¹ Oyi ne yogha nineghedhire Fumu Nyambi. Mumone, gha tendire dimba opa ya tangire kumena yimena, ndini, mukenge, yimena yomunyima oku mukesho wafumu ne ghuna shwagha mo. ² Opa dya manine kudya yimena yoyihe yomuditunga, podiyo naghambire eshi, ''Fumu Nyambi, nakanderera tuthiyerere po; ngepi shotupare twe twakaIsragheli? Twambiru twe no mbadiko ghokutughamwena.'' ³ Nyambi ghatjindjire maghano ghendi no ghambire eshi, ''Mbadi ya kuhokoka karo.'' ⁴ Ghoyine yodiyo ghaninedhire Nyambi.Kenge,Fumu Nyambi gharughanithire mudiro mukupangura hanu.Muthimonekera namonine eshi mudiro wakukutithipo meyu pamuve popahe ndanine yatumekire yinu yoyihe pamuve. ⁵ Podiyo nadirire',Fumu Nyambi ghowihetu,nakanderera shaghekithe yinu yi atwe twaka Israeli tunapiri maghamweno, ngepi shotukone kupara?'' ⁶ Ndanine Nyambi ghatjindjire maghano ghendi no gha ghambire eshi ''Mbadi ya kuhokoka karo.'' ⁷ Oyi ne yogha ni neghedhire: Mumone, Fumu ghemanine kumbadi dhodikuma, nomughodhi ghomukumetitha munyara dhendi. ⁸ Nyambi gha ghambire kukwange, ''Amosi, nye ghuna kumona?'' Na huthire eshi, ''Mughodhi ghokumetitha.'' Podiyo Fumu gha ghambire eshi, ''Mone, nanyi nakuture mughodhi ghokumetitha mukatji ko hanu wange hakaIsragheli. Mbadi na kuwa theyererapo karo. ⁹ Mbo na tumu hakayita hakarwithe ndhugho dhaYeroboghamu, ndani hakayita wo ne mbo hana yipitha mango ghomakuru ghaIsaki nomango ghawo ghokupongoka.'' ¹⁰ Podiyo Amasiya, mupristeri ghomuBeteli, gha tumine mbudhi kwaYeroboghamu, fumu ghomuIsragheli: ''Amosi ne koghadi kuno mukatji kawaIsragheli , no kuna kukuroyithera gha tende yinu yoyimango kukoye. Manando ghendi ne nanyi gharete maghukukutu mukatji ko hanu. ¹¹ Oyi ne yo ghana ghamba Amosi, 'Yeroboghamu ne nanyi ghakufe kudimende, ndani hakaIsragheli ne nanyi ha kuwa tware kumatunga ghamwe kuyinyanda.'' ¹² Amasiya gha ghambire kwaAmosi eshi, ''Muporofeta, yende, tjire ghuhuke kuditunga dyaYuda, ndani ko ne kadye ghuroto ghokaporofete. ¹³ Ene waporofeta karo kuno kuBeteli, okuno ne kodiyo ghakugheranga fumu no dimbo dyendi kokuno dyakara.'' ¹⁴ Podiyo Amosi gha huthire Amasiya eshi, ''Ame ne mbadi no muporofeta endi no mwana muporofeta. Ame ne nomudithi, no nanapakera thinga yitondo yoghukuyu. ¹⁵ Ene Nyambi ghanishwayithire kukukunga yiyama no gha ni tongwerire eshi, 'Yende, kaporofete kwawanu wange hakaIsragheli.' ¹⁶ Mutegherere keho nando dhaNyambi. Amwe kughamba eshi, 'Wa porofeta wimanganyena Isragheli, ndani waghamba ghuyi kumuhoko waIsaki.' ¹⁷ Oyi ne yo ghana kughamba Nyambi, 'Munu ghoye ne mbo ghana kara thikumbu mumbara; hanyathi nanyi hakupaye hanenu; hanu nanyi hakushimbe muve wenu nokughukutapera; nanyi mwakafere mudikunga dyokayenda, no Isragheli nanyi hakumutware kuditunga dimwe ghakanyande.''