¹ Yinyanda kowa hadi thiwana muSiyoni, no kowa hana kupira kunyanda kehe yino mudirundu dyomukunda waSamariya, hatutughughuru homudyo thikuma mumishovo dhodhiwa, oku dheyanda ndhugho dhaIsragheli kumaghamweno! ² Hapiterithi wenu kughamba shi, ''Muyende kuKaleneha ndani ghomukakenge; kutunda ko ghomukayende kuHamata, mbara dhodhikuru, ndani ghomukayende kuGata muFilistina. Mawa kupitakana mambara ghenu mawadi ndi? Makuru mango ghawo kupitakana ghenu ndi? ³ Yinyanda kowa ha kananitha diyuwa dyomaghukukutu no kutenda dipuna dyoyinyanda di henye. ⁴ Kurara wo pamadidi ghomayegho ghomayama ghomakuru nokurara pamapura ghawo. Kudya nyama ghondjwighana nomandana ghomuhambo. ⁵ Kwimba wo membo ghoghuyero kumusika ghoyishikitha; kutenda membo ghomapya nokughashika payishika yira kenge gha tendire Davita. ⁶ Kunwa wo vinyu paturonga nokukuwethera hathinda nomaghadhi ghomawa, ene wo ne mbadiko kudira kuyinyanda yomushoko waYosefu yi yina kwiya. ⁷ Mbo hana wa thiyeneka ha yende kumatunda ghamwe ha kawa nyandeke, no mafeste ghowa hararaghuranga ne mbo ghana pu. ⁸ ''Ame, Fumu Nyambi, nakwedhera nothinda- oyi ne yo gha ghamba Fumu Nyambi, Nyambi ghomashurundate ghomudiwiru, Na nyatha kukununeka kwaYakopu; na nyenga mango ghendi agha hakunga thiwana. Podiyo keho mbo na tapa mbara dhiya no yoyihe eyi ya kara mo.'' ⁹ Mbo yina kara ngeno eshi ngeshi hanu dikumi hana thiyara mundhugho dhofotji ne nanyi ha kufe. ¹⁰ Opa ghakwiya mwapa ghomukatughuru no gha shimbe mwimba- oyu gha kughutumeka pakumana kushwayitha mwimba mundhugho- ngeshi ghakuninge kwa munu yu ghadi mundhugho eshi, ''Koghadi ghumwe ghudi nendi muno ndi?'' Ngepi keho ngeshi ghakuhuthe yo munu eshi, ''Ka''? Oyu gha nepura nanyi ghakughambe eshi, ''Porere, mbadi twa kona kutoya dina dyaNyambi.'' ¹¹ Mutegherere, Nyambi ne nanyi ghakuraghure, no mandhugho ghomahe mbo ghana gha hanyaghura. ¹² Kukona tukambe tutjirere pamuve ghomawe-mawe? Kukona ghumweya ghapurure mo nomapuru? Ene keho mwatjindja ghuhunga ghukare ghuhungu no mbuyo dho ghuhungami kughururu- ¹³ amwe mwa shamberera yoyishi mwa kwata mukunda waLo Debara, amwe mwa ghamba eshi, ''Mbadi twa shimba twe napo Karanayimi pamangcamu ghetu?'' ¹⁴ Ene mutegherere, nanyi na kutende mushovo ghumwe ghumwinganganyene, amwe mwakaIsragheli- oyi ne yo gha ghamba Fumu Nyambi, Nyambi ghomashurundate ghomudiwiru. Nanyi ghakumunyandeke kutunderera kumbunda dhomushovo wenu kate kughutcuma.''