¹ Muyuve dhi nando nashimbi nimuguvere, ndhugho dhaIsragheli. ² Isragheli yu ghapira kukara panyama rumweya ne ghana ghu; mbadi mbo gha pinduka karo; hana mumwagherera pamuve wendi; mbadiko ghokumupindutha. ³ Oyi ne yo gha ghamba Fumu Nyambi: ''Mbara dhiya dhayendire nodiyovi ne mbo dhina dhiyara nodithere ngenyu, no yu gha yendire nodithere ne mbo ghana thiyara nodikumi ngenyu di dyahatera kundhugho dhaIsragheli.'' ⁴ Oyi ne yogha ghamba Nyambi kundhugho dhaIsragheli: Munishane ghomupare! ⁵ Mwa shana Beteli; endi mungene muGiligali; mwa yenda kuBeresheba. Giligali ne yashemwa mbo ghana yendi munotwa, no Beteli ne mbadi mbo gha kara po. ⁶ Mushane Nyambi ghomupare, ngeshi mbadi kemo, nanyi ghashwaye yira mudiro mundhugho dhaYosefu. Nanyi wa kumine, no mbadiko yu gha kughudhimitha muBeteli. ⁷ Owo hanu ne kupirura ghuhunga ghukare yira yinu yoyimango no kumwagha ghuhungami pamuva!'' ⁸ Nyambi ghatendire tutumwedhi; kupirura ye dikokore kumathiku-thiku; gha tenda diyuwa dikokore noghuthiku noghashimba meyu ghomudikuruviya nokugharokitha pamuve. ⁹ Gha reta maharanganyeno ghopopo kwawa ha tanara podiyo eshi maharanganyeno gheye pamango ghokukunga thiwana. ¹⁰ Ha nyenga kehe yuno gho kuwa roghudhurura muthero dhombara, no hanyenga kehe yu gho kughmba ghushemwa. ¹¹ Yoyishi amwe ne kudjata pawahepwe nokushimba mavumbukiro kuwawo- ngambi kenge mwatenda mandhugho ghomawe ghomawa, mbadi mbo mu tunga mo. Mwakara nomapya ghovinyu ghomawa, ene mbadi mwakunwa mo vinyu. ¹² Ame na dimuka eshi dhingatji dhimurandu dhenu no ghukuru ghomaharwero ghenu- amwe mwa nyandeka hanu hohahunga, kuninga hanu hamupe yinu mutenda yinu yoyimango, nokufika hakakunyanda muthero dhombara. ¹³ Hanyanyami ne hana porera paruvedhe rokenge, ruvende roruyi. ¹⁴ Mushane ghuwa no mbadi ghuyi, podiyo eshi ngo mupare. Podiyo Nyambi, Nyambi wawamashurundate ghomudiwiru, gha kare nenu yoghushemwa, thika di muna kughamba eshi nenu ghadi. ¹⁵ Munyenge ghuyi, muhake ghuwa, muture ghuhunga muthero dhombara. Pamwe Nyambi, Nyambi wawamashurundate ghomuwiru, nanyi gha fere neke hadiko dyaYosefu wa hathiyarapo. ¹⁶ Pano keho ne, yoyi gha ghamba Nyambi, Nyambi wawamashurundate ghomuwiru, Fumu, ''Madiro mbo ghana kara mukehe dishonga, no mbo hana ghamba mu kehe thitarata, 'Yinyanda! Yinyanda!' Nanyi ha kwithe handjimi kudiguvo nohaka kudiguvo kukudira. ¹⁷ Mu kehe dipya dyovinyu nanyi mwakukare madiro, ame nanyi nakupite mukatji kenu,'' gha ghamba Nyambi. ¹⁸ Yinyanda kukwenu mwe mwashana diyuwa dyaNyambi! Pamurandu munye muna kururera diyuwa dyaNyambi? Nanyi kwakukare dikokore no mbadi thishe, ¹⁹ thika kenge hatjiranga munu kunyime nokakuwanekera nothishereka thimwe, endi kuyenda mundhugho nokatura nyara dhendi padikuma no thiyoka kokumuhuma. ²⁰ Mbadi dikokore napo dya kukara kudiyuwa dyaNyambi no mbadi thishe? Makokoreghana no mbadi thishe ndi? ²¹ Na nyenga, nanyatha yidjabwana yenu, mbadi nahaka yikupongenga yenu. ²² Ngambi kenge mwanipanga miyambo dhenu dhokutumeka no miyambo dhenu dhombuto, mbadi nakudhitambura, no kukenga temba kumiyambo dho ma kupakerero dho yiyama yenu yokununa. ²³ Munishwayithe muyoyo ghomembo ghenu; mbadi shonitegherere kumughuma ghoyishika yenu. ²⁴ Ene, muninge ghuhunga ghupuke yira meyu, noghuhungami yira meyu ghokupuka kehe pano. ²⁵ Mwa ni reterire ndupu nomiyambo mumamboreya mumyaka makumi mane mwe mwandhugho dhaIsragheli? ²⁶ Mwa yeyura mwe thishwi thaSikuthi, fumu wenu, naKayiwana, nyambi wenu ghokatumwedhi, oyu mwakutendere mwathinda. ²⁷ Mbona mutjidhera kuthambo kuya dhaDamasikusi,'' gha ghamba Nyambi, dina dyendi ne Nyambi wawamashurundate ghomuwiru.