¹ Oyi ne yo gha ni neghedhire Fumu Nyambi. Na monine kakote kombuyo! ² Gha nipurire eshi, ''Nye ghuna kumona, Amosi? Na huthire eshi, ''Kakote kombuto.'' Podiyo gha ghambire kukwange Nyambi eshi, ''Ghuhura ne ghuneya ko hanu wange hakaIsragheli; mbadi shonipire kuwa humbitha karo. ³ Membo ghomutembeli ne nanyi ghakukare madiro modiya diyuwa- oyi ne yo gha ghamba Fumu Nyambi- mwimba ne nanyi dhakukare kokuhe, no hanu ne mbadiko yi ha kughamba apa hakudhishimba. ⁴ Mutegherere ko yi, amwe mwa djata haka kunyanda nokushwayitha hahepwe pamango ghawo. ⁵ Kwipura wo eshi, ''Ruvedhe munye kakuterama kaghonda, podiyo eshi twa kughurithe mbuto karo? Ruvedhe munye dya kupwa diyuwa dyoSabata, podiyo eshi twa kughurithe mavumbukiro. Nanyi twakutende yimetitha yikare yimbiru nokuwedherera paro, twa kuwa hongaghure noyimetitha yoghumbango. ⁶ Podiyo eshi twa kughurithe mavumbukiro ghomamamango, no kughura hahepwe no silveri, ndani hakakunyanda no yisandari.'' ⁷ Nyambi ne ngedhera padikuto dyaYakopu, ''Yashemwa mbadi mbo ni vurama yitenda yawo.'' ⁸ Mbadi kakukina kaye ko yi, ndani kehe yuno gha tunga mo ghakudire ndi? Kokahe nanyi ka kuyeyuke yira rware rwaNile, no nanyi ka kuhuke karo, yira rware rwaEgiptena. ⁹ ''Nanyi ya kuhokoke modiya diyuwa- oyi ne yo ghana ghamba Fumu Nyambi- nanyi nakutokerithe diyuwa pamitaha, no nanyi nakuture dikokore pakaye oku mutenya ghudi ko. ¹⁰ Nanyi na kutjindje mayuwa ghenu ghomafeste kudiguvo no membo ghenu ghomahe kumadiro. Nanyi nakumutendithe mwahe muvate yitere yoshaka nomukare nongwara pa kehe mutwi. Nanyi na kuyitende yira kuna kudirera mwanoye ghopithendi ghokatughuru yu ghana fu, no diyuwa dyodiyi kate kughuhura. ¹¹ Mumone, ghana kumu mayuwa- oyi ne yo gha ghamba Fumu Nyambi- opa na kutuma diyerenge muditunga, mbadi diyerenge dyoyidya, endi dyo dinota dyomeyu, ene dyokuyuva manando ghaNyambi. ¹² Nanyi ha kuyende tunda dikuruviya yenda dikuruviya; nanyi hakutjire kutunderera kuditokera kate kudiva hashane nando dhaNyambi, ene mbadi ha kudhiwana. ¹³ Modiya diyuwa, hakamadighana hohawa nohangaghughana nanyi ha kupwerere kudinota. ¹⁴ Awa hedheranga pamaharwero ghaSamariya ghu ninga eshi, ''Kenge gha para nyambi ghoye we Dani; ndani, 'Kenge dhakarapo ndhira dhokuBeresheba'- nanyi ha kuwe no mbadi mbo ha pinduka karo.''