¹ Mutware kughutho noruhakitho roghuyendha. ² Mbadi mwa kona kuvurama kutamburanga hagendaKupitera moyi, hamweya ha tamburire ha engeli ghupira kuyidimuka. ³ Muvuruke hakanotwa yira pofotji hamuwanga nawo. Muvuruke awa hana kunyandeka yira yoyamwe hana kupetha. ⁴ Muninge yomuheya gha kutekere yiyeka, nomutende ghudidi gho yiyeka ghukare ghuna kushuka, yoyishi Nyambi mbo ghana ka pangura hanu ho rwiho no horungu. ⁵ Muninge yiparitha yenu yiyakunuke kukuhaka masherenyi. Muhedhumuke koyi mudi nayo, yoyishi Nyambi thinda ghaghambire eshi, ''Mbadi mbo ni muthiya me, no mbadi mbo ni mumwagherera me.'' ⁶ Twa kona kuhedhumuka podigho eshi tukare noghutjima gho kughamba eshi, ''Nyambi ne mughamweni wange, mbadi thi shoniyape. Yinye gho kunitenda me munu?'' ⁷ Muvuruke hapiterithi wenu, awa ha muyuvithre manando ghaNyambi, nomushimbe thitamenedhi kuyiparitha yawo. Mutamenene matawero ghawo. ⁸ Jesusi Kristusi ne yodiye peghundha, dyarero, nokuroruheya. ⁹ Mbadi mwa eshi hamu pemukithe kukeheyihonga yo yayonayo. Ene ghuhunga eshi mutjima ghupwe kutanaritha pathineke, nombadi payidya eyi yina kupira kughamwena awa hana kuyikutha. ¹⁰ Twakara nothinyaku (Altare) thokowa hana kurughana mutembeli (Tabanakeri) mbadi hakara mukudya. ¹¹ Nomanyinga gho yimuna eyi hapagha yomaharwero kughareta mupristeri shokuru mudyango dyokupongoka, oku yirama yayo ne kuyitumekera panunda dhombara. ¹² Podigho Jesusi ghanyandire panunda dho dikorogho dyombara, podiyo gha kushurire hanu kupitera mumanyinga ghendi thinda. ¹³ Tuyendene keho kukwendi panunda dhaombara, mukushimba dishamu dyendi. ¹⁴ Podiyo eshi mbadi twa kara nombara dhokukarererapio pano. Ene kuna kutaterera kodhi dhina kwiya. ¹⁵ Kupitera mumwendi, mutuninge roruheya tutape miyambo dho makughero kwaNyambi, makughero ghombuyo ghopamiromo edhi dhina kunongonona dina dyendi. ¹⁶ Mbadi twa kona kuvurama mukutenda ghuwa no kukuyarekera, payikudjambera yokengeyo yogha menya-menyena Nyambi. ¹⁷ Mukare ghutawedhi no mukutape kwawapiterithi wenu, agho ne ho hana kukoneka midhimu dhenu yira awa mbo ha katapa ghushupi. Muwatawe podigho eshi hapiterithi wenu hayi rughane yi noyishamberera ene mbadi ghutonga, eyi mbo yipira mudyo kukwenu. ¹⁸ Muturapererithe, atwe tuna tjwathana eshi twa kara noyighayara yoyiwa notwashana tupare mughuhungami muyinu yoyiheya. ¹⁹ Na kumutjokedha thikuma mukuyirughana yi podigho eshi naka huke wangu kukwenu. ²⁰ NaNyambi ghothiraro, oyu gha tumunine mukufa mudithi shokuru ghondjwi, Fumu wetu Jesusi, pamanyinga ghoghundambo gho roruheya, ²¹ gha mutende nokehe thinu thothiwa eshi tutende mahimeno ghendi, mukurughana mumwetu eyi ya mushambereritha, mwaJesusi Kristusi kukwendi dikuto kuroruheya nororuheya. Ameni. ²² Pano kuna kumutjokedha, mwahakwa, mukushimba manando gho matjokedhero agha nga ni mutjangera nanyi-nanyi. ²³ Mudimuke eshi minetu Timoteghusi ne ngaha mushutura, oyu nakuna mona nenu ngeshi ghakwiye wangu. ²⁴ Mutape dirumeritho kwawa piterithi wenu waheya ndani nokwawanu ho kupongoka wahe haNyambi. Haka Itali hana mumororapo. ²⁵ Muninge thineke thaNyambi thikare nenu mwahe.