo. Mwishi dhadyo mwakarire kandimbe ko ngorondo omu mwakarire mana, mutagha waAroni oghu wahokire, nomawe ghoghundambo. ⁵ Pawiru dhodimbangu dyoghundambo, hakerabimu hokurwedhima hambire mando ghawo kumuhuko gho mashemwathanitho, eyi sho tupire kukuyonga pano mumatemweneno. ⁶ Munyima dho kuroyitha yinu yi, haruti kehe pano nga hengenanga mungonda dhopanunda dhokupongoka ghaka rughane ghukareri. ⁷ Ene muruti shokuru ngenyu ngengenanga mungonda dhoghuwadi, rofotji mukehe mwaka, ene mbadi wa kuthigha manyinga agha ghaku djumbera thinda nokumaharwero ghawanu ghashipiri kuhima. ⁸ Mupepo gho kupongoka wa neghedhire eshi kenge yikara shi ngonda dho kutanga dhokupongoka shime dhemanena mundhira dhodyango dhokupiterera ghupongoki mbadi dhina hokoka. ⁹ Eyi ne kwaneghedhire yonako dhonanyi-nanyi. Yoyihe, ndupu nomuyambo eyi tuna kutapa kengeno mbadi wakukona kughorora yighayara yamukuyi. ¹⁰ Awo thinga thagho ne yidya noyinwa noyirika yokukuyogha, mayendithitho ghoyirama kate ruvedhe romarawero ghomapya. ¹¹ Kristusi kweyire eshi muruti shokuru muyinu yoyiwa eyi yineya. Aye gha piterere mungonda dhokupongoka dhodhikuru edhi ghapira kutenda munu, kuninga eshi mbadi dhopakaye. ¹² Mbadi nomanyinga ghonombo endi ghondana, ene mumanyinga ghendi thinda ghengenine mudyango dyokupiterera kupongoka rofotji kuroruheya no gha rikanyithire makomweneno gho roruheya. ¹³ Ene ngeshi manyinga ghonombo noghomandwedho no kuwatuna mututwi ghomandema powa hadhiropa kuwapongora nokukushura yirama yawo, ¹⁴ parungatji keho manyinga ghaKristusi, oyu gha piterire pamupepo ghokupongoka ghakutapire thinda mukupira maharwero kwaNyambi, mukukushura yighayara yetu yitunde kuyirughana yokufa turuwanene Nyambi ghomuyumi? ¹⁵ Pathitambo thino, Aye yomitakatji ghoghundambo ghoghupya. Eyi ne kemo, kutunda apa yahokoka yifa mukukomonona awa hakara mwishi dhoghundambo ghokutanga kutunda kumareghero ghawo ghomuragho, awa hapwa kwitha mbo hana wana makuruperitho ghomayorero ghororuhe. ¹⁶ Apa padi mahimeno, yifa yamuka kutenda mahimeno gha ghakona kukara mughushemwa. ¹⁷ Yoyishi ndhagho mudyo ngenyu ngeshi yifa yina hokoka, yoyishi mbadi dhakara nongcamu oku thinda oyu gha dhitendire ne shime muyumi. ¹⁸ Ngambi ghundambo gho kutanga mbadi ha ghupakire po pahana manyinga. ¹⁹ Ngambi apa gha tapire Mosesi marawe gho kehe muragho kwawanu wahe, ghashimbire manyinga ghondana noghonombo, nomeyu, wanda ghoghukihu, ndani kukutuna mbapira dhathinda nohanu wahe. ²⁰ Poghaghambire eshi, ''Agha ne manyinga ghoghundambo oghu ghana murawera Nyambi.'' ²¹ Mundhira dhofotji, ghatjakerire manyinga mungonda ghokupongoka ndani yindini yoyihe eyi ngaha ruwanithanga muyirughana yo ngirishe. ²² Kukutha mumugho, yira kehe yinu yapwire kukushura mumanyinga. Ngeshi mbadiko manotokero ghomanyinga mbadiko mathigherero. ²³ Podigho yakarire mudyo yipitura yoyinu yomudiwiru hayikushure nondupu dhoyiyama yi. Ngambi kemo, yinu yomudiwiru yathinda hayi kushukithire nondupu dho hashako. ²⁴ Kristusi mbadi ghengenine mudyango dyokupingoka thikuma edi hatenda nonyara, eyi yidi eshi yipituritha yodyango dyoghushemwa ngenyu. Aye ghengenine mudiwiru dyathinda, gha kuhokore kughutho waNyambi pamurandu wetu. ²⁵ Aye mbadi ghayendireko muka kutapa thinda rorwingi, yira thika edi gha yitendanga muruti shokuru, oyu gha ngenanga mungonda dho kupongoka kehe ghu mwaka nomanyingaghothimweya. ²⁶ Ngo kemo yakarire, Aye ngo ghanyandire rorwingi kutunderera kumatatekero ghokaye.Ene pananyi-nanyi Aye ghana kuhokora kughuhura ghomahurero mukushwayithapo maharwero pakukara thinda ndupu. ²⁷ Yira kenge hamuhimena munu mukufa rofotji, ndani keya matetero ndhango, ²⁸ kemo, Kristusi hamuyambire parofotji mukutundithapo maharwero ghawengi, ndani nanyi gha kuhokoke paruwadi, mbadi mukuna tunditha maharwero, ene makomweneno kowa hana kumutaterera.